Oninoskalti ipan se barrio tlen nokaua Los Ángeles (California, Estados Unidos). Ompa melak noixmatiya pampa melak nonemakayaj drogas niman nemiyaj miyekej pandillas. Notajuan kinpiayaj chikuasen inkoneuan, nejua ika ome nitekoneuj.

Ijkuak tikokonej katkaj, nonan techuikaya ipan se teopan evangélica. San ika, ijkuak más iniueyi katka, xok niknekiya nikakis tlen ompa techijliayaj. Ipan domingos ninokuikatiaya teopan, san ika, okseki tonaltin san ninoyolpaktijtinemiya, nikinkuiya drogas niman niauilnemiya.

Nejua melak nimantsin nikualaniya niman san tlenon nikontilanaya para ika nitlauijsokiya, pampa niknekiya nitetlanis. Xtlaj ika onechpaleui tlen onechmachtijkej ipan teopan. Nochipa nikijtouaya: “San toTajtsin kinamiki matetlakuepilti, niman nejua nikan ninemi para nikpaleuis”. Kanaj ipan 1960, ijkuak nikpiaya kanaj 18 xiuitl, opeuj nikuelita tlen kichiuaya se grupo político tlen itoka katka Panteras Negras, pampa yejuamej kinpaleuiayaj oksekimej. Onikalak ipan se grupo akin noijki ijkon kichiuaya. Miyekpa toescuela okitsajkej pampa tejuamej tikchiujtinemiyaj plantón.

Pampa nejua melak nitlauele katka, sakin opeuj nikchiua tlen melak xkuajli. Nikilnamiki ika nejua iuan noamigos tiayaj cine para tikimitaskej películas kampa uajnesiya kenon esclavos de África melak kintlajyouiltiayaj ne Estados Unidos. Pampa melak techkualaniaya tlen kinchiuiliayaj, tejuamej tikinuijsokiyaj telpokamej akin chijchipaujkej akin noijki nemiyaj ipan cine. Noijki tiayaj tikomintejtemouayaj kampa chantiyaj niman ijkon noijki tikinuijsokiskej.

Ijkuakon nokniuan niman nejua, melak techixmatiyaj pampa tikchiujtinemiyaj tlen melak xkuajli, hasta yotokalaktijkaj ipan tlauejli imiuan policías. Se nokniuj akin más pitentsin katka, nemiya ipan se pandilla akin melak kimixmatstoyaj pampa kichiujtinemiya tlen melak xkuajli. Niman nejua noijki imiuan ninouikaya. Nesiya kentla xkeman ninopatlaskia.

Itajuan se noamigo, akin iteixpantijkauan Jehová katkaj, onechijlijkej imiuan maniuiya tlanechikojli. Ijkuak kachtopa oniajka tlanechikojli onikitak kenon yejuamej xkichiuayaj ken oksekimej. Nochimej kipiayaj se Biblia niman hasta akin más telpokamej kinpanoltiayaj tlamachtiltin. Melak onechmojkatlachialti nikmatis ika toTajtsin itoka Jehová, niman kenon yejuamej kitekitiltiayaj itoka toTajtsin ijkuak itech tlajtouayaj. (Salmo 83:18, TNM). Akin ompa nemiyaj miyekan ualeuayaj, maski ijkon, yejuamej xnochikoitayaj.

Kachtopa xniknekiya manechmachtikan itech Biblia, san ika, kema nikuelitaya nias tlanechikoltin. Sejpatipan, chika nejua ninemiya ipan tlanechikojli, sekimej noamigos oyajka ipan se iluitl niman ompa okimiktijkej se telpochtli pampa kinekiya kikuiliskej ichamarra de cuero. Uajmostla, yejuamej kiteijlijtinemiyaj tlen okichiujkaj, niman maski ikintlajtlakolmakatoyaj, yejuamej kinemiliayaj ika xueyi kijtosnekiya tlen okichiujkaj. Casi nochimej okintsajkej niman okimijlikej ika xok keman kinkixtiskiaj. ¡Melak oniyolpak pampa ximiuan oniajka! Ika yejon, oniknek ninopatlas niman opeuj ninomachtia Biblia.

