CAPÍTULO 14
Matoyekanakan melajki itech nochi
“Tiknekij toyekanaskej melajki itech nochi.” (HEBREOS 13:18, TNM.)
1, 2. Xkijto ika se neskayotl tleka kiyolpaktia Jehová ijkuak tochikauaj melajki toyekanaj.
SE TELPOKATSIN kisa iuan inan kampa otlakoujkej. Nimantsin, onotelti niman ipan ixayak nesi ika nomojtia. ¿Tlenon panoua? Nion xokitak kenon okuajkuiteuj se paleta. Kinemiliaya kijlis inan makikouili, san ika, okilkauj. Najmana niman peua choka. Inan kiyolseuiya niman iuan nokuepa kampa otlakoujkej. ¡Melak paki inan niman kuajli nomachilia ijkuak kita ika ikoneuj kitekuepilia yejuin paleta niman kitlajtlani makitlapopoluikan!
2 Se tajtli melak paki ijkuak kita ika ikoneuan uelij melajki noyekanaj. Niman toTajtsin iluikakchane melak yolpaki, pampa yejua se toTajtsin akin “xkeman kijtoua on tlen xmelauak” (Hebreos 6:18). Jehová kiyolpaktia kitas ika, ijkuak noskaltia totlaneltokil, tochikauaj melajki toyekanaskej. Pampa tiknekij tikyolpaktiskej niman tiknekij nochipa tinemiskej itech itlasojtlalis, “tiknekij toyekanaskej melajki itech nochi”, ijkon ken okijto Pablo (Hebreos 13:18, TNM). Kachtopa tikitaskej naujkan kampa ouijtika ijkon tikchiuaskej niman sakin tikitaskej kenon techpaleuiya tla ijkon tikchiuaj.
MELAJKI MATOYEKANAKAN SA NO TEJUAMEJ
3-5. a) ¿Kenon techijlia Biblia matotlajpiyakan ika maka san tejuamej tokajkayauaskej? b) ¿Tlenon techpaleuis matikitakan tlen noneki tikpatlaskej?
3 Kachtopa, noneki tomachtiskej melajki toyekanaskej sa no tejuamej. Pampa titlajtlakolejkej uelis tixtlapachiuiskej niman san tejuamej tokajkayauaskej. Ijkon inpan onochiuj tlaneltokakej itech Cristo chanejkej Laodicea. Maski yejuamej kineltokayaj ika intlaneltokil melak chikaujtok, Jesús okijto: “Xitlaj tikpijpia, tixpajpayatik [xtitlachia] niman titetsotsoltik” (Apocalipsis [Revelación] 3:17). Ijkon ken nemiyaj xsan teajman katka, noijki ueliskia inpan nochiuas tlen xkuajli, pampa kentla ixtsauktoskiaj, xkitayaj tlenon yemelak panotoya.
4 Itech yejuin, Santiago noijki okijto: “Tla yakaj kinemilia ika kuajli kipia itlaneltok ixpan Dios niman xnota sa no yejua tlinon kijtoua inenepil, sa no yejua nokajkayaua niman on tlinon kichiua ixpan Dios xitlaj kijtosneki” (Santiago 1:26). Tikneltokaskej ika Jehová kiselia totekiyo maski xkuajli tiktekitiltiaj tonenepil, noijki san tejuamej tokajkayauaj. Totekiyo tlen tikchiujtoskej xtlaj ika tepaleuis. ¿Tlenon uelis tikchiuaskej niman maka ijkon topan manochiua?
5 Ikuitlapan yejuin tlaxeloltin pitentsitsintin, Santiago kijtoua ika itlanauatil toTajtsin xkeman nopopoloua niman kixneskayotia kentla se teskatl kampa techijlia ompa “matoitakan” niman ijkon tikmatiskej tlenon noneki tikyektlaliskej (xpoua Santiago 1:23-25). Kema, iTlajtol toTajtsin techpaleuiya matikitakan tla melajki toyekanaj niman kanon noneki topatlaskej (Lamentaciones 3:40; Ageo 1:5). Noijki, noneki tiktlajtlaniliskej Jehová kuajli matechita ken tinemij, matechpaleui matikitakan tlen melak noneki tikpatlaskej niman matechmaka kojtilistli tlen ika uelis toyektlaliskej (Salmo 139:23, 24). Uelis panos ika, nion xtikitaskej kenon, peuas xmelajki toyekanaskej. San ika, noneki maka matikilkauakan tlenon kinemilia toTajtsin iluikakchane itech yejuin. Proverbios 3:32 kijtoua ika “Jehová melak kitlauelita akin kichiua tlen xmelaktik, san ika, Yejua kuajli imiuan nouika akin yolmelaujkej”. Kuajli tikmatstokej ika toTajtsin techpaleuis matoitakan ijkon ken yejua techita niman matiknekikan tikchiuaskej tlen yejua kineki. Ijkon, uelis tikijtoskej ken Pablo, ika “tiknekij toyekanaskej melajki itech nochi”. Noneki tochikauaskej ika nochi toyojlo niman ijkon tikchiuaskej tlen tiknekij, maski ipan yejuin tonajli ouijtika nochi kuajli tikchiuaskej ken noneki.
