Historia 82

Mardoqueo niman Ester

MATIKITAKAN aman tlenon opanok, seki xiujtin ijkuak Esdras xiaya Jerusalén. Mardoqueo iuan Ester, yejuamej israelitas akin uejueyixtokej ipan tekiuajyotl Persia. Mardoqueo noijki ueyixtika maski xijkon ken tekiuaj, niman iprima akin itoka Ester yejua isiuauj tekiuaj. Matikitakan kenon opanok yejuin.

Itajuan Ester omijkej ijkuak pitentsin katka, ika yejon Mardoqueo okiskalti. Asuero, intekiuaj persas, kipiya ikal ipan ueyikalpan Susa, niman Mardoqueo yejua se itekipanojkauj. Se tonajli, isiuauj tekiuaj akin itoka Vasti, xkitlakamati, kuakon tekiuaj kitlapejpenia okse isiuauj. ¿Tikmatstika akinon kitlapejpenia? Kema, se kualtsin ichpochtli itoka Ester.

¿Tikita yejuin tlakatl akin noueyimati, akin ixpan notlakuanketsaj tlaltikpakchanejkej? Itoka Hamán, se tlakatl akin ueyixtika ipan Persia. Yejua kineki ika Mardoqueo, akin ompa yeuatika, noijki manotlakuanketsa. San ika, Mardoqueo xkichiua, kinemilia ika xkinamiki timotlakuanketsas ixpan se tlakatl akin xkuajli. Hamán melak kualani. Matikitakan tlen kichiua.

Hamán kijlia tekiuaj tlen xmelauak itech israelitas. ‘Yejuamej xkuakualtin niman xkitlakamatij motlanauatiluan’, kijtoua. ‘Kipiya ika mikiskej.’ Asuero xkimati ika isiuauj noijki israelita. Ika yejon, kikaki Hamán, niman kijkuilouaj se tlanauatijli kampa kijtoua kemanon kinmiktiskej nochimej israelitas.

Ijkuak Mardoqueo kikaki itech yejuin tlanauatijli, melak najmana. Kititlani yejuin tlajtojli itech Ester: ‘Xnotsa tekiuaj niman xtlajtlanili matechmakixti’. Itlanauatil persas kijtoua ika xakaj uelis yas kampa tekiuaj tla xkinotsa. San ika, Ester yauj maski xkinotsaj. Tekiuaj kiteketsa itlakouj tlachijchiujtli ika oro, tlen kijtosneki ika maka makimiktikan. Ester kinotsa tekiuaj niman Hamán iuan matlakuatij. Ompa tekiuaj kitlajtoltia Ester tlenon kineki makichiua. Ester kijlia tekiuaj ika tla uajmostla yejua niman Hamán oksejpa yaskej ontlakuaskej, kuakon kijlis.

Ijkuak ompa nemij, Ester kijlia tekiuaj: ‘Kimiktiskej nochimej nochanikniuan niman noijki nejua’. Tekiuaj kualani. ‘¿Akinon kineki kichiuas yejuin?’, kitlajtoltia.

‘¡Yejuin xkuajli tlakatl Hamán, akin techtlauelita!’, kijtoua Ester.

Aman tekiuaj melak kualani. Tlanauatia makimiktikan Hamán. Sakin, tekiuaj kitlalia Mardoqueo kentla se akin ueyixtika maski xijkon ken yejua. Kuakon, Mardoqueo kichiua manotlali okse tlanauatijli tlen kinkauilia israelitas matlaixnamikikan niman ijkon maka makinmiktikan ipan tonajli tlen yonoijto. Aman ika Mardoqueo melak ueyixtika, miyekej tlaltikpakchanejkej kinpaleuiyaj israelitas, niman yejuamej makisaj.

Ester, tlaxeloltin uejueyimej 1 ontlami ipan 10.