Nokniuan:

Yopanok dos mil seiscientos xiuitl ika teotlajtoketl Ezequiel okipix se tlatlachalistli tlen temojkatlachialti: okitak se ueyi carro ipan iluikak niman kiyekantiuj akin melak Ueyixtika. San ika, ken notlalouaya, yejon tlen melak temojkatlachialti. Pampa notlalouaya totoka ijkon ken ijkuak uajtlapetlani, ijkuak yaya oksekan nion xnoteltiaya niman xnokuepaya (Ezeq. 1:4, 9, 12, 14, 16-27).

Yejuin tlatlachalistli techilnamiktia ika seki itech ikalpan toTajtsin tlen onka ipan iluikak xkeman noteltia. Niman, ¿tlenon uelis tikijtoskej itech tlen onka ipan tlaltikpaktli? Jehová kichiujtok ika ikalpan noijki melak manotlalo, ijkon nesi itech xiuitl tlen youajpanok.

Ipan Estados Unidos, akin tekitij Betel kipiyaj melak miyek tekitl pampa kisaskej itech Brooklyn niman yaskej ipan yenkuik oficina kampa noyekanaj nochi sucursales ipan Warwick (Nueva York), noso okseki ipan oficinas tlen itlatki Betel. Niman oksekimej betelitas yokiselijkej se yenkuik tekitl. Ipan okseki países, betelitas melak chikauak yotekitkej ijkuak kinchijchiuaj, kinyektlaliaj niman kimejkuaniaj sucursales noso ijkuak onchantij oksekan. Maski kanaj nemejuamej xnemochanpatlaj, san ika, noijki melak nenkipiyaj miyek tekitl.

Grupo akin Tlayekana ipan nochi tlanechikoltin melak kiyolchikaua kimatis ika tokniuan ipan nochi tlaltikpaktli melak chikauak kichiujtokej itekiyo toTajtsin niman ijkon san sekan notlaloskej iuan ikalpan. Miyekej yotlapaleuitoj kampa xnemij miyekej akin tenojnotsaj. Oksekimej tenojnotsaj kampa tlajtouaj okse tlajtojli noso kiyejyekouaj okse ken uelis tenojnotsaskej. Niman oksekimej kitejtemouiliaj kenon uelis melak kuajli tenojnotsaskej. Noijki, nochimej tokniuan akin yolmelaujkej, youeuentsintiakej noso kualoj, ok notlalojtokej ika chikaualistli ipampa nemilistli, nochipa kitekichiuilijtokej Jehová niman ijkon kiteititiskej ika Satanás se tlakajkayaujketl (1 Cor. 9:24, TNM).

Kuajli xmatstokan ika Jehová kitstok nochi tekitl tlen nemejuamej nenkichiujtokej (Heb. 6:10). Ijkon ken okichiuj Abrahán niman Sara. Ijkuak Abrahán kipiaya kanaj 70 xiuitl, ika iyojlo okinek kikauas ueyikalpan Ur niman iuan ichanejkauan onchantiskej Canaán se tlajli tlen melak uejka onkatka. Ompa ochantikej ipan tlakenkajkaltin cien xiuitl, hasta ijkuak omik. ¡Okinejkej kikauaskej miyek tlemach tlen ueliskiaj kipiyaskiaj! (Gén. 11:31; Hech. 7:2, 3).

Kuajli tla totlajtoltiaj, ¿noijki ijkon nikchiujtok? Nochimej akin  yolmelaujkanemij ipan yejuin sa itlamiyan tonaltin kichiuaj tlen Jesús kichia totech. Yejua otechnauati: “Xuiyan niman xkinmachtikan tlaltikpakchanejkej ipan nochi kalpamej, xkinapolaktikan ipampa itoka toTajtsin niman ipampa Tekoneuj niman ipampa espíritu santo” (Mat. 28:19, TNM).

Ijkuak Jesús okijto “xuiyan”, oteasikamachilti ika noneki maka keman toteltiskej. ¡Niman ika toyojlo tomachiliaj ijkuak nochi xiujtin tikitaj tlen kichiuaj akin kitlakamatij Cristo! Ompa nesi ika Jehová kiteochiujtok tenojnotsalistli itech kuajli tlajtoltin itech Tekiuajyotl ipan nochi tlaltikpaktli niman yejua kiyekantok yejuin tekitl (Mar. 13:10).

Miyekej kiselijtokej iTlajtol toTajtsin. Xiuitl tlen yopanok onajxilti 8,340,847 tenojnotskej niman otemachtijkej itech Biblia ipan se metstli kanaj 10,115,264. Melak kuajli nesi ika carro tlen onka iluikak totoka notlaloua, ¡niman nemejuamej noijki! Melak kuajli nentekititokej, ijkon xchiujtokan pampa tinemij sa itlamiyan tonaltin niman Jehová xikitsakua puerta tlen teuika ipan temakixtilistli.

Texto del año 2017 melak kuajli techilnamiktia, kijtoua: “Xtlaneltoka itech Jehová niman xchiua tlen kuajli” (Sal. 37:3). Ijkuak tiktlakamatij yejuin tlajtoltin niman tiktekichiuiliaj Jehová tikteititiaj ika titlaneltokaj itech. Matikilnamikikan ika xsan toselti tinemij. Jesús otechijli: “¡Xkitakan!, mojmostla nemouan ninemi hasta ijkuak sa achijtsin poliuis ijkuak tlamis tlajtlamach ken nochiua ipan tlaltikpaktli” (Mat. 28:20, TNM). ¿Kanaj xok kichiuas yejuin tlen okijto?

Matikilnamikikan: Jehová nochipa kiteochiuas totekiyo. Maski tla tikchiuaj miyek noso achijtsin, yejua kineki matikmakakan nochi kech tiueliskej niman ika nochi toyojlo. Ijkuak tikchiuaj yejon, melak tikyolpaktiaj (2 Cor. 9:6, 7). Kuakon, nochipa matonisiuikan itech toTajtsin ijkuak tikchiuaj teoyotl, tomachtiaj iTlajtol, nochipa tiauej ipan tlanechikoltin niman tokojtiliaj titenojnotsaj.

Satanás “kimatstika ika xok uejkajtikaj kiselis icastigo” niman kichiujtok nochi tlen ueli niman ijkon maka sa matiyolmelaujkanemikan itech Jehová (Apoc. 12:12). Niman yejuin teixnamijketl kiyejyekos techkixtis ipan ojtli tlen chipauak. San ika, tla tinemij iuan Jehová, Diablo xkeman uelis techtlanis (Sal. 16:8). Xmatstokan ika melak timechtlasojtlaj niman melak tiktlasojkamatij nochi tlen nenkichiuaj, ijkon nenkipaleuiskej iTekiuajyo toTajtsin ipan yejuin sa itlamiyan tonaltin.

Nemokniuan,

Grupo akin Kinyekana iTeixpantijkauan Jehová