Xtlaj okichiuj manotlakuanketsakan
Historia 77
Xtlaj okichiuj manotlakuanketsakan
¿TIKIMILNAMIKI yejuin yeyimej telpokamej? Kema, yejuamej akin Daniel imiuan nouika akin xokinejkej kikuaskej tlen xkuajli yeskia. Babilonios kintokayotiaj Sadrac, Mesac niman Abednego. San ika, xkimita. ¿Tleka yejuamej xnotlakuanketsaj ijkon ken oksekimej? Matikitakan tleka xkichiuaj.
¿Tikimilnamiki tlanauatiltin tlen Jehová okimijkuilo, tlen noixmatij kentla Majtlaktli Tlanauatiltin? Kachtopa tlanauatijli kijtoua: ‘Xkipiya tikinueyichiuas oksekimej tajtsitsintin, san nejua’. Nikan nesi kenon telpokamej kitlakamatij yejuin tlanauatijli, maski uelis kinmiktiskej.
Nabucodonosor yejua akin tekiuajti ipan Babilonia, okiminnots miyekej tlaltikpakchanejkej akin uejueyixtokej, pampa kineki makiueyichiuakan itajtsin tlen okichijchiuj. Okimijli nochimej tlaltikpakchanejkej: ‘Ijkuak nenkikakiskej kinpitsaskej kuakoujtin, kitsotsonaskej arpas iuan oksekimej tlatsotsonaltin, xmotlakuanketsakan niman aman xueyichiuakan yejuin tlen tlamachijchiujtli ika oro. Akin xnotlakuanketsa nion xkiueyichiua, kontlajkaliskej nimantsin ijtik horno tlen tlikuitika’.
Ijkuak Nabucodonosor kikaki ika Sadrac, Mesac iuan Abednego xnotlakuanketsaj, melak kualani. Tlatitlani makinuajuikakan kampa yejua nemi. Oksejpa kimijlia ika manotlakuanketsakan. San ika, telpokamej tlaneltokaj itech Jehová. ‘ToTajtsin akin tiktekichiuiliaj uelis techmakixtis’, kijliaj. ‘Niman tla xkichiua, xtotlakuanketsaskej ixpan motajtsin tlen otikchijchiuj ika oro.’
Ijkuak kikaki yejuin, Nabucodonosor melak tlauelmiki. Nisiu onka se horno, niman tlanauatia: ‘¡Xotlaltikan horno chikometipan xijkon ken kachtopa xotlatoya!’ Kuakon kinnauatia isoldados akin melak chikaujkej makinsalokan Sadrac, Mesac iuan Abednego niman kimijlia makomintlajkalikan ijtik horno. Pampa horno melak totonki, soldados chikaujkej, akin kichiuaj yejon, mikij. San ika, ¿tlenon inpan nochiua yeyimej telpokamej akin komintlajkalij ijtik horno?
Ijkuak tekiuaj ontlachia ijtik horno, melak nomojtia. ‘¿Xyeyimej katkaj akin otikinsalojkej niman otikomintlajkalkej ijtik horno tlen tlikuitika?’, tetlajtoltia.
‘Kema, ijkon otikchiujkej’, kinankiliaj itlakeualuan.
‘San ika, nejua nikimita nauimej tlakamej akin nejnentinemij ipan tlitl’, kijtoua yejua. ‘Xsaliujtokej, nion xtlatlaj. Niman yejon okse tlakatl tlachia kentla se iluikaktekitketl.’ Tekiuaj nonisiuiya itempan horno niman tsajtsi: ‘¡Sadrac! ¡Mesac! ¡Abednego! ¡Xkisakan, itekipanojkauan toTajtsin akin Ueyixtika!’
Ijkuak kisaj, nochimej kitaj ika xtlaj inpan onochiuj. Kuakon tekiuaj kijtoua: ‘¡Ueyixtika inTajtsin Sadrac, Mesac niman Abednego! Okuajtitlan iiluikaktekitkauj akin okinmakixti pampa xonotlakuanketskej ixpan notajtsin nion xokiueyichiujkej, san akin yejuamej inTajtsin kiueyichiuaj’.
¿Xmelak ika noneki tiyolmelaujkanemiskej itech Jehová ijkon ken yejuamej?
