Yupu 17:1-16
17 “Munepa aka woophweeya, mahiku aka annaxipha,Mahiye annakiwehererya.
2 Alipa a munyemu aakirukurerya,Nave miitho aka annakhinyereryeya oweha mukhalelo aya woomwaryeya.
3 Khwoo, mweemererye mweemeseryo aka nave mukhapelele.
Taani oni akiphare ntata ni okhala ntoko mulipa oopoleya wi akikhaviherye?
4 Tiwi, nyuwo moowalela muupuwelo aya wi ehiiwexexeke;Ti nthowa nene muhinaacicimihaanyu.
5 Ookhala oniivaha wi akawane echu ni asinthamwene awe,Eniiha anamwane awe ehoonaka phaama nthowa na etala.
6 Muluku ookeera okhala echu yoonyemuwa* variyari va achu,Ophiyerya wi kinnatapheriwa mara wiithoni.
7 Miitho aka aaceecheya wa nthowa na wuukhuwa,Nave makupa oothene a mwiili aka aathatuwa muuruxi.
8 Achu awookololowa annatikhina vaavaa anoonaaya yeela,Nave oohikhalano nthowa annuukhuwa nthowa na ootakhala.*
9 Eekhaikhai onnaakeelela mphiro awe,Nave yoole orino mata aweela onnatitelela okhala akuru.
10 Nyenya oothene anyu munanwerya okookela oloca,Tiwi nkimphwannyeru a miruku variyari vanyu.
11 Mahiku aka aakuchuwa;Marehereryo* aka, soochuna sa murima aka, sohaakanyeryeya.
12 Awo annatatuxa ohiyu okhala othana,Elocaka: ‘Omwaleela onaphwanela okhala vakhiviru, woona wi wooripavo.’
13 Kawehererya, Mahiye* anahaala okhala empa aka;Kinamurehererya ekaama aka mweepiphini.
14 Kinamuloca wa nlici* kiriki: ‘Weyo wa apapa aka!’
Ni wa miyuuku:* ‘Nyuwo mwa amama aka ni murokora aka!’
15 Vano ewehereryo aka eri woowi?
Taani onoona wi kookhalano ewehereryo?
16 Eyo* enaya okhuruwela o milako sa Mahiye,*Vaava nneeraahu nikhuruwele vamoha onchupini.”
Inoota
^ Mu Ehepiri, “nsiposipo.”
^ Naari: “alipa oomwaryeya.”
^ Naari: “Apalanu.”
^ Naari: “Seyoli,” ela tiwi, nipuro achu oothene anavithiwaayawo. Moone Masu Atharihiwe.
^ Naari: “nihiye.”
^ Naari: “inyuuku.”
^ Ela tiwi, ewehereryo aka.
^ Naari: “Seyoli,” ela tiwi, nipuro achu oothene anavithiwaayawo. Moone Masu Atharihiwe.
