Yupu 4:1-21
4 Voocharela, Elifasi o Temani aamwaakhula ii:
2 “Wakhala wi muchu oheererya oloca ni nyuwaano, apwanne munamukhala oohipisa murima?
Nyenya taani onawerya omaala?
3 Mweeparipari, nyuwo mwaanawookolola ancipale,Nave mwaanaalipiha ooceecheya.
4 Masu anyu yaanaaviiha yaale yaakwaculiwa,Nave mwaanaalipiha yaale ookhoropowa makutha.
5 Nto vano yeeren’yaaya ni nyuwaano, munakhala oothanana;*Eyo ehoophwanyaani, nave nyuwo munakhala ooceecheya.
6 Apwanne omoova wanyu Muluku honoovahaani nlipiho?
Apwanne ororomeleya wanyu honoovahaani ewehereryo?
7 Khwoo muupuwele: Apwanne mohintoko omoona muchu ohirino nthowa acakanenle?
Ti liini muntonkwaanyu owoona awookololowa murima etoloxiwe?
8 Kohoona wi yaale analima yootakhala*Ni waala yoonanara anahepha emohamoha.
9 Awo annakhwa nthowa na nwiya wa Muluku,Nave mu oveerela wa esara awe awo annatholowa.
10 Mwaco onnoopa murika, nave mwaasaana a mwaco onninla,Ophiyerya tho miino a amwaco akuru annakhuleya.
11 Amwaco annakhwa nthowa na ohiphara echu,Nave asaana a mwaco annahuwahuwa.
12 Vano kaaleeliwa masu wiiphiini,Nave masu awaapiwa yaaphiya owaruni waka.
13 Ni mawuupuwelo oohaleeliha variyari va sawoona sa ohiyu,Vaavaa ikhove sawiixeela sinaaphwanyaaya achu,
14 Woova otokweene waakiphwanya,Nave makhuva aka oothene yaanathukumela.
15 Munepa waavira vamiithoni vaka;Mapururu* a mwiili aka enakiitheenya.
16 Voocharela owo waaheemela,Nto nkaasuwela mukhalelo aya.
Kaahoona echu vamiithoni vaka;Waakhalavo omaaleleya, nave voocharela, kaahiiwa nsu:
17 ‘Apwanne muchu pahi onanwerya okhala awookololowaxa murima ompwaha Muluku?
Apwanne muchu onanwerya okhala aweelaxa murima ompwaha Yoowo ompanke?’
18 Mweeparipari, owo hanaaroromela alapeli awe,Nave onnaaphwanyerya nthowa ankeelo awe.*
19 Hanka nto wa achu oocheka yaawo ari ntoko ipa sa oloko,Mathipelo aya ari vanchupini,Yaawo ari ookhweya waaphonca* ntoko asiichu!
20 Awo annakhala wooxiixelo nave oxekuwa annaphonceliwa* vathi.Awo annacakanela okhala wookhala, nave haavo onapwacha.
21 Apwanne awo hari ntoko muxakala yoowo omwaryiwe?
Awo annakhwa ehirino miruku.
Inoota
^ Mu Ehepiri, “oovelavela.”
^ Naari: “aneera yootakhala.”
^ Naari: “Manri.”
^ Naari: “anamichaka awe.”
^ Naari: “waahirimita.”
^ Naari: “annahirimiteliwa.”
