Historia 42

Se siuapoloko tlajtoua

¿TIKITANI se poloko matlajto? ‘Ka.’ Kanaj tejua tikijtoua: ‘Yolkamej xtlajtouaj’. Biblia kijtoua ika se siuapoloko otlajto. Matikitakan kenon opanok.

Israelitas ikalakiskiaj ipan país itoka Canaán. Balac, akin tekiuajti itech Moab, kinmakasi israelitas. Ika yejon, tlatitlani makitejtemotij se tlakatl tlamachilise itoka Balaam niman ijkon makijto tlen xkuajli inpan manochiua israelitas. Okijli kimakas miyek tomin, kuakon Balaam tlejkoua ipan siuapoloko niman yauj itech Balac.

Jehová xkineki Balaam ijkon makichiuili ikalpan. Ika yejon, kititlani se iiluikaktekitkauj ika se espada ueyak niman makitsakuili Balaam ipan ojtli. Balaam xueli kita iluikaktekitketl, san ika, iyolkauj kema kita. Kuakon iyolkauj kiyejyekoua kitlalkauis iluikaktekitketl niman pampa xueli kitlalkauiya, noteka ipan ojtli. Balaam melak kualani, niman kiuiteki ika se tlakotl.

Jehová kichiua Balaam makikaki ijkuak tlajtoua iyolkauj, niman kitlajtoltia: ‘¿Tleka tinexuiteki, itlaj onimitschiuili?’

Balaam kinankilia: ‘¡Yotinechpinaujti! ¡Tla nikpiyaskia se espada nimitsmiktiskia!’

‘¿Kemanon ijkon onimitschiuili?’, kitlajtoltia iyolkauj.

‘Xkeman’, kinankilia Balaam.

Kuakon Jehová kikauilia Balaam makita se iluikaktekitketl ika iespada notelketstika ipan ojtli. Iluikaktekitketl kijlia: ‘¿Tleka yotikuitek moyolkauj? Oniuajla onimistsakuiliko, pampa xkipiya ika tias tikonijtos tlen xkuajli inpan manochiua israelitas. Tla moyolkauj xnechtlalkauiskia nimitsmiktiskia, niman yejua xtlaj nikchiuiliskia’.

Balaam kijtoua: ‘Yonitlajtlako. Xnikmatiya tla tinemiya ipan ojtli’. Kuakon iluikaktekitketl kikauilia Balaam mauiya, niman Balaam yauj konita Balac. Ok kiyejyekoua kijtos tlen xkuajli inpan manochiua israelitas, san ika, Jehová kichiua Balaam yexpa makiteochiua Israel.

Números 21:21-35; 22:1-40; 23:1-30; 24:1-25.