Historia 67

Jehosafat tlaneltoka itech Jehová

¿TIKMATSTIKA akinomej yejuin tlakamej niman tlenon kichiuaj? Yauej ipan se guerra, niman tlakamej akin yauej inyekapan nokuikatijtokej. Kanaj timotlajtoltia: ‘¿Tleka xkipiyaj espadas nion lanzas akin nokuikatiaj tlen ika tlaixnamikiskej?’ Matikitakan.

Jehosafat tekiuajti intech ome uejueyimej familias israelitas. Nemi ijkuak Acab niman Jezabel tekiuajtij ipan majtlaktli uejueyimej familias, akin chantij ika tlakpak. San ika, Jehosafat se kuajli tekiuaj, niman itaj Asá noijki kuajli okichiuj. Kuakon ipan miyek xiuitl, israelitas itech ome uejueyimej familias akin chantij tlatsintlan, pakij niman nemij ika inyojlo.

Aman panoua tlen kinmojtia israelitas. Sekimej tlakamej uajlauej niman kijliaj Jehosafat: ‘Uajlauej miyekej soldados itech Moab, Ammón niman tepetl Seír mitsalixnamikiskej’. Miyekej israelitas nosentlaliaj Jerusalén pampa kitejtemouaj itlapaleuilis Jehová. Yauej ipan teopan, niman ompa Jehosafat kichiua teoyotl: ‘Oh toTajtsin Jehová, xtikmatij tlenon tikchiuaskej. Xuelis itlaj tikinchiuiliskej yejuin miyekej soldados. Xtechpaleui’.

Jehová kikaki, niman kijlia se itekipanojkauj makimijli israelitas: ‘Xnemejuamej nenteixnamikiskej, toTajtsin teixnamikis. Xkipiya ika nenteuisokiskej. San xtlachixtokan, niman xkitakan kenon Jehová mechmakixtia’.

Uajmostla Jehosafat kimijlia israelitas: ‘¡Xtlaneltokakan itech Jehová!’ Kuakon akin nokuikatiaj yauej iyekapan soldados, niman ijkuak nejnemij nokuikatiaj tlakuikaltin tlen ika kiueyichiuaj Jehová. ¿Tikmatstika tlenon panoua ijkuak kinnisiuiyaj akin kimixnamikiskej? Jehová kichiua ika akin kimixnamikiskej san yejuamej manouisokikan. ¡Ijkuak israelitas ajsij, nochimej soldados yomijkej!

Jehosafat tlamachilise, otlaneltokak itech toTajtsin, ¿xmelak? Tla tejuamej noijki ijkon tikchiuaj, titlamachilisejkej yeskej.

1 Reyes 22:41-53; 2 Crónicas 20:1-30.