Yohani 4:1-54
4 Vaavaa Apwiya yaasuwenlaaya wi Afarisi yaahiiwa wi Yesu onnaapaka ni waapatisa oohuserya ancipale ompwaha Yohani
2 (naamwi mwaneene Yesu ahaapatisa, nto oohuserya awe ti yaapatisa),
3 owo aavinya o Yuteya akookela o Kalileya.
4 Nto waari woochuneya wi avire o Samariya.
5 Mwawiihiiha, aaphiya epooma yo Samariya yawiichaniwa Sikari, waacamela emaca yeeyo Yakopo aamvanheiye mwanawe awiichaniwa Yosefe.
6 Chiryene ehime ya Yakopo yaari weiwo. Nave Yesu avelavenle nthowa na mukwaha, aakiraathi waacamela ehime. Eyo yaari ewora ya neethanu nammoha.*
7 Aarwa muthiyana mmoha o Samariya orika maahi. Yesu aalocano ariki: “Okivahe maahi kiwurye.”
8 (Oohuserya awe yeera ekele opooma othuma yoolya.)
9 Mwawiihiiha, muthiyana o Samariya aahi wa yoowo: “Onaweryeya hai wi nyuwaano muri Muyuta, munakiveka maahi oowurya, miyaano kiri muthiyana o Samariya?” (Woona wi Ayuta hanalocihana ni Asamariya.)
10 Yesu aamwaakhula: “Waasuwenle yamahala ya Muluku vamoha ni yoowo onaloca ni weyo ariki: ‘Okivahe maahi kiwurye,’ weyaano waahaala omveka, nave owo aahaala woovaha maahi ookumi.”
11 Muthiyana aahi: “Pwiya, nyuwaano himwaanono echu ya orikano maahi, nave ehime ti yawiixa. Vano, muni muruuhe woowi maahi ookumi?
12 Apwanne mwa mutokweene opwaha nikholo nahu Yakopo, yoowo onivanhe ehime yeela aawuryeiyevo vamoha ni anamwane awe ni muhuwo awe?”
13 Yesu aamwaakhula: “Oothene yoole onawurya maahi yaala, nthanana nnammuuma wanaawiili.
14 Yoole oni awurye maahi kineeraaka kimvahe, nthanana hinrwa nimuuma, nto maahi yaawo kineeraka kimvahe anamuthatuwa mwa yoowo okhala naacuucu a maahi anakhuma wi evahe ekumi yoohimala.”
15 Muthiyana aahi: “Pwiya, mukivahe maahi ene yaawo, wi kihirwe kikhaleno nthanana naari mano okookela veehimeni vaava orika maahi.”
16 Yesu aalocano ariki: “Hawe, waakelele aiyaa.”
17 Muthiyana aamwaakhula: “Nkitheliwe.” Yesu aahi wa muthiyana: “Wooloca phaama oriki: ‘Nkitheliwe.’
18 Vawi waatheliwa ni alopwana athanu, nave mulopwana oryaaweno hiihaano tahi aiyaa. Weyo wooloca eparipari.”
19 Muthiyana aaloca ariki: “Pwiya, kinoona wi nyuwaano mwa mulipa a miririmu.
20 Makholo ahu yaamulapa Muluku va mwaako yoola; nyenya achu nyu, munaloca wi nipuro nnaphwanelaahu omulapawo ti o Yerusalemu.”
21 Yesu aahi wa yoowo: “Muthiyana, okiroromele, enamphiya elukuluku yeeyo nyuwaano muneeraanyu muhaalapeke Atiithi va mwaako yoola naari o Yerusalemu.
22 Nyuwaano munamulapela yoowo muhimusuwenlaanyu; nto hiyo nnamulapela yoowo nimusuwenlaahu, ntakhara ovuluxiwa opacenrye wa Ayuta.
23 Nto enamphiya elukuluku, nave vano yoophiya, vaavaa alapeli eeparipari eneeraaya yaalapeke Atiithi mwa munepa ni mwa eparipari. Woona wi chiryene, Atiithi anawaavya achu si yaala wi yaalapeleke.
24 Muluku Munepa, nave yaawo anamulapa yoowo anaphwanela omulapela mwa munepa ni mweeparipari.”
25 Muthiyana aahi wa yoowo: “Koosuwela wi onamurwa Mesiya, awiichaniwa Kristu. Wakhala wi oorwa, onamunileela ichu soothesene.”
26 Yesu aahi wa yoowo: “Ti yoomi ene, kinaloca ni weyo.”
27 Mu elukuluku yeele, oohuserya awe yaaphiya nave yaatikhina vaavaa yaamoonnaaya alocaka ni muthiyana. Nto, haavo aamukonhe ariki: “Tiheeni munachunaanyu ni muthiyana?” naari “Ntakhara heeni munalocaanyu ni yoowo?”
