Yupu 40:1-24
40 Yehova aatitelela omwaakhula Yupu:
2 “Apwanne yoole onaakaaha onnaphwanela waakhulana ni Aikuru Soothene?
Yoole onachuna omusamela Muluku aakhule.”
3 Yupu aamwaakhula Yehova:
4 “Nkiri oophwanelela!
Tiheeni kinahaalaaka owaakhulaani?
Kinnaphuta iyano saka ni mata.
5 Kooloca ekwaha emoha, nyenya nkikookela oloca;Ikwaha piili, nto nkiloca tho echu ekina.”
6 Vanonto, Yehova aamwaakhula Yupu mu echeku etokweene:
7 “Khwoo, wiirehererye ntoko mulopwana;Kinamoopakela makoho, nave weyo okileele.
8 Apwanne onahaala waakaaha ekhaikhai aka?*
Onahaala okithoriha, wi weyaano okhaleno rasawu?
9 Akhweya apwanne wookhalano nwono wakuruxa ntoko wa Muluku eeparipari?Naari apwanne nsu naa nnanwerya woopa etari ntoko nawawe?
10 Khwoo, wiireerihe ni ncicimiho ni otokweene,Wiiwarihe ovuwa ni waarya.
11 Oyeehe ovarela wa esara aa;Waavarerye oothene awiisoona* nave waamorihele vathi.
12 Waavarerye oothene awiisoona nave owuulihe muru,Waanyaanye aweera soonanara vanipuro aryaayavo.
13 Waavithe oothene onchupini;Waawalele* onipuro nooripa,
14 Vanonto, ophiyerya tho yoomi kinamweemererya*Wi ntata naa noolopwana nnanwerya woovuluxa.
15 Omvarerye Pehemoti,* yoowo kimpankaaka hiiha ntoko koopankaaka
Owo onalya manaxi ntoko emope.
16 Ovarerye ikuru sa muyuununi mwaweNi owerya wa misiphe sa erukulu awe!
17 Owo onnalipiha mwiila awe ntoko mwiri wa seeturu;Misiphe sa mmeconi mwawe ti soochavana.
18 Makhuva awe ari ntoko miphempo sa enyacu;Meco sawe iri ntoko muthipo.
19 Owo ori mu nipuro noopacerya* variyari va miteko sa Muluku;Pahiru mulipa oompaka tonawerya omwaacamela ni ekatana awe.
20 Yoolya awe enakhuma mmiyaakoni,Mwemmo asinama oothene a mutakhwani anathatayaamo.
21 Owo onakona vathi va ifolori sa mmaahini,*Mmakhuku a mmarekeleni a mucapo.
22 Ifolori sa mmaahini* sinnamukhuneela ni muuruusi aya,Nave mikonya sa mpopani sinnamurica.
23 Vaavaa muhice onarweelaaya, owo hanoovaru echu.
Owo onniiroromela, naamwi maahi a muhice Yortano emurweenle owanoni wawe ni ikuru.
24 Taani onawerya omphara owo oonaka,Naari omukowa mphulani ni nancoolo?*
Inoota
^ Naari: “Apwanne onahaala weeriha ekhaikhai aka ohikhalano mphurelo?”
^ Naari: “awiikhoma.”
^ Mu Ehepiri, “Omake ithoyi saya.”
^ Naari: “kinamoothamalela.”
^ Akhweya onaahiwa chomoco.
^ Mu Ehepiri, “tori oopacerya.”
^ Naari: “ekhokowa.”
^ Naari: “ekhokowa.”
^ Mu Ehepiri, “muraakho.”
