Historia 12

Kichijchiuaj se torre uejkapan

OPANOKEJ miyek xiujtin. Ikoneuan Noé okinpixkej miyek inkoneuan, yejuamej onoskaltijkej niman noijki okinpixkej inkoneuan. Nimantsin onomiyekilijkej ipan tlaltikpaktli.

Se ikoneuj Noé okipix se ixuiuj, kixmatiyaj kentla Nemrod. Yejua xkuajli katka, kinmajsiya niman kinmiktiaya yolkamej iuan tlakamej. Nemrod noijki onochiuj tekiuaj niman ijkon kinyekanas oksekimej. ToTajtsin xkuelitaya tlen kichiuaya Nemrod.

Ipan yejon tonajli nochimej san se tlajtojli tlajtouayaj. Nemrod kinekiya san sekan kinpiyas niman ijkon yejua kinyekanas. Ika yejon, ¿tikmatstika tlenon okichiuj? Okimijli makichijchiuakan se ueyikalpan niman noijki ompa se uejkapan torre. Ipan tlaixkopinajli tikimita kenon kichijchiujtokej tabiques.

Jehová xokuelitak makichijchiuakan yejuin torre. Yejua kinekiya ika tlaltikpakchanejkej machantitij ipan nochi tlaltikpaktli. San ika, yejuamej okijtokej: ‘¡Tiauej! Matikchijchiuakan se ueyikalpan niman se torre melak uejkapan tlen maajsi iluikak. ¡Kuakon nochimej techixmatiskej!’ Kinekiyaj yejuamej makinueyiteneuakan niman maka toTajtsin.

Ika yejon, Jehová okichiuj maka sa makichijchiuakan torre. ¿Tikmatstika kenon xokinkauili? ToTajtsin okichiuj tlaltikpakchanejkej matlajtokan miyek tlajtoltin, maka san se. Yejuamej xok nasikamatiyaj. Ika yejon, ueyikalpan okitokayotijkej Babel noso Babilonia, tlen kijtosneki “xnasikamatilo”.

Aman tlaltikpakchanejkej opeujkej kisaj itech Babel. Akin nasikamatiyaj onosentlalijkej niman onosemoyaujkej ipan nochi tlaltikpaktli.

Génesis 10:​1, 8-​10; 11:​1-9.