Historia 24

José kintlatlata ikniuan

JOSÉ kineki kimatis tla majtlaktli ikniuan akin yakatstiuej ok xkuajli inyojlo. Ika yejon, kimijlia: ‘Nemejuamej san onenmixtakatlachiakoj. Nenkinekij nenkimatiskej kenon uelis nenkixoxotoniskej topaís’.

‘Ka, xyejon tlen otikchiuakoj’, kijtouaj yejuamej. ‘Tejuamej kuajli toyojlo. Tinochimej tikniujtin. Tikatkaj 12. San ika, se tokniuj xok touan nemi, niman akin xokoyotl nemi tochan iuan totaj.’

José kiteititia kentla xkinneltoka. Kichiua makitsakuakan ikniuj Simeón, niman kinkauilia sekimej makitkikan tlakuajli niman mayakan inchan. San ika, kimijlia: ‘Ijkuak nenuajmokuepaskej, kipiya ika nenkuajuikaskej nemokniuj akin xokoyotl’.

Ijkuak ajsij inchan ne Canaán, kijliaj intaj Jacob nochi tlen opanok. Jacob melak noyolkokoua. ‘José xok touan nemi’, kijtoua, ‘niman aman Simeón noijki xok touan nemi. Xniktekauilis makuikakan nokoneuj akin xokoyotl, Benjamín.’ San ika, ijkuak sa achijtsin kipiayaj tlakuajli, Jacob kitekauilia makuikakan Benjamín ne Egipto niman ijkon makikuitij tlakuajli.

Aman José kimita ika uajlauej ikniuan. Melak paki ika kita ikniuj Benjamín, akin xokoyotl. Nion se, xkimati ika yejuin tlakatl akin ueyixtika, yejua José. Aman José itlaj kichiua tlen ika kintlatlata majtlaktli itlakpaikniuan.

Kichiua itlakeualuan makintemiltikan ika tlakuajli inkostaluan. Niman xakaj okimat, noijki okinnauati itlakeualuan makitlalilikan icopa tlachijchiujtli ika plata ijtik ikostal Benjamín. Sakin, ijkuak uejka yoyajkaj, José kinnauatia itlakeualuan makimasitij. Ijkuak kinnextiaj, yejuin tlakeualtin kimijliaj: ‘¿Tleka yonenkichtejkej icopa toteko, tlen tlachijchiujtli ika plata?’

‘Tejuamej xotikichtekilijkej icopa’, kijtouaj nochimej ikniuan. ‘Tla yakaj kinextiliaj, makimiktikan.’

Ika yejon, tlakeualtin kitejtemouaj ipan nochi kostaltin, niman kinextiaj copa ipan ikostal Benjamín, ijkon ken nikan tikita. Tlakeualtin kijtouaj: ‘Nemejuamej uelis nenyaskej, san ika, Benjamín kipiya ika uajlas touan’. ¿Tlenon kichiuaskej aman majtlaktli itlakpaikniuan?

Nochimej yauej iuan Benjamín ichan José. José kimijlia ikniuan: ‘Nemochimej uelis nenyaskej nemochan, san ika, Benjamín kipiya ika nikan nokauas kentla notlakeual’.

Aman Judá tlajtoua, niman kijtoua: ‘Tla nejua ninokuepa xiuan yejuin telpokatsin, notaj mikis, pampa melak kitlasojtla. Ika yejon, nimitstlajtlanilia, nejua maninokaua kentla motlakeual, niman xkauili mauiya yejuin telpokatsin’.

José okimitak ika ikniuan xok ijkon katkaj. Yonoyolpatlakej niman aman kema teikneliaj. Matikitakan aman tlenon kichiua José.

Génesis 42:9-38; 43:1-34; 44:1-34.