Jehová okichijchiuj se kualtsin xochitlalpan, okitlali kampa itoka katka Edén. Yejuin xochitlalpan tentoya ika xochimej, kojtin niman yolkamej. Sakin, toTajtsin okichijchiuj kachtopa tlakatl, Adán, ika tlajli niman okiyekailpits. ¿Tikmati tlenon opanok? ¡Tlakatl oyoliuj! Jehová okijli Adán makitlajpiya xochitlalpan niman makintlalili intoka nochimej yolkamej.

Jehová okimakak Adán se ueyi tlanauatijli. Yejua okijli: “Itech nochi kojtin uelis tijkuas itlakilyo, san itech se maka tijkuas, pampa melak tlasojti. Tla tijkua itlakilyo, timikis”.

Sakin Jehová okijto: “Nikchijchiuilis akin makipaleui Adán”. Kuakon, okichiuj ika Adán melak makochi niman ika se iyelchikiuj okichijchiuili isiuauj. Itoka katka Eva. Adán iuan Eva onochiujkej  kachtopa familia. ¿Kenon onomachili Adán ijkuak okitak isiuauj? Ika pakilistli, okijto: “¡Xkita tlen toTajtsin okichijchiuj ika noyelchikiuj! ¡Aman kema! Yejua ijkon ken nejua”.

Jehová okimijli Adán iuan Eva makinpiyakan inkoneuan niman ijkon makitemiltikan tlaltikpaktli. Yejua kinekiya mapakikan ijkuak tekitiskiaj san sekan, nochi tlaltikpaktli kikuepaskiaj se kualtsin xochitlalpan, ijkon ken ipan Edén. San ika, xijkon opanok. ¿Tleka? Tiueliskej ipan okse tlamachtijli.