Ijkuak onikitak ika iteixpantijkauan Jehová xnochikoitayaj, melak onechmojkatlachialti pampa, desde ijkuak oninoskalti, onikitak kenon melak nochikoitalo. Nikilnamiki ika sejpa katka se iteixpantijkauj Jehová akin chipauak nonekiya yas okse país, niman ijkuak oyaj, okinkaujteuj ikoneuan iuan se familia akin xchijchipaujkej katkaj. Noijki nikilnamiki ika se tonajli, se familia akin chijchipaujkej okijlikej se telpochtli akin xchipauak katka imiuan machantiti. Kuajli onikitak ika iteixpantijkauan Jehová kichiuayaj ijkon ken okijto Jesucristo ipan Juan 13:35: “Tla nemotlajsojtlaj inuan oksekimej, nochi tlakatl kitas ika nennotemachtijkauan”. Aman kuajli nikmatstoya ika yonikinnextijka akin yemelak katkaj nokniuan.

Pampa ninomachtijtoya Biblia, onikasikamat ika nonekiya ninopatlas. Kuakon, oninokojtili xok nikchiuas tlen xkuajli nikchiuaya. San ika, xsan yejon, noijki oninokojtili xok nitlanemilis ken nitlanemiliaya (Romanos 12:2). Ika yolik oninopatlatiaj. Niman ipan 1974, oninoapolakti niman oninochiuj iteixpantijkauj Jehová.

Maski yoninoapolaktijka, ok nonekiya ninoteltis para xnimantsin nikualanis. Nikilnamiki ika se tonajli ijkuak titenojnotstinemiyaj, oniktototokak se tlakatl akin onechichtekilijka noradio tlen kipiaya nocarro. Niman ijkuak inikonajsitoya, okitlajkaltiuets noradio ipan tlajli niman yejua sajnoye ocholoj. Ijkuak onikimijli oksekimej kenijki oniktekuili noradio, se tokniuj akin youejkaujka ika kitekichiuilia Jehová, onechijli: “¿Tlenon tikchiuaskia tla tikojnasiskia?”. Ijkuak ijkon onechijli, onikasikamat ika ok nonekiya más ninopatlas.

Ipan octubre de 1974, opeuj más nitenojnotsa itech Biblia. Nikchiuaya kanaj cien horas nochi metstin. Sakin, onechnotskej manitlapaleuiti ipan oficina kampa noyekanaj nochi sucursales tlen onka Brooklyn (Nueva York). Ipan 1978 ononek ninokuepas Los Ángeles para niktlajpiyas nonan pampa kualouaya. Ome xiuitl sakin, oninonamikti iuan Aarhonda, yejua melak onechpaleui maniktlajpiya nonan hasta ijkuak omik. Sakin, otikselijkej Tlamachtijli itech Biblia tlen kiyekana Watchtower, niman ijkuak otlan tlamachtijli, otechtitlankej Panamá ken misioneros, niman hasta aman nikan tinemij.

Desde ijkuak oninoapolakti, yopanok miyek tlen ueliskia kichiuas nimantsin manikualani. Nikintlalkauiya akin nechpepeualtiaj noso nikchiua itlaj okse para niyolseuis. Nosiuatsin niman oksekimej yonechijlikej ika melak kuajli ijkuak ijkon nikchiua. Nechmojkatlachialtia kenon melak yoninopatlak, san ika, kuajli nikmatstika, ika san nejua xueliskia ijkin nikchiuas. Yonikitak ika san Biblia uelis kipaleuis yakaj manopatla (Hebreos 4:12).

Biblia yonechpaleui melak maniyolpaki niman maka melak nimantsin manikualani. Aman xok nikinuijsoki oksekimej, yej, nikinpaleuiya makixmatikan toTajtsin. Hasta yonikmachti se akin melak niktlauelitaya ijkuak ninemiya ipan escuela. Satepan ika onoapolakti, san sekan otichantikej se tiempo, niman hasta aman melak kuajli touikaj. Hasta aman, nejua iuan nosiuatsin, yotikinpaleuijkej ipantsin ochenta tlaltikpakchanejkej manochiuakan iteixpantijkauan Jehová.

Melak niktlasojkamachilia Jehová pampa yonechpaleui melak maniyolpaki niman pampa nikinpiya melak miyekej nokniuan.