Yupu 39:1-30
39 “Apwanne woosuwela elukuluku ikhomace inayaraaya?
Woontoko owoona anaahe yaayaraka asaanaaya?
2 Apwanne woosuwela miyeeri anamalihaaya erupanle?
Onnasuwela elukuluku anayaraaya?
3 Awo annakokhora vaavaa anaayaraaya asaanaaya,Nave masooso aya a oyara annamala.
4 Asaanaaya annakhala akuru nave anninnuwa otakhwani;Annapurumeya nave hankooka tho.
5 Taani omutaphunle puuru amutakhwani,Nave taani otaphunle mikoyi sa puuru amutakhwani?
6 Koomvaha mureyareya wa elapo yawuuma wi akhalekewo,Nave elapo ya maakha wi akhalewo.
7 Owo onnathanya onyakula wa mpooma,Hanawiriyana okhuwela wa mulipa ooweeciha axinama wi elape.
8 Owo onneeceeca mmiyaakoni aavyaka munyepu,Aavyaka mwiri ori woothene mukithi.
9 Apwanne enari enamweemererya woolapa?
Naari oviriha ohiyu mu nikholani mwaa?
10 Apwanne onanwerya omakelela enari nipisi noolimano,Naari apwanne eyo enamoochara wi yalime opopani?
11 Apwanne onamuroromela ikuru saya itokweeneNave onamuhiyerya wi ephareke miteko saa soolimela?
12 Apwanne onamuroromela yeeyo wi enaruuha soohepha saa*Ni othukumanya mmakhupini mwaa?
13 Avestruxi* onnatatha muuphelo awe moohakalala,Nto apwanne moophelo awe ni mapururu* awe annalikana ni a napipi?
14 Owo onnahiya mooce awe vacheyani,Nave onnaviheeriha ni echaya.
15 Owo onnacuwala wi muchu onanwerya onyikala,Naari wi mwaaxinama a mutakhwani onanwerya ophwaca.*
16 Owo onnaakhaliha moowali asaana awe ntoko wi tahi awawe;Hanoova wi muteko awe onamukhala wasiiyo.
17 Tiwi Muluku oomwiimana* mirukuNave hamvanhe osuwela.
18 Nto avinya ni omana muuphelo awe,Owo onnamutheya kavalo ni mulipa oonwela.
19 Apwanne ti weyaano onamvaha ikuru kavalo?
Nave onanwariha mapururu oorekama muxikoni mwawe?
20 Apwanne onanwerya omweeriha wi acupheke ntoko musope?
Omumula* wawe otokweene ti wawoopiha.
21 Owo onnavalatha* echaya yoopopani nave onnahakalala vancipale;*Onnaya okhoconi achimakaka.*
22 Owo onnatheya woova nave hanoova echu,
Hanakookela muculi wa nthowa na nlema.
23 Mwa yoowo, mavaka ari mmurupani annanyakula;Nivaka vamoha nnivaka nooveya annaarya.
24 Athukumelaka ni iitathaka, owo onnacimula achimakaka,*Hanawerya weemela* vaavaa oniiweiye onyakula wa nipeca.
25 Iiwa oruma wa mapeca onnii: ‘Eyaa!’
Ari ociiwene, onneemurya wunkha wa mukhicoNave onniiwa okhuwela wa ahooleli a anakhoco ni okhuwela wa ekhoco.
26 Apwanne ori wa nthowa na osuwela waa sawawe onavaveiye,Atapuruxelaka makuphelo awe makupa oohico?
27 Naari ti weyaano onalamulela wi enaka evaveleke osuluNi opaka epuuru aya osuluxa,
28 Evirihaka ohiyu waathoka wa mwaako,Vanipuro noolipihiwa enakhalayaavo, vanikumukumuni?*
29 Eri osulu weiwe ennaavya yoolya,Miitho aya annoona ocai.
30 Asaanaaya annawurya nikhami;Nave weiwo ariwo axinama ookhwa, eyo eri weiwo.”
Inoota
^ Mu Ehepiri, “mmiso aa.”
^ Onaahiwa palame mutokotoko oorakama exiko ni ipirithi nto hanavava.
^ Naari: “manri.”
^ Naari: “onyaanya; oharavanya.”
^ Mu Ehepiri, “oomucuwaliha.”
^ Mu Ehepiri, “Osapa.”
^ Naari: “onnavarutha.”
^ Mu Ehepiri, “onnahakalala ni ikuru.”
^ Mu Ehepiri, “Onnacimula wi akumane ni ikaruma soowanano.”
^ Mu Ehepiri, “onnavalatha echaya.”
^ Naari akhweya: “Owo hanawerya weemererya.”
^ Mu Ehepiri, “va niino na mwaako.”
