Historia 97

Jesús kalaki kentla tekiuaj

SAKIN ijkuak yokinpajtijka omemej akin xtlachiayaj, Jesús uajlauj ipan se kalpan pitentsin nisiu Jerusalén. Kimijlia omemej inomachtijkauan: ‘Xuiyan kalpan niman nenkinextiskej se polokokonetl. Xtotomakan niman xnechuajuikilikan’.

Ijkuak kuajuikiliaj poloko, Jesús ipan tlejkoua niman yauj Jerusalén, tlen xuejka nokaua. Ijkuak nonisiuiya kampa ueyikalpan, miyekej kuajseliaj. Tlaltikpakchanejkej nokixtiliaj tlen ika notejkuiyaj niman kinsouaj ipan ojtli. Oksekimej kintlaliaj soyamej, niman tsajtsij: ‘¡ToTajtsin Jehová makiteochiua akin okuajtitlan!’

Yeuejkaui, ipan Israel kalakiyaj yenkuikej tekiuajkej ipan Jerusalén ipan se poloko, niman ijkon noteixpantiayaj. Yejon tlen kichiua Jesús. Niman yejuin tlakamej kiteititiaj ika kinekij matekiuajti Jesús. San ika, xnochimej kinekij. Ijkon tikitaj itech tlen panoua ijkuak Jesús yauj teopan.

Ipan teopan, Jesús kinpajtia akin xtlachiaj niman sepoujtokej. Ijkuak kokonej kitaj yejuin, kiueyiliaj Jesús. San ika, yejuin kinkualania teopixkej, niman kijliaj Jesús: ‘¿Tijkaki tlen kokonej kijtouaj?’

‘Kema’, kijtoua Jesús. ‘¿Xkeman nenkipouaj ipan Biblia kampa kijtoua: “Itech inkamak kokonej toTajtsin kichiuas makiueyitlalikan?”’ Ika yejon, kokonej kiueyitlaliaj akin toTajtsin okitlali kentla tekiuaj.

Tejuamej tikneki tikchiuaskej kentla yejuin kokonej, ¿xmelak? Uelis seki tlaltikpakchanejkej kinekiskej kichiuaskej maka matitlajtokan itech itekiuajyo toTajtsin. San ika, tejuamej xtijkajkauaskej tikinnojnotsaskej itech tlemach tlen kualtsin kichiuas Jesús ipampa tlaltikpakchanejkej.

Ijkuak Jesús nemiya ipan tlaltikpaktli, xniman peuaskia tekiuajtiskia. Kuakon, ¿kemanon yeskia? Inomachtijkauan kinekiyaj kimatiskej. Aman matikitakan yejuin.

Mateo 21:​1-​17; Juan 12:​12-​16.