Jehosafat tekiuaj ipan Judá, okinxoxotoni miyek tlaixpan kampa kiueyichiuayaj Baal niman tajtsitsintin kampa tlanauatiaya. Jehosafat kinekiya ika tlaltikpakchanejkej makixmatikan itlanauatiluan Jehová. Ika yejon, okinnauati tlayekankej niman levitas matemachtikan itlanauatiluan Jehová ipan nochi Judá.

Kalpamej tlen nisiuj onkatkaj kimakasiyaj kixnamikiskej Judá pampa kimatstoyaj ika Jehová kinpaleuiyaya. Yejuamej hasta kitkiliayaj tetlayokoliltin tekiuaj Jehosafat. San ika, moabitas, ammonitas niman oksekimej akin ualeuayaj Seír okixnamikitoj Judá. Jehosafat kimatstoya ika nonekiskia makinpaleui Jehová. Okinsentlali nochimej tlakamej, siuamej niman kokonej ipan Jerusalén. Imixpan okichiuj teoyotl niman okijto: “Jehová, tla xtouan tinemi xuelis titetlaniskej. Timitstlajtlaniliaj xtechijli tlenon tikchiuaskej”.

Jehová okikak iteoyouj niman okinankili: “Maka xmomojtikan. Nimechpaleuis. San xijkatokan, maka itlaj xchiuakan, niman xkitakan kenon nimechmakixtis”. ¿Kenon kinmakixtiskia Jehová?

Uajmostla, Jehosafat okintlapejpeni akin nokuikatiayaj niman okimijli mauiyan inyekapan akin tlaixnamikiskiaj. Yejuamej okiskej itech Jerusalén niman oyajkej kampa itoka katka Tecoa pampa tlaixnamikiskiaj.

Ijkuak Jehová tlaixnamiktoya ipampa ikalpan, akin kikuikatlaliliayaj chikauak kakistiya kenon ika pakilistli kiueyichiujtoyaj. Yejua okichiuj ika ammonitas niman moabitas manoixnamikikan, nion se xomakis. San ika, Jehová okimakixti ikalpan, akin tlaixnamikiyaj niman teopixkej. Nochimej kalpamej tlen nisiuj nokauayaj okimatkej itech tlen okichiuj Jehová niman okitakej ika yejua kimakixtijtoya ikalpan. ¿Kenon Jehová kimakixtia ikalpan? Ika miyek tlemach. Yejua xnoneki makipaleuikan tlaltikpakchanejkej.