Aai. Muluku onnaakhapelela alapeli awe aniiceliwa. Alocaka sa mulapeli oororomeleya, Piipiliya oriye: “Apwiya anarwa yaakhaviherya, eneeraaya yiiceliwe.” (Salumu 41:3) Waakhanle wi munnahooxeya ni ereca yoohipenuxeya, ichu iha raru inanwerya wookhaviheryaani ovilela:

1. Mumveke Muluku ikuru wi nwerye ovilela. Nyuwo munanwerya waakhela “murecele wa Muluku yoowo opwanhe wuupuwela wahu woothene,” yoowo onahaala ovukula wuukhuwa wanyu ni wookhaviheryaani okhala oolipa.​—Filipi 4:6, 7.

2. Mukhaleno moonelo woophwanelela. Piipiliya oni: “Murima woohakalala, murece wa mmwiilini; nto murima woothanana, wuumiha mmakhuvani.” (Masiposipo 17:22) Munnuwihe moonelo wa ohakalala, eyo enamookhaviheryani ovukula wuukhuwa wanyu ni okhalano ekumi yaphaama.

3. Mulipihe ewehereryo anyu mu soororomeliha sa Muluku. Olipiha ewehereryo anyu enahaala wookhaviheryaani okhala oohakalala naamwi muhooxeyaka ni ereca yoohipenuxeya. (Aroma 12:12) Piipiliya oolaiherya wi enamphiya elukuluku oni ahikhalevo muchu “anii aloce, ariki: ‘Kinniiceliwa.’” (Isaiya 33:24) Muluku onahaala openuxa ireca soothene seiho alipa a siyensiya amutano ahinaweryaaya omaliha. Ntoko yootakiherya, Piipiliya oolaiherya wi achu awuuluvala anamukookela okhala amiravo ni asimwali ni okhalano okumi waphaama: “Vaavaa mwiili awe onarwa openuwa, owo onarwa akookela okumi wa omiravo awe.”​—Yobi 33:25.

Suwelani ela: Naamwi esuwelaka wi Muluku onnavahererya nikhaviheryo, Anamoona a Yehova annaavya oloola wa ereca yoohipenuxeya. (Marko 2:17) Mwawiihiiha, hinnamuleela muchu wi aavye mukhalelo wa oloola wammoori; ninnasuwela wi muchu ti muchu onanwerya opaka yoolakelela awe yoophwanelela.