Kenon uelis tinemis nochipa
Historia 116
Kenon uelis tinemis nochipa
¿TIKMATSTIKA tlenon kipoujtika yejuin ichpochtsintli imiuan akin nouika? Kema, yejuin amoxtli tlen tejua tikpoujtika... Noamox historias tlen uajlauej ipan Biblia. Niman noijki kipoujtokej yejuin historia... “Kenon uelis tinemis nochipa”.
¿Tikmatstika tlenon nomachtiaj? Kachtopa, ika noneki tomachtiskej itech Jehová iuan ikoneuj, Jesús, niman ijkon tinemiskej nochipa. Biblia kijtoua: ‘Yejuin ojtli teuika itech nemilistli tlen xkeman tlamis. Xmomachti san itech akin yemelak toTajtsin, niman itech ikoneuj, Jesucristo’.
¿Kenon uelis tomachtiskej itech toTajtsin Jehová niman itech ikoneuj, Jesús? Se, tla tikpoua Noamox historias tlen uajlauej ipan Biblia. Yejuin amoxtli kijtoua miyek tlemach itech Jehová niman Jesús, ¿xmelak? Niman kijtoua tlenon miyek tlemach yokichiujkej niman tlen kichiuaskej tlayekapan. San ika, noneki tikpouaskej okse amoxtli.
¿Tikita yejon okse amoxtli tlen onka ipan tlajli? Yejua Biblia. Xkijli yakaj mamitspouili itech Biblia kampa onokixtijkej historias tlen kipiya yejuin amoxtli. Biblia techijlia tlenon noneki tikchiuaskej tla tiknekij tiktekichiuiliskej toTajtsin ken yejua kineki, niman ijkon tikpiyaskej nemilistli tlen xkeman tlamis. Ika yejon, noneki tomatiskej tikpouaskej Biblia.
San ika, xsan noneki tiueliskej itech toTajtsin Jehová niman Jesucristo. Maski tikmatiskej miyek itech yejuamej niman tlen temachtiaj, xtikseliskej nemilistli tlen xkeman tlamis. ¿Tikmatstika tlenon okse noneki?
Noijki noneki tikchiuaskej tlen tomachtiaj. ¿Tikilnamiki Judas Iscariote? Yejua noijki teuan katka itech 12 itlatitlankauan Jesús. Judas kimatiya miyek itech Jehová niman Jesús. San ika, ¿tlenon ipan onochiuj? Sakin yejua opeuj kileuiya tomin niman okinemakak Jesús ika 30 platajtomin. Judas xkiselis nemilistli tlen xkeman tlamis.
¿Tikilnamiki Guehazí, itech akin otiuelkej ipan Historia 69? Yejua okinek kipiyas tlakentli niman tomin tlen xitlatki katka. Pampa kinekiya kipiyas yejuin tlemach, otekajkayauj, niman Jehová okikauili matlajyoui. Noijki ijkon topan nochiuas tla xtiktlakamatij itlanauatiluan.
San ika, nemij miyekej tlaltikpakchanejkej akin okitekichiuilijkej Jehová niman xokikaujkej. Tiknekij tikchiuaskej ken yejuamej, ¿xmelak? Telpokatsin Samuel, melak kuajli tlen tiuelij itech yejua. Xkilnamiki, ken otikitakej ipan Historia 55, yejua san kipiaya naui noso makuijli xiuitl ijkuak opeuj kitekichiuilia Jehová ipan itabernáculo. Ika yejon, maski tejua san titelpokatsin uelis tiktekichiuilis toTajtsin.
Kema, tinochimej tiknekij tikchiuaskej ijkon ken Jesucristo. Ijkuak yejua pitentsin katka, ken techititia ipan Historia 87, nemiya ipan teopan niman tlajtouaya iuan oksekimej itech iTaj akin iluikakchanej. Matikchiuakan ijkon ken yejua. Matitlajtokan iuan oksekimej tlaltikpakchanejkej itech toTajtsin Jehová niman ikoneuj, Jesucristo. Tla tikchiuaj nochi yejuin, uelis tinemiskej nochipa ipan yenkuik xochitlalpan tlen toTajtsin kitlalis ipan tlaltikpaktli.