MATIMELAJKEJ IUAN TOCHANEJKAUAN
Melajki toyekanaskej techpaleuis maka tiknekiskej tikiyanaskej tlen xkuajli tikchiuaj
6. ¿Tleka akin yononamiktijkej noneki maka itlaj manoiyanilikan, niman itech tlenon noneki notlajpiyaskej?
6 Noijki, noneki melajki toyekanaskej imiuan tochanejkauan. Akin yononamiktijkej kipiya ika melajki noyekanaskej ijkuak nonotsaskej niman maka itlaj manoiyanilikan. Noneki maka mauetsitij ipan vicios tlen melak teijtlakojkej, ken ijkuak tikteititis ika tikuelita okse akin xmoixnamik, tiiyankatlajtos ipan Internet iuan okse noso tikimitas tlaixkopinaltin niman okseki tlemach kampa nesi kenon auilnemilo. Melak teyolkoko tikijtoskej ika sekimej tokniuan ijkon yokikajkayaujkej imixnamik. ¡Melak nokajkayauaj! Maka keman itlaj matikchiuakan kampa matikititikan toixnamik ika tikpiyaj ome toxayak. Tlen noneki tikchiuaskej, tikixkopinaskej tekiuaj David, akin okijto: “Xninosentlalia imiuan akin tlakajkayauaj, nion xninouika imiuan akin kiyanaj kenon yejuamej” (Salmo 26:4).
7, 8. ¿Ika tlenon tlen uajlauj ipan Biblia uelis tikinmachtiskej tokoneuan ika tlasojti melajki matoyekanakan?
7 Tajtin noneki kinmachtiskej inkoneuan ika melak ueyi kijtosneki melajki timoyekanas. Yejuamej uelis kitekitiltiskej Biblia ika kinmachtiskej yejon. Ipan iTlajtol toTajtsin uajnestiuej neskayomej itech tlen noneki maka matikchiuakan. Ken ineskayo Acán, akin otlachtek niman okinek kiyanas; noso itech Guehazí, akin otlakajkayauj pampa okinek notomintis, niman ineskayo Judas, akin xsan okichtek tomin, noijki melak xkuajli ken otlakajkayauj niman ijkon okichiuj makikokokan Jesús (Josué 6:17-19; 7:11-25; 2 Reyes 5:14-16, 20-27; Mateo 26:14, 15; Juan 12:6).
8 San ika, noijki onka neskayomej kampa okichiujkej tlen kuajli. Ken Jacob, akin ijkuak okimat ika ikoneuan okinextijkej tomin ipan incostaluan, okinnauati matekuepilikan, yejua okinemili ika ompa okitlalijkej pampa san onopopolojkej. Noso ineskayo Jefté iuan ichpoch, akin okichiuj ijkon ken itaj okiteijli maski melak ouijtika katka. Noso itech Jesús, akin ijkuak okitak melak miyekej kualantoyaj, onoyolchikauj niman xokiyan akinon katka yejua, okiteititi ika melak kinekiya manochiua tlen yonoijtoka ipan iTlajtol toTajtsin niman maka itlaj inpan manochiua akin imiuan nouika (Génesis 43:12; Jueces 11:30-40; Juan 18:3-11). Yejuin san seki itech melak miyek neskayomej tlen kipiya Biblia tlen uelis ika tikinmachtiskej tokoneuan makitlasojtlakan niman makitlasojkaitakan melajki timoyekanas.
9. ¿Tleka noneki matikimititikan tokoneuan ika melajki toyekanaj, niman tlenon xnoneki tikchiuaskej?
