Historia 25

Ichanejkauan José onchantij Egipto

JOSÉ xok kixikoua. Kimijlia itlakeualuan makisakan kampa nemiyaj. Ijkuak iselti nemiya iuan ikniuan, José peua choka. Uelis tiknemiliskej kenon melak tlamojkaitaj ikniuan, pampa xkimatij tleka choka. Aman yejua kijtoua: ‘Nejua niJosé. ¿Ok yoltika notaj?’

Ikniuan xuelij tlajtouaj ika melak tlamojkaitaj niman nomojtiaj. San ika, aman José kimijlia: ‘Nimechtlajtlanilia, xuajmonisiuikan’. Ijkuak ikniuan kichiuaj, kijtoua: ‘Nejua niJosé nemokniuj, akin onenkinemakakej’.

José ika tlajtojli yemanki kimijlia: ‘Maka xmotlajtlakoltikan ika oninechnemakakej nikan. Pampa toTajtsin yejua akin yemelak onechajtitlan Egipto niman ijkon manikinmakixti tlaltikpakchanejkej. Faraón yonechtlali kentla nitlanauatijketl ipan nochi yejuin país. Aman, xiakan ne kampa chanti notaj niman xkijlikan yejuin tlen onemechonijli. Noijki xkijlikan nikan machantiki’.

Kuakon José kinnapaloua ikniuan. Ijkuak Faraón kikaki ika ikniuan José youajlakej, kijlia José: ‘Makitkikan carretas niman makanatij motaj iuan ichanejkauan niman mauajlakan nikan. Nikinmakas melak kuajli tlajli tlen onka ipan nochi Egipto’.

Niman ijkon okichiujkej. Nikan uelis tikitas José kenon kitlajpalotika itaj ijkuak oyejkok Egipto iuan nochi ichanejkauan.

Ichanejkauan Jacob melak yonomiyekilijkaj. Katkaj 70 ijkuak oyajkej Egipto, Jacob niman ikoneuan iuan ixuiuan. San ika, noijki ompa nemiyaj insiuauan, niman kanaj noijki miyek itlakeualuan. Nochimej opeujkej chantij Egipto. Okintokayotijkej israelitas, pampa toTajtsin yokitokayopatlaka Jacob kentla Israel. ToTajtsin melak okintlasojtlak, ken tikitaskej sakin.

Génesis 45:​1-​28; 46:​1-​27.