Historia 51

Rut iuan Noemí

IPAN Biblia tiknextis se amoxtli itoka Rut. Nikan techijlia itech se familia akin onenkej ijkuak israelitas okipixkej jueces. Rut se ichpochtli akin chanti ipan se país itoka Moab; yejua xualeua itech ikalpan toTajtsin, Israel. San ika, ijkuak Rut kixmati Jehová, toTajtsin akin melauak, melak kitlasojtla. Noemí yejua se lamajtsin akin okipaleui Rut makixmati Jehová.

Noemí se israelita. Yejua, iueuentsin iuan omemej ikoneuan, onochantitoj Moab ijkuak xonkatka tlakuajli ipan Israel. Se tonajli, iueuentsin Noemí omik. Sakin, ikoneuan Noemí ononamiktijkej iuan omemej moabitas intoka Rut niman Orpá. Opanok kanaj majtlaktli xiuitl, ikoneuan Noemí omijkej. ¡Melak teyolkoko tlen opanok! ¿Aman tlenon kichiuas Noemí?

Oyejkok tonajli ijkuak Noemí okinemili nokuepas kampa chantij ichanejkauan, maski melak uejka. Rut niman Orpá kinekij iuan nemiskej, niman iuan yauej. Ijkuak uejka yayaj, Noemí kimijlia ichpokamej: ‘Xiakan nemochan niman xmokauakan iuan nemonanuan’.

Noemí kinnapaloua niman kimijlia mauiyan. Yejuamej peuaj chokaj, pampa melak kitlasojtlaj Noemí. Kijtouaj: ‘¡Ka! Tejuamej tiaskej mouan kampa nemij mochanejkauan’. Noemí kinnankilia: ‘Nemejuamej kipiya ika nemokuepaskej, nokoneuan. Melak kuajli ninnemiskej kampa nemochanejkauan’. Kuakon Orpá nokuepa kampa chanti. San ika, Rut xiauj.

Noemí kijlia: ‘Orpá yoyaj. Noijki iuan xuiya’. San ika, Rut kinankilia: ‘¡Maka xnechijli manimitskaujteua! Xnechkauili mouan maniuiya. Kampa tejua tias, nejua noijki nias, niman kampa tejua tichantis ompa nichantis. Mokalpan, nokalpan yes, niman moTajtsin noijki noTajtsin yes. Kampa tejua timikis ompa nimikis, niman ompa nechtokaskej’. Ijkuak Rut kijtoua yejuin, Noemí xok kijlia tla mauiya.

Kuakon yejuin omemej ajsij ipan kalpan Israel. Ompa nochantiaj. Rut nimantsin peua tekiti, pampa yoyejkok tonajli ijkuak kipixkaj cebada. Se tlakatl itoka Boaz (Booz) kikauilia makipixka cebada ipan itlaluan. ¿Tikmatstika akinon inan Boaz? Rahab, akin chantiya ipan ueyikalpan Jericó.

Se tonajli Boaz kijlia Rut: ‘Miyek yoniktekakili motech, niman kenon melak yotikpaleui Noemí. Nikmatstika ika otikuajkaujteuj motaj, monan, mopaís niman otiuajla otichantiko ipan se kalpan tlen xtikixmatiya. ¡Nikneki Jehová noijki mamitspaleui!’

Rut kinankilia: ‘Tejua melak yotinechpaleui, noteko. Yotikchiuj kuajli manikmachili ika nochi tlen yotinechijli’. Boaz kiyolpaktia tlen kichiua Rut, xuejkaujtipan panoua niman nonamiktiaj. ¡Yejuin kiyolpaktia Noemí! San ika, Noemí melak yolpaki ijkuak Rut niman Boaz kipiyaj kachtopa ikoneuj, itoka Obed. Sakin, Obed okipix se ixuiuj itoka David; itech David tomachtiskej ika tlayekapan.

Rut, tlaxeloltin uejueyimej 1 ontlami ipan 4.