IJKUAK omik Sansón, onen se juez niman teotlajtoketl ipan Israel itoka katka, Samuel. Pampa israelitas kinekiyaj yeskiaj ken oksekimej uejueyimej kalpamej, okijlikej ika kinekiyaj se tekiuaj. Maski Jehová okiyolkoko tlen okitlajtlankej, okichiuj tlen yejuamej kinekiyaj niman okinauati Samuel makitlali Saúl kentla tekiuaj. Yejua katka se tlakatl yolyemanki, san ika, opanok xiujtin niman opeuj noueyineki niman xokitlakamat toTajtsin. Kuakon Jehová xok okiseli niman okijli Samuel makitlali se telpochtli itoka David akin kitekipatlaskia Saúl. Maski panoskia miyek xiujtin ijkuak nochiuaskia tekiuaj.

Se tonajli, David okimitato ikniuan, akin noijki teuan isoldados katkaj Saúl. Ijkuak oajsik okiminextijtasik soldados kuekuetlakatokej pampa nomojtiayaj. ¿Tlenon panouaya? Se soldado chanej Filistea melak uejkapan itoka Goliat, kinpipinaujtijtoya niman kinuejuetskilijtoya soldados israelitas niman toTajtsin. David melak okualan niman okinek kixnamikis, maski yejua san se telpochtsintli katka. Ika matematlatl niman san seki temej, okixnamikito yejon tlakatl akin kanaj yeyi metros ika uejkapan katka. Goliat san okiuejuetskili, san ika David okijli ika tetlanis, pampa kipiaya itlapaleuilis Jehová. San se tetl ika okimikti. Sakin okikixtili iespada niman okikechtek. Ijkuak oksekimej soldados filisteos okitakej, onomojtijkej niman ocholojkej.

Pampa tekiuaj Saúl okimojkaitak iyolchikaualis David, okimakak se ueyi tekitl itech isoldados. Ika tetlaniya yejon telpochtli, Saúl okinexikolitak niman opeuj kineki kimiktis. Pampa xkinekiya mikis David ocholoj. Niman maski miyek xiujtin san niyantinemiya, nochipa okitlakaitak Saúl. ¿Tleka? Pampa kimatstoya ika Jehová okitlali kentla tekiuaj. Sakin Saúl omik ipan guerra. Kuakon, David okitlalijkej kentla yenkuik tekiuaj, ijkon ken Jehová yokijtoka kichiuaskia.

David kinekiya kichijchiuilis Jehová se teopan. San ika, toTajtsin okijli ika xyejua yeskia, pampa semej ikoneuan kichiuaskia yejon tekitl. Salomón yejua akin kichijchiuaskia. Jehová okimakak David okse ueyi tlateochiualistli: iuan onotlajtolkauj niman okijli ika yejua kachtopa yeskia tekiuaj itech tekiuajyotl kampa san ichanejkauan tekiuajtiskiaj. Xok oniaskia okse tekiuajyotl ijkon. Niman ompa uajnemiskia Temakixtijketl akin toTajtsin yokijtoka ipan Edén ika uajlaskia. Yejon tlakatl yeskia Mesías, kijtosneki, akin Jehová okitlapejpeni matlayekana ipan iTekiuajyo tlen xkeman popoliuis.

Pampa David kitlasojkamachiliaya Jehová, okisentlali nochi tlen notekitiltiskia: kualtsin tepostli kentla oro iuan plata niman okseki tlemach tlen ika kichijchiuaskiaj teopan. Noijki ika espíritu santo okijkuilo miyek salmos noso tlakuikaltin. Ijkuak ximikiya David, okijto: “Iespíritu [santo] toTajtsin otlajto nopampa, niman itlajtol onkatka ipan nonenepil” (2 Samuel 23:2).

(Onokixti itech 1 Samuel, 2 Samuel, 1 Crónicas, Isaías 9:7, Mateo 21:9, Lucas 1:32 niman Juan 7:42.)