Historia 66

Jezabel xkuajli iyojlo

IJKUAK omik tekiuaj Jeroboán, nochimej tekiuajkej akin okinyekankej majtlaktli uejueyimej familias israelitas, akin chantiyaj ika tlakpak, xkuakualtin katkaj. Acab se itech yejuin tekiuajkej akin melak xkuajli katka. ¿Tikmatstika tleka? Pampa isiuauj Jezabel xkuajli iyojlo.

Jezabel xisraelita katka. Itaj tekiuajti ipan iueyikalpan Sidón. Jezabel kiueyichiua Baal, niman noijki kichiua Acab niman miyekej israelitas makiueyichiuakan Baal. Jezabel kitlauelita Jehová niman kinmiktia miyekej iteotlajtokauan. Oksekimej kipiya ika niyanaskej ipan teostotl niman ijkon maka makinmiktikan. Tla Jezabel itlaj kineki, temiktia niman ijkon kipiya tlen kineki.

Se tonajli Acab melak najmana. Kuakon Jezabel kitlajtoltia: ‘¿Tleka timajmana?’

‘Ika tlen onechijli Nabot’, tlanankilia Acab. ‘Niknekiya nijkouilis itlal kampa kitoka uvas. San ika, onechijli ika xuelis nechnemakiltis.’

‘Xnexchia’, kijtoua Jezabel. ‘Nejua nikchiuas mamitsmaka.’

Kuakon Jezabel kintlajkuilouilia uejueyixtokej tlakamej, kampa chanti Nabot. ‘Xkimijlikan sekimej tlakamej xkuakualtin makijtokan ika Nabot yokiuijuikalti toTajtsin iuan tekiuaj’, kijtoua. ‘Niman xkixtikan ipan ueyikalpan niman xtemojmotlakan.’

Nimantsin ijkuak Jezabel kimati ika Nabot omik, kijlia Acab: ‘Aman xuiya niman xmotlatkititi itlal’. ¿Xmelak ika noneki Jezabel makitlaxtlaua pampa yokichiuj miyek tlen xkuajli?

Ika yejon, Jehová kititlani se tlakatl itoka Jehú, makitlajyouiltiti. Ijkuak Jezabel kikaki ika Jehú uajlauj, notlapajlotia ixtololouan niman kineki kualtsin manesi. San ika, ijkuak Jehú uajlauj niman konta ipan ventana, kimijlia tlakamej akin nemij ichan tekiuaj: ‘¡Xkuajtlajkalikan!’ Yejuamej tetlakamatij ken tikita ipan tlaixkopinajli. Kontlajkalij, niman yejua miki. Ijkon ipan nochiua Jezabel akin xkuajli iyojlo.

1 Reyes 16:29-33; 18:1-4; 21:1-16; 2 Reyes 9:30-37.