9 Aman, tikinmachtis xsan kijtosneki tikinnojnotsas. Noneki tikimititis ika ijkon tikchiua. Ika yejon, Pablo okintlajtolti akin kinmachtiaj oksekimej: “¿Tlika, tej, xsa no yejuamej [nomachtiaj]? Niman tla yejuamej kiteijliaj xkuajli para tlachtekilos, ¿tlika, tej, yejuamej no tlachtekij?” (Romanos 2:21). Nemij tajtin akin maski kijtouaj ika noneki melajki timoyekanas, kemantika yejuamej xijkon kichiuaj, ken ijkuak xmelauak nochi tlen kijtouaj noso ijkuak kontilanaj tlen xintlatki. Sakin kijtouaj: “Yejuin xse tlajtlakojli” noso “Yejuamej kimatstokej ika miyekej kontilanaj yejuin”. Ijkuak ijkon kichiuaj, san kinpopolouaj inkoneuan. Maski tla patioj noso xpatioj tlen tikontilanas, nochipa kijtosneki titlachtektos; maski tla ueyi kijtosneki tlen noijtoua noso ka, tikijtos tlen xmelauak nochipa kijtosneki titlakajkayaujtos (xpoua Lucas 16:10). * Kokonej xuelis tikinkajkayauas, nimantsin kimatij tla yemelak tlen tikijtotokej, niman uelis melak kimijtlakos (Efesios 6:4). San ika, tla intajuan nochikauaj kichiuaskej tlen kuajli, ijkuak yejuin kokonej noskaltiskej uelis ok kiueyichiuaskej Jehová ipan yejuin tlaltikpaktli kampa melak xkuajli tlen nochiua (Proverbios 22:6).
MATIMELAJKEJ IPAN TLANECHIKOJLI
10. Tla yemelak tiknekij melajki toyekanaskej, ¿tlenon noneki tiktlajpiyaskej ijkuak titlajtouaj imiuan tokniuan?
10 Noijki onka miyekan kampa noneki melajki toyekanaskej imiuan tokniuan akin tlaneltokaj ken tejuamej. Yotikitakej ipan capítulo 12 ika ijkuak imiuan tinemiskej melak noneki matiktlajpiyakan kenon titlajtouaj, pampa xouijtika titeijlitinemiskej seki tlemach itech oksekimej, noso hasta titetlajtolchijchiuiliskej. Tla tikijtouaj tlen otiktekakilijkej itech okse niman xtikmatij tla yemelak ijkon opanok, maski xtiknekiskiaj tikchiuaskej, peuas tikteijliskej tlen xmelauak. Kema, nochipa melak kuajli okpa matiknemilikan tlen tikijtoskej (Proverbios 10:19). Niman noijki noneki tikchiuaskej yejuin maski tla kuajli tikmatstokej ika yemelak tlen tikijtoskej. ¿Tleka? Pampa uelis tokalaktijtoskej kampa xnoneki noso tikteititiskej ika xtitetlasojtlaj (1 Tesalonicenses 4:11). Maka keman matiteyolkokokan ijkuak tikijtoskej tlen melauak; nochipa uelis kuajli tiknemiliskej kenon titlajtoskej niman ika mayemanki totlajtol (xpoua Colosenses 4:6).
11, 12. a) ¿Kenon sekimej tokniuan sa no yejuamej noijtlakouaj ijkuak kichiuaj se ueyi tlajtlakojli? b) ¿Katlejua itlakajkayaualisuan Satanás itech uejueyimej tlajtlakoltin, niman kenon uelis tikimixnamikiskej? c) ¿Kenon uelis melajki toyekanaskej ipan ikalpan Jehová?
11 Niman melak noneki melajki toyekanaskej imiuan tlayekankej ipan tlanechikojli. Tla yakaj kineki kiyanas se ueyi tlajtlakojli, kanaj tlakajkayaua ijkuak itlaj kitlajtoltiaj, sa no yejua melak noijtlakojtos. Hasta peuas kiteititis ika kitekichiuilia toTajtsin niman kemantika kentla nion xkixmatiskia, tekajkayaujtos, kentla kitekichiuilijtoskia Jehová, san ika, noijki kichiujtos tlajtlakojli (Salmo 12:2). Noijki xkuajli yes ijkuak se xnochi kimijlia tlayekankej tlen noneki makimatikan (Hechos 5:1-11). Miyekpa, akin kichiuaj yejuin onuetsij ipan itlakajkayaualisuan Satanás ika tlen yejua kisemoyaua (xkita recuadro “ Itlakajkayaualisuan diablo itech uejueyimej tlajtlakoltin”).
12 Noijki, kipiya ika melajki toyekanaskej ipan ikalpan Jehová ijkuak tiktemiltiaj se amatl. ¿Kenon? Ken ijkuak tikteijliaj kech horas otitenojnotskej. Noijki ijkuak tiktemiltiaj se amatl niman ijkon tikseliskej se tekitl ipan ikalpan toTajtsin, nochipa tikijtoskej kenon melauak tinemij noso tlenon tikchiuaj ipan tonemilis (xpoua Proverbios 6:16-19).
13. ¿Kenon tikteititiaj ika melajki toyekanaj ijkuak totech tekiti se tokniuj noso tejuamej itech titekitij?
