Historia 83

Itepanuan Jerusalén

¡XKITA kenon melak tekitij! Israelitas kichijchiuaj itepanuan Jerusalén. Yopanok 152 xiujtin ijkuak Nabucodonosor okixoxotoni Jerusalén, tepantin niman okintlati ipuertas. Israelitas xnimantsin okichijchiujkej tepantin ijkuak onokuepkej itech Babilonia.

¿Kenon tiknemilia kimachiliaj nochi yejuin xiujtin ika ueyikalpan xkipiya tepantin? Xnemij ika inyojlo. Tla kimixnamikij uelis nimantsin kintlaniskej. San ika, aman tikitaj yejuin tlakatl, Nehemías, kinpaleuijtika israelitas makinchijchiuakan oksejpa itepanuan Jerusalén. ¿Tikmatstika akinon katka Nehemías?

Nehemías se israelita akin ualeua ipan ueyikalpan Susa, kampa chantij Mardoqueo iuan Ester. Yejua tekitiya kampa chanti tekiuaj, ika yejon, kanaj uelis tikijtoskej ika kuajli iuan nouikaya Mardoqueo niman Ester. San ika, Biblia xkijtoua tla Nehemías otekit iuan tekiuaj Asuero, otekit itech akin okitekipatlak, Artajerjes.

Xkilnamiki, tekiuaj Artajerjes kuajli iyojlo pampa okimakak Esdras nochi yejon tomin tlen okitkik Jerusalén niman ijkon makikualtsintili iteopan Jehová. San ika, Esdras xokinyektlali itepanuan Jerusalén tlen youetskaj. Nehemías yejua akin okinyektlali. Matikitakan kenon okichiuj yejuin.

Yopanok 13 xiuitl ijkuak Artajerjes okimakak Esdras tomin ika makikualtsintili teopan. Aman Nehemías yejua akin katlitia tekiuaj. Kimaka vino niman kuajli kita tla xtlaj kipiya tlen uelis kimiktis tekiuaj. Yejuin melak ueyi tekitl.

Se tonajli Hananí ikniuj Nehemías niman oksekimej tlakamej israelitas, uajlauej kuajtlajpalouaj Nehemías. Kijliaj nochi tlen kijyouiyaj israelitas, niman ika itepanuan Jerusalén xnoyektlaliaj. Nehemías melak noyolkokoua, niman kichiuilia teoyotl Jehová.

Se tonajli tekiuaj kita ika Nehemías noyolkokoua, niman kitlajtoltia: ‘¿Tleka timoyolkokoua?’ Nehemías kijlia ika pampa ipan Jerusalén xkuajli tlen nochiujtika niman ika xkinyektlaliaj tepantin. ‘¿Tlenon tikneki?’, kitlajtoltia tekiuaj.

‘Xnechkauili maniuiya Jerusalén’, kijlia Nehemías, ‘niman ijkon manikinyektlaliti tepantin’. Artajerjes melak yolkuajli. Kijlia ika mauiya, niman kipaleuiya makimitki kojtin tlen kitekitiltis ika tlayektlalis. Ijkuak ajsi Jerusalén, Nehemías kimijlia israelitas tlenon kinemilia kichiuas. Yejuamej kuelkakij, niman kijliaj: ‘Matipeuakan matitlayektlalikan’.

Ijkuak akin kintlauelitaj israelitas, kitaj ika itepanuan Jerusalén ikitlejkoltijtokej, yejuamej kijtouaj: ‘Tiaskej, tikinmiktiskej niman xtikinkauiliskej matlachijchiuakan’. Ijkuak kimatij yejuin, Nehemías kinmaka akin tekitij, espadas iuan lanzas niman kimijlia: ‘Maka xkinmakasikan. Xtlaixnamikikan ipampa nemokniuan, nemokoneuan, nemosiuauan niman ipampa nemokaluan’.

Israelitas melak yolchikaujkej. Ika yeuajli niman ika tonajli xkimakauaj tlen ika tlaixnamikiskej, niman tekitij. Ika yejon, ipan 52 tonaltin tlamij kichijchiuaj tepantin. Aman israelitas nemij ika inyojlo. Nehemías iuan Esdras tlamachtia itech itlanauatil toTajtsin, niman israelitas oksejpa pakij.

San ika, Jerusalén xijkon katka ken ijkuak xkinuikayaj israelitas ipan ueyikalpan Babilonia. Intekiuaj persas kinyekana israelitas niman yejuamej kipiya ika kitekichiuiliskej. San ika, Jehová okijto ika kititlanis se yenkuik tekiuaj, niman yejuin kichiuas maonia yolseuilistli ipan ikalpan. ¿Akinon yejuin tekiuaj? ¿Kenon kichiuas maonia yolseuilistli ipan tlaltikpaktli? Panouaj kanaj 450 xiujtin ijkuak kuajli nasikamati yejuin. Kuakon panoua tlen melak kualtsin, tlakati se konetsintli. San ika, yejuin sakin tikitaskej.

Nehemías, tlaxeloltin uejueyimej 1 ontlami ipan 6.