Se xkuajli tekiuaj tlanauatia Egipto
Historia 27
Se xkuajli tekiuaj tlanauatia Egipto
TLAKAMEJ akin nikan nesij, kinchiualtijtokej matekitikan tlaltikpakchanejkej. ¡Xkita akin kiuitektika se tekipanojketl! Yejon tekipanojkej ichanejkauan Jacob, niman kimixmatij kentla israelitas. Niman akin techiualtijtokej matekitikan yejuamej egipcios. Israelitas onochiujkej intlakeualuan. ¿Tleka ijkon opanok?
Miyek xiujtin ichanejkauan Jacob onenkej ika yolseuilistli ipan Egipto. Faraón yejua tekiuaj akin melak ueyixtika ipan Egipto niman sakin ompa kitokaya José, akin kintlajpiaya israelitas. San ika, José omik. Niman okse yenkuik Faraón opeuj tekiuajti Egipto, akin kintlauelitaya israelitas.
Kuakon yejuin xkuajli Faraón okintekitilti chikauak israelitas. Niman okintlalilijkej makinyekanakan tlakamej xkuakualtin akin tetlajyouiltiayaj. Yejuamej okinchiualtijkej chikauak matekitikan israelitas, niman ijkon makichijchiuilikan Faraón ueyikalpamej. San ika, israelitas ok melak nomiyekilijtoyaj. Sakin, egipcios nomojtiayaj manomiyekilikan israelitas niman makimixnamikikan.
¿Tikmatstika tlenon okichiuj Faraón? Otlajto imiuan siuamej akin kinpaleuiayaj israelitas ijkuak kintlakatiliayaj inkoneuan, niman okimijli: ‘Kipiya ika nenkimiktiskej nochi tlakakonetl akin uajtlakati’. San ika, yejuin siuamej kuajli katka inyojlo, niman xkinmiktiayaj.
Ika yejon, Faraón okinnauati egipcios: ‘Xkinmiktikan nochi tlakakonemej israelitas. San xkinkauilikan manemikan siuakokonej’. ¿Xmelak ika xkuajli pampa ijkon otlanauati? Matikitakan kenon omakis se tlakakonetsintli.
