Jehová okinmakak israelitas jueces akin kinyekanaskiaj, san ika, yejuamej kinekiyaj se tekiuaj. Ijkuakon okijlikej Samuel: “Nochimej kalpamej tlen onka toyeualiyan kipiyaj tekiuajkej. Tejuamej noijki tiknekij se”. Samuel okitak ika yejon xkuajli katka, kuakon okichiuili teoyotl Jehová. Niman Jehová okinankili: “Xtejua mitsixnamikij, nejua akin nechixnamikij. Xkimijli ika kipiyaskej se tekiuaj, san ika, tekiuaj kintlajtlanilis miyek tlemach”. San ika, kalpan okijto: “¡Maski! ¡Tiknekij se tekiuaj!”.

Jehová okijli Samuel ika se tlakatl akin itoka katka Saúl yeskia kachtopa tekiuaj. Ijkuak Saúl okitlajpaloto Samuel ipan Ramá, Samuel okiteititi ika okitlapejpeni Saúl ken tekiuaj, ijkuak okitoyauili tlen chiauak ipan itsontekon.

Sakin, Samuel okinsentlali israelitas makixmatikan yenkuik tekiuaj. San ika, xkanaj kinextiayaj Saúl. ¿Tikmati tleka? Pampa niyantoya kampa tlayejyeualo. Ijkuak okinextitoj Saúl, okuajkixtijkej niman okitelketskej itlajkotian kalpan. Saúl melak uejkapan xijkon ken oksekimej niman melak kualtsin katka. Samuel okijto: “Xkitakan akin Jehová okitlapejpeni”. Niman kalpan chikauak okijto: “¡Uejkaujtipan manemi totekiuaj!”.

Kachtopa, tekiuaj Saúl kikakiya Samuel niman kitlakamatiya Jehová. San ika, sakin onopatlak. Se tonajli, Samuel okijli Saúl makichia pampa yejua tlauentlaliskia. Tekiuaj xkipiya ika tlauentlalis, san ika, pampa Samuel xnimantsin oyejkok, Saúl otlauentlali. ¿Tlenon okichiuj Samuel? Yejua okijli: “Nonekiya tiktlakamatis Jehová niman xotikchiuj”. ¿Itlaj ueliskia Saúl ipampa tlen xkuajli okichiuj?

Sakin, ijkuak Saúl okimixnamikito amalequitas, Samuel okijli Saúl ika nochimej makinmikti. San ika, Saúl xokimikti tekiuaj Agag. Jehová okijli Samuel: “Saúl yonechkauj niman xok nechtlakamati”. Samuel melak onoyolkoko niman okijli Saúl: “Pampa tejua xok tiktlakamati Jehová, yejua kitlapejpenis okse tekiuaj”. Ijkuak Samuel iyajtoya, Saúl  okikitski niman okikotonili itenko itlaken. Kuakon Samuel okijli Saúl: “Ijkon ken otijkoton notlaken, Jehová mitskixtilis motekiuajyo”. Jehová okse kimakaskia itekiuajyo akin kema kitlasojtlaskia niman kitlakamatiskia.