Yupu 21:1-34
21 Yupu aahaakhula:
2 “N’wiriyane phaama yeeyo kinalocaaka;Voocharela munanwerya okihakararya.
3 Mukhale oopixa murima, vaavaa kinalocaaka;Kimanle oloca, munanwerya okinyemula.
4 Apwanne kiniikhupanyerya vamiithoni va muchu?
Yaari hiiha, apwanne nkaahaala* oyeleela opixa murima?
5 Mukivarerye nave mukhale ootikhiniheya;Mphute iyano sanyu ni mata.
6 Vaavaa kinuupuwelaaka sa yeela, kinnahaleeliheya,Nave mwiili aka woothene onnathukumela.
7 Ntakhara heeni achu oonanara murima ennatitelela okhala,Enuuluvala nave enakhala a muhakhu?*
8 Ilukuluku soothene anamwane aya ari vamiithoni vaya,Nave annaphiyerya woona muyareriwo aya.
9 Ipa saya iri sookhapeleleya, awo hanoovaru echu;Nave Muluku hanaalaka ni ekopo awe.
10 Imope saya seelopwana sinnarelana ohirivo nikacamiho;Imope saya seethiyana sinnayara nave hinnayeeharu erukulu.
11 Maponkwe aya annachimaka vaate vaya ntoko muhuwo,Nave anamwane aya annacupha moohakalala.
12 Awo anniipa echarihaka ekoma ni chakare,Nave annahakalala ewiipaka anamviiro.
13 Awo annaviriha mahiku aya moohakalalaNave annakhuruwela o Mahiye* mmureceleni.*
14 Nyenya awo annaloca wa Muluku eeparipari: ‘Munihiye meekhiihu!
Hinnachuna osuwela iphiro sanyu.
15 Taani Aikuru Soothene, wi nnamurumeela yoowo?
Tiheeni nneeraahu niphurevo namusuwela yoowo?’
16 Nto koosuwela wi awo hanawerya ovareryela muhakhu aya.
Muupuwelo* wa achu ootakhala ori ocai wa miyaano.
17 Ikwaha kavi exipihiwaaya epanthi ya alipa ootakhala?
Ikwaha kavi yaarweenlaaya epahu?
Mu onanariwa wawe, ikwaha kavi Muluku aatolonxeiye?
18 Apwanne awo annakhala ntoko ikokhola inavavihiwa ni echekuNave ntoko makate* anakuxiwa nnayuupuru?
19 Muluku onamwaalaka anamwane a achu ootakhala wa nthowa na yoocheka ya asitiithi aya.
Nto Muluku amulake yoowo mwaneene wi asuwele wi oocheka.
20 Miitho awe yoone otoloxiwa wawe,Nave wi awurye esara ya Aikuru Soothene.
21 Tiwi, apwanne owo onnapwacha yeeyo enahaala weereya veemusini vawe amanle okhwa,Eniiha miyeeri sawe ivukuliwe?*
22 Taani onawerya omuhusiha Muluku,*Yoowo onaathoriha ophiyerya tho yaale arino mirici sa vasulusulu?
23 Muchu mmoha onnakhwa nlelo arino ikuru,Ahuukhuwaka ni echu nave iichaanle,
24 Anatori awe enenemve,Nave makhuva awe elimpe.
25 Nto, muchu mukina onakhwa asaren’ye makacamiho,Ahintoko olawiha ichu saphaama.
26 Oothene yaala anahaala okona vanchupini,Nave oopiili anahaala ohuruweliwa ni miyuuku.*
27 Onani! Koosuwela phaama yeeyo munuupuwelaanyuNave wi munavaanela wi mukeerele yoonanara.*
28 Tiwi munnaloca muriki: ‘Eri woowi empa ya muchu ole ooreela,Nave ori woowi muxakala yoole achu ootakhala yaakhalaayawo?’
29 Apwanne hamwintonko waakoha alipa oopaka mikwaha?
Apwanne hamuhusenrye moopwacha ineneeryo saya,
30 Wi yoole aweera soonanara onnoopoliwa nihiku na epahuNave onnavuluxiwa nihiku na esara?
31 Taani oni amusamele wa nthowa na ephiro awe,Nave taani oni amukookiherye wa yeeyo opankeiye?
32 Vaavaa oneereiye akerihiwe o mahiye,Onamukuhiwavo mulipeleli va nihiye nawe.
33 Echaya yeeyo owo onuuheliweiyeno enamukhala yoosiva wa yoowoNave achu oothene annamuchara yoowo,*Hiiha ntoko yeeren’yaaya ni achu ancipale owo ahaakumve.
34 Vano, ntakhara heeni munakivahaanyu nihakararyo nihinaphuriha echu?
Maakhulo anyu oothene tahi echu enevo, nto sawootha pahi!”
Inoota
^ Mu Ehepiri, “munepa aka hiwaahaala.”
^ Naari: “oowerya.”
^ Naari: “Seyoli,” ela tiwi, nipuro achu oothene anavithiwaayawo. Moone Masu Atharihiwe.
^ Naari: “moohilekela,” ela tiwi, okhwa wawaakuveya ni woohiicela.
^ Naari: “miruku; owoka.”
^ Naari: “makasapa; makhapa.”
^ Naari: “miyeeri sawe ikwasiwe veeri.”
^ Naari: “Taani onawerya omuleela Muluku miruku.”
^ Naari: “inyuuku.”
^ Naari akhweya: “okeerela ichu sa nlala.”
^ Mu Ehepiri, “Nave owo onamwaapula achu oothene.”