28 Mwawiihiiha, muthiyana aahiya muno awe wa maahi, aya o pooma nave aaleela achu ariki:
29 “Rwaani mmoone mulopwana yoowo okileenle ichu soothene kenraaka. Apwanne yoowo tahi Kristu?”
30 Oothene yaakhuma opooma eya wa yoowo.
31 Yeereyaka yeela, oohuserya yaanamveka Yesu eriki: “Rapi, mulye.”
32 Nyenya owo aalocano ariki: “Kookhalano yoolya yeeyo nyuwaano muhisuwenlaanyu.”
33 Hiihaa, oohuserya yaanakohana eriki: “Apwanne ookhala omuruuhenle yoolya?”
34 Yesu aahi wa yaawo: “Yoolya aka ori weerano yookhwela ya yoole okirumme ni waakhwaniherya muteko awe.
35 Nyuwaano hamunaloca wi sinahala miyeeri mixexe wi ephiye elukuluku ya ohaca? Wiriyanani yeeyo kinooleelaakaani: Mviihe miru sanyu nave moone imaca, soolya soomalela sinachuneya ohaciwa.* Ovinyerya hiihaano
36 mulipa oohaca onnaakhela nlivelo nawe nave onnathukumanya sawiima ntakhara ekumi yoohimala, wi mulipa awaala vamoha ni mulipa oohaca* ehakalale vamoha.
37 Vawi mmukhalelo yoola, masu ala teeparipari: Mmoha mulipa awaala mukina mulipa oohaca.*
38 Kihoorumaani ohaca yeeyo muhoonenlaanyu ekoi. Akina taphanrexa muteko, nto nyuwo mphura muteko aya.”
39 Asamariya ancipale a epooma yeele yaamuroromela Yesu vanthowa na onamoona wa muthiyana, yoowo aalonce ariki: “Owo ookileela soothene kenraaka.”
40 Mwawiihiiha, vaavaa Asamariya yaamphwannyaaya Yesu, yaamveka wi akhale ni yaawo, nave owo aakhala weiwo mahiku meeli.
41 Ntoko yookhumelela, akina tho ancipale yaaheemererya nthowa na yeeyo Yesu aalonceiye,
42 nave yaaloca wa muthiyana: “Tahi wi nneemererya pahiru nthowa na yeeyo oloncaawe; woona wi niiwale mukhatiihu nave noosuwela wi mulopwana ola chiryene mvuluxa a elapo.”
43 Yaavinraaya mahiku yaala meeli, owo aacimula ayaaka o Kalileya.
44 Nyenya, Yesu mwaneene aaheerela onamoona wi mulipa a miririmu hanacicimihiwa mu elapo awe.
45 Mwawiihiiha, vaavaa aaphin’yeiye o Kalileya, Akalileya yaamwaakhela phaama, nthowa nawi yaahoona ichu soothene enreiye o Yerusalemu, elukuluku ya efesta; woona wi awo tho yaayawo ofestani.
46 Voocharela, owo aakookelawo o Kana o Kalileya, weiwo aatatunxeiye maahi ekhala eviinyu. Nave weiwo aakhalawo namuteko a mwene, yoowo mwanawe iiceliwa o Kafarnawu.
47 Vaavaa mulopwana ola iiwaleiye wi Yesu aacimula o Yuteya ayaaka o Kalileya, aamuthikirerya amveka wi akhuruwele o Kafarnawu wi ampenuxe mwanawe, woona wi mwanawe aahanle vakhaani okhwa.
48 Nyenya Yesu aahi wa yoowo: “Voohikhala wi nyuwo mohoona ineneeryo ni sootikhiniha nyuwo hamurwa mweemererya.”
49 Namuteko a mwene aamwaakhula ii: “Pwiya, murwe mwanaka ahaakumve okhwa.”
50 Yesu aahi wa yoowo: “Rowa; mwanaa mukumi.” Mulopwana aaheemererya masu Yesu aalonceiye, nave owo aarowa.
51 Arikimurowa, akapuro awe yaamuthikirerya wi emuleele wi mwanawe mukumi.*
52 Mwawiihiiha owo aahaakoha ewora taani mwaana aapenunweiye. Awo yaamwaakhula yii: “Feepiri ommalenle osilo ewora yaneethanu napiili.”*
53 Voocharela, tiithi aasuwela wi yaari elukuluku ene yeele Yesu aamulenleiye ariki: “Mwanaa mukumi.” Owo vamoha ni aveechokoni vawe oothene yaaheemererya.
54 Ela yaari eneneeryo yanaawiili Yesu aapankeiye vaavaa aakookeiye o Yuteya ayaaka o Kalileya.
Inoota
^ Ela tiwi, variyari va ewora ya 12, mitiya.
^ Naari: “ohephiwa.”
^ Naari: “oohepha.”
^ Naari: “oohepha.”
^ Naari: “aanapenuwa.”
^ Ela tiwi, variyari va ewora ya 13.
