Historia 20

Dina nokalaktia ipan tlauejli

¿TIKITSTIKA akinomej komintlapaloua Dina? Yauj kampa sekimej ichpokamej akin chantij Canaán. ¿Yejuin kipaktiskia itaj Jacob? Itlaj tlen uelis mitspaleuis tikmatis, tla tikilnamiki tlen kinemiliayaj Abrahán niman Isaac itech yejuin siuamej chanejkej Canaán.

¿Kinekiya Abrahán ika ikoneuj Isaac iuan manonamikti se siuatl chanej Canaán? Ka. ¿Kinekiya Isaac iuan Rebeca manonamikti inkoneuj Jacob, iuan se cananea? Ka. ¿Tikmatstika tleka?

Pampa akin chantiyaj Canaán kinueyichiuayaj tajtsitsintin. Xkuajli katka tla se iuan timonamiktis noso iuan timouikas. Ika yejon kuajli tikmatstokej ika Jacob xkuelitaya ika ichpoch manouika iuan cananeas.

Kema ijkon, Dina onokalakti ipan ueyi tlauejli. ¿Ueli tikita ipan tlaixkopinajli yejon cananeo akin kontlajtlatstika Dina? Itoka Siquem. Se tonajli ijkuak Dina otetlajpaloto, Siquem okichiualti Dina iuan manoteka. Yejuin xkuajli katka, pampa san tlakamej iuan siuamej akin yononamiktijkej uelis notekaskej. Tlen Siquem okichiuili Dina, okichiuj makipiyakan miyek tlauejli.

Ijkuak ikniuan Dina okimatkej tlen yopanoka, melak okualankej. Omemej ikniuan, Simeón iuan Leví, pampa melak okualankej, oyajkej ika espadas, niman okalajkej ipan ueyikalpan. Yejuamej niman ikniuan okimiktijkej Siquem niman nochimej oksekimej tlakamej. Jacob melak okualan itech tlen okichiujkej ikoneuan.

¿Kenon opeuj yejuin tlauejli? Pampa Dina imiuan nouikaya akin xkitlakamatiyaj itlanauatiluan toTajtsin. Tejuamej xtikintejtemoskej imiuan touikaskej akin ijkon kichiuaj, ¿xmelak?

Génesis 34:1-31.