Yupu 36:1-33
36 Elihu aatitelela oloca:
2 “Mukhale oopixa murima vaavaa kinatharihaaka,Tiwi nlelo kookhalano masu a oloca mu nsina na Muluku.
3 Kinamuloca mookwakwaleya yeeyo kisuwenlaaka,Nave kinamulaleya wi wookololowa ti wa Yoole Okipanke.
4 Mweeparipari, masu aka hari oowoka;Nave yoole orino masuwelelo awaakhwanela ori vaava, vamiithoni vanyu.
5 Chiryene, Muluku tooweryaxa nave hanamunyanyala muchu;Owo ookhalano masuwelelo matokweene.*
6 Hakhapelela ikumi sa achu oonanara murima,Nave onampaka yeeyo eri yawookololowa wa achu awuukhuwa.
7 Owo hanahiya waaweha awookololowa murima.Owo onnaakiraathiha vamunyukhuni vamoha ni mamwene,* nave awo anninnuwihiwa okhala wookhala.
8 Nto, wakhala wi aamakiwa ni ikurentiNave ephariwa ni mikoi soohooxa,
9 Owo onnawooniha yeeyo awo apankaaya,Soocheka saya seiyo sikhumelenle nthowa na wiirumiha waya.
10 Onnahula maaru aya wi awookololeNave onnaaleela wi erapele yeeyo eri yoonanara.
11 Wakhala wi aamwiiwelela ni omurumeela,Awo anahaala omaliha mahiku aya mmureceleni,Nave miyakha saya sinahaala okhala soohakalaliha.
12 Nyenya, wakhala wi hemwiiwelenle, awo anahaala wiiphiwa ni nlema,Nave anahaala okhwa ehirino masuwelelo.
13 Achu oonanara murima* anahaala okuha mathowa.
Hanaveka nikhaviheryo, naamwi Muluku aamanke.
14 Awo annakhwa* nlelo eri amiravo,Awo annathatiha* okumi aya variyari va alopwana ooraruwa a mu empa ya amuluku atheru.
15 Nto Muluku* onnaavuluxa awuukhuwa variyari va wuukhuwa waya;Onnahula maaru aya vaavaa anahooxiwaaya.
16 Owo onnooviihaammooni mwaano wa soohooxaNave onnookerihaani nipuro ntokotoko, nohiwomaanyeya,Weiwo muneeraanyu muhakararyihiwe ni yoolya yaphaama vameesa vanyu.
17 Vanonto, munamuhakalala ni othorihiwa wa achu oonanara murima,Vaavaa othorihiwa oneeraaya opakiwe nave ekhaikhai yiikhaleleru.
18 Nto, mukhaleno ephoole wi esara ehiweeriheeni opaka ichu moonyeenyeya,*Nave muheemererye opheruwa wa nthowa na makhwankwa matokweene.
19 Apwanne okhuwela wanyu mvekaka nikhaviheryoNaari wiilipixerya wanyu otokweene onanwoopolaani mu soohooxa?
20 Muhinleleke waaphin’ye ohiyu,Vaavaa achu anacakanelaaya mmapuroni mwaya.
21 Mukhaleno ephoole wi muhichikele weera soonanara,Muthanlaka yeela ohiya weemererya yoohooxa.
22 Onani! Muluku toovuwa mu owerya wawe;Muhusiha taani onalikana ni yoowo?
23 Taani omuleenle* ephiro aweNaari olonce wa yoowo ariki: ‘Yeeyo mwenraanyu ti yoonanara’?
24 Muupuweleke ovuwiha miteko sawe,Seiho achu aniipaaya.
25 Achu oothene annoona seiho,Muchu onnavarerya seiho ari ociiwene.
26 Aa, Muluku mutokweene opwaha mummo nnaanyiheryaahu;Waaca wa iyaakha sawe honaalakhanyeya.
27 Owo onnaweliha osulu macoicoi a maahi,Awo annathukumana vamoha nave ekhala meeku a epula;
28 Voocharela meeku annamoriha epula,Enaamorela achu oothene.
29 Apwanne ookhala onawerya wiiwexexa waateleleya wa meeku,Ni itari inakhuma mmuxakalani mwawe?
30 Moone mukhalelo owo onamwaramwaxeiye overunya* voorukurerya vayaNi okhuneela wiixa* wa ephareya.
31 Moorweela wa ichu seiha, owo onnakhapelela* maloko;Owo onnaavaha yoolya mwawaaca.
32 Ni mata awe, owo onnakhuneela etari,Nave onnaluluwanyiha eyo wa echu.
33 Oruma wa etari awe onnamulokoha,Ophiyerya wi muhuwo onnalokoha taani onarwa.*
Inoota
^ Mu Ehepiri, “Owo ti mutokotoko mu owerya wawe wa murima.”
^ Naari akhweya: “onnaweera mamwene.”
^ Naari: “oomwaryeya.”
^ Naari: “Okumi aya onnakhwa.”
^ Naari akhweya: “annamaliha.”
^ Mu Ehepiri, “Owo.”
^ Naari: “woopa makuphi moonyeenyeya.”
^ Naari akhweya: “aakaanhe; omuthorinhe wa nthowa na.”
^ Mu Ehepiri, “omwaleela wawe.”
^ Mu Ehepiri, “mitathaari.”
^ Naari akhweya: “onnathoriha milacu sa.”
^ Naari akhweya: “tiheeni enarwa.”
