Okse akin otekiuajtik ipan Babilonia, katka Darío akin medo. Okitak ika Daniel xkatka ken oksekimej. Kuakon, okichiuj ika Daniel makinyekana akin ueyixtoyaj ipan itekiuajyo. Yejuin tlakamej kinexikolitayaj Daniel niman kinekiyaj kimiktiskej. Kimatstoyaj ika ipan se tonajli yexpa kichiuiliaya teoyotl Jehová, kuakon okijlikej Darío: “Totekiuaj, kimelaua maonia se tlanauatijli tlen makijto ika nochimej san tejua mamitschiuilikan teoyotl. Tla yakaj xkitlakamati tlanauatijli makontlajkalikan kampa tlakoyonkan kampa kinpiyaj miyekej leones”. Darío okuelkak yejon tlajtoltin niman okitlali yejon tlanauatijli.

Ijkuak Daniel okikak yejon yenkuik tlanauatijli, oyaj ichan. Ixpan se ventana tlen tlapoujtoya, onotlakuankets niman okichiuili teoyotl Jehová. Tlakamej akin kinexikolitayaj okalajkej ichan niman okinextitasikej kichiujtok teoyotl. Kuakon onotlalojkej okijlitoj Darío: “Daniel xmitstlakamatstika. Mojmostla yexpa kichiuilia teoyotl iTajtsin”. Darío kuajli iuan nouikaya Daniel niman xkinekiya makimiktikan. Nochi tonajli kinemilijtoya kenon kimakixtis, san ika, nion yejua xueliskia kipatlaskia tlanauatijli tlen yokitlalijka. Kuakon otlanauati  makontlajkalikan Daniel kampa tlakoyonkan kampa nemij leones tlen melak temomojtikej.

Ipan yejon yeuajli, Darío melak najmantoya ipampa Daniel niman xueliya kochiya. Uajmostla ika kualkan onotlalo kampa okontlajkalkej niman okontsajtsili: “Daniel, ¿omitsmakixti moTajtsin?”.

Darío okikak se tlajtojli. ¡Katka Daniel! Yejua okinankili: “Iiluikaktekitkauj noTajtsin okinkamatsauk leones, ijkon xtlaj onexchiuilijkej”. ¡Darío melak opak! Otlanauati makikixtikan kampa nemiya. Daniel xtlaj ipan onochiuj. Kuakon, tekiuaj otlanauati: “Xkomintlajkalikan kampa tlakoyonkan tlakamej akin okiteixpantijkej Daniel”. Ijkuak okomintlajkalkej, leones nimantsin okinkuajkej.

Darío okimakak ikalpan yejuin tlanauatijli: “Nemochimej kipiya ika nenkitlakaitaskej iTajtsin Daniel. Yejua okimakixti itech leones”.

¿Tikchiuilia teoyotl Jehová mojmostla ijkon ken Daniel?