Ken tejua tikpouas Biblia uelis melak mitstlatsiuitis noso melak mitsyolpaktis. Matikitakan tlen uelis tikchiuas para más tiknekis tikpouas Biblia.

Xtlapejpeni se Biblia tlen kuajli yonotlajtolkuep niman tlen uelis tikasikamatis. Tla ijkuak tikpoua Biblia tikimita miyek tlajtoltin tlen aman xok nokuij noso tlen xtikasikamati, xmás tiknekis tikpouas. Ika yejon, xtejtemo se Biblia tlen xouijtika tikasikamatis niman tlen maajsi ipan moyojlo. Noijki noneki tikitas ika makijto tlen melauak niman ika kuajli yonotlajtolkuep. a

Uelis tiktekitiltis tecnología. Aman Biblia xsan onka ipan amatl, noijki onka para tikitas ipan aparatos electrónicos. Uelis tikpouas ipan internet noso tiktemoltis ipan se computadora, tableta noso teléfono. Seki Biblias kipiyaj tlen uelis mitspaleuis xkita kenon yonotlajtolkuep se tlaxelojli ipan okseki Biblias, noijki mitskauiliaj xkita kenon notlajtolnamikij seki tlaxeloltin. Niman tla san tikneki tijkakis, noijki onka ika audio. Miyekej kuelitaj kikakiskej ijkuak yauej ontekitij, ijkuak tlapakaj noso ijkuak kichiuaj itlaj okse. ¿Tejua kenon tikuelitaskia, tikpouas noso san tijkakis?

Okseki xmomachti. Tla okseki timomachtia itech Biblia, kichiuas más mamitspaleui tlen tikpoua. Onka mapas tlen mitsititiskej kanon onochiuj tlen Biblia kijtoua niman tlen mitspaleuiskej más kuajli xkasikamati Biblia. Noijki seki tlamachtiltin itech yejuin revista niman itech “Tlamachtiltin itech Biblia” tlen onka ipan topágina tlen tikpiyaj ipan Internet, jw.org ,mitspaleuiskej más kuajli xkasikamati tlen Biblia kijtoua.

Xpatlatiuj ken timomachtia Biblia. Tla xmás tikneki tikpouas Biblia desde kampa peua hasta kampa tlami, uelis peuas tikpouas kampa más tikuelita. Tla tikneki tikmatis más itech yakaj akin Biblia kiteneua, uelis san tikpouas kampa uajnestiuj tlen yejua okichiuj. Recuadro tlen itoka “ Tiuelis más itech Biblia tla tikimixmati akin ompa noteneuaj” mitspaleuis tikchiuas yejon. Noijki uelis tiktlapejpenis tlen tikneki tikmatis niman san tikpouas ipan Biblia kampa tlajtoua itech yejon. Noso uelis tikpouas ijkon ken onochiujtia tlen ompa kijtoua. Tejua xtlapejpeni kenon tikneki tikpouas.