13 Noijki noneki melajki matoyekanakan tla titekitij imiuan tokniuan. San ika, xtitlajtojtinemiskej itech yejuin ipan Kajli kampa Tosentlaliaj nion ijkuak tontenojnotsaj. Tla se tokniuj totech tekiti, timelajkej yeskej ijkuak tiktlaxtlauiliaj ken noneki niman tikmakaj nochi tlen kinamiki ijkon ken kijtoua itlanauatiluan tekiuajkej (1 Timoteo 5:18; Santiago 5:1-4). Niman tla tejuamej titekitij itech se tokniuj tikchiuaskej nochi tlen kitlajtlaniliaj se tekipanojketl (2 Tesalonicenses 3:10). Titekitiskej ken kinamiki niman xtikchiaskej ika pampa yejua noijki kitekichiuilia toTajtsin, matechpaleui noso maka matechtlajtlanili chikauak matitekitikan ken oksekimej (Efesios 6:5-8).
14. ¿Tlenon noneki manochiua ijkuak tiktekitiltiskej tomin iuan okse tokniuj, niman tleka?
14 ¿Niman tla titetlanejtiaj tomin noso tikonkauiyaj se tekitl tlen uelis xkuajli onkisas? Biblia techijliaj tlen melak techpaleuis: nochipa melak kuajli tla noijkuiloua tlen nochiuas. Ijkon okichiuj Jeremías ijkuak okikouj se tlajli, okijkuilo se amatl imixpan oksekimej, okixkopin niman okejyeuj kampa uelis oksejpa kitaskia ika tlayekapan (Jeremías 32:9-12; noijki xkita Génesis 23:16-20). Tikijkuilos, tikchiuas imixpan oksekimej niman tiktlalilis firma itech nochi tlen nochiua, xkijtosneki tla xtikinneltoka, tikchiua pampa xtikneki tlauejli, titeyolkokos nion titlakajkayauas. Tla titetlanejtiaj, tla techtlanejtiaj noso itlaj okse, matikilnamikikan ika xkuajli yeskia tla san ipampa yejuin matikpiyakan tlauejli ipan tlanechikojli (1 Corintios 6:1-8). *
MATIMELAJKEJ IMIUAN AKIN XTLANELTOKAJ KEN TEJUAMEJ
15. ¿Tlenon kinemilia Jehová ijkuak yakaj tlakajkayaua ipan itekiyo niman tlenon tiknemiliaj akin tikchiuaj ken Cristo?
15 Akin tikchiuaj ken Cristo noneki matimelajkej imiuan akin xtlaneltokaj ken tejuamej. Ijkon ken Pablo, “tiknekij toyekanaskej melajki itech nochi” (Hebreos 13:18, TNM). Jehová akin otexchijchiuj, melak kineki nochipa matimelajkej ijkuak tikchiuaskej se tekitl maski tla tikchiuaj imiuan tokniuan noso ka. Ijkon nesi pampa ipan amoxtli Proverbios kiteneua miyekpa tlakajkayaualistli itech tlen notemachiua (Proverbios 11:1; 20:10, 23). Yeuejkaui ijkuak kitemachiuayaj oro noso plata kitekitiltiayaj balanzas niman pesas, noijki ijkuak tlakouayaj noso ijkuak tlanemakayaj. Miyekej tlanemakakej tetominkualiayaj pampa kitekitiltiayaj ome. * Jehová kitlauelita ijkuak yakaj ijkon tetominkualia. Tla tiknekij nochipa tinemiskej itech itlasojtlalis toTajtsin, xuelis ijkon titlakajkayauaskej.
16, 17. ¿Kenon tlakajkayaualo ipan yejuin tlaltikpaktli, niman tlenon yotiknemilijkej tikchiuaskej akin yemelak tikchiuaj ken Cristo?
16 Akin tikchiuaj ken Cristo miyekpa tikixnamikij kampa noneki maka matimelajkej. Ijkon panoua pampa yejuin tlaltikpaktli tlen kiyekana Satanás, tlaltikpakchanejkej xmelajki noyekanaj. Pampa kinekij kiseliskej tlen kitejtemouaj, ken ijkuak kitlajtlanij tekitl, tlakajkayauaj itech tlen onomachtijkej niman kech youejkaujkej tekititokej itech tlen ueli kichiuaj. Noso tlakajkayauaj itech impuestos, seguros, ijkuak yauej okse país noso itech okseki. Noso tlakajkayauaj ipan exámenes niman itech tekitl tlen kitemakaj ipan kaltlamachtijli, ijkuak san kitemoltiaj ipan Internet niman kiteijliaj ika yejuamej okichijchiujkej. Hasta kintlaxtlauiliaj akin tekitij itech tekiuajkej niman ijkon manochiua tlen yejuamej kinekij. Ipan tlaltikpaktli kampa yonoijtoka ika nemiskiaj akin “kitlauelitaskej nochi tlen kuajli”, “tsotsokamej yeskej” niman “sanoyej kejeleuiskej tomin”, ¿uelis tikchiaskej manochiua tlen kuajli? (2 Timoteo 3:1-5.)
17 Kemantika, ouijtika tikitaskej