IJKUAK tlaltikpakchanejkej opeujkej miyekiyaj ipan tlaltikpaktli, tlajtlakojli niman tlen xkuajli opeuj nosemoyaua nochiuiyan. Enoc, akin kanaj iselti kitekichiuiliaya toTajtsin ipan tlaltikpaktli, okijto ika Jehová kimpopoloskia nochi akin xkuakualtin. San ika xokikakisnejkej tlen okimijli, pampa omiyekiyak tlen xkuajli. Niman noijki onenkej iluikaktekitkej akin xokitlakamatkej Jehová, okuajkaujteujkej imintekiyo iluikak, niman onokuepkej tlakamej niman ononamiktijkej iuan miyekej siuamej. Pampa xkuajli ika onotekakej iuan siuamej, ijkuak okinpixkej inkoneuan onemikoj tlakamej uejkapamej tlen okintokayotijkej nefilim, niman xakaj nemiya ijkon makojtik ken yejuamej niman okipeualtijkej maonia tlen xkuajli. ¿Uelis tiknemilis kenon noyolkokouaya toTajtsin ijkuak okitak kenon melak xkuajli nemiyaj tlaltikpakchanejkej?

Ijkuak omik Enoc onen okse kuajli tlakatl: Noé. Yejua niman ichanejkauan okichiujkej nochi tlen ouelkej niman ijkon okiyolpaktijkej toTajtsin. Se tonajli, Jehová okijto kuajkuis se apachiuilistli niman ijkon kimpopolos nochi akin xkuakualtin. San ika, xkinekiya mamiki Noé nion yolkamej. Kuakon okijli makichijchiua se akajli, kentla, se caja ueyak. Yejua niman ichanejkauan ompa nopaleuiskiaj niman kinkalaktiskiaj miyekej yolkamej. Noé okitlakamat toTajtsin niman ouejkauj kanaj cuarenta noso cincuenta xiujtin ika okichijchiuj akajli. Ipan yejon tonaltin noijki “okiteijli ken ijki se uelis kuajli nouikas ken noneki” (2 Pedro 2:5) Okimijli tlaltikpakchanejkej ika uajlaskia se Apachiuilistli, san ika, xakaj okikak. Oyejkok tonajli ijkuak Noé niman ichanejkauan okalajkej ijtik akajli iuan yolkamej. Kuakon, toTajtsin okitsak puerta, niman opeuj kiyaui.

Yejon chikauak kiyaujtli, tlen ouejkauj cuarenta tonaltin niman cuarenta yeuajli, okiapacho nochi tlaltikpaktli. Nochi xkuakualtin omijkej. Ken opanotia metstin, nochi atl opeuj temoua niman akajli osaliuj ipan se tepetl. Ijkuak Noé niman ichanejkauan ouelkej okiskej, yopanoka se xiuitl. Pampa Noé okitlasojkamat, okimakak Jehová se uentli. ToTajtsin okimijli ika xok keman kipopoloskia tlen yoltika ipan tlaltikpaktli ika se apachiuilistli. Ika se akosamalotl okititi ika xok kichiuaskia. Nochipa ijkuak kitaskiaj, kilnamikiskiaj tlen okijto toTajtsin.

Sakin ijkuak opanok Apachiuilistli, toTajtsin okiminmakak yenkuik tlanauatiltin. Xokiminkauili makikuakan inyesyo yolkamej, san iminakayo. Noijki okiminauati tlaltikpakchanejkej manochayauakan ipan nochi tlaltikpaktli. San ika, sekimej xokitlakamatkej, pampa onosentlalijkej ipan se ueyikalpan niman opeujkej kichijchiuaj se torre uejkapan, okinyekan akin kitokayotiayaj Nemrod. ToTajtsin xokinkauili. ¿Kenon okichiuj? Akin chantiyaj ipan yejon ueyikalpan —tlen itoka katka Babel, niman sakin okitokayotijkej Babilonia— okichiuj matlajtokan tlatlamantik noso sesejneka tlajtoltin. Ika xonasikamatkej, okikajkaujkej tlen kichijchiujtoyaj niman onochajchayaujkej.

(Onokixti itech Génesis itlaxeloluan uejueyimej 6 ontlami 11 niman Judas 14, 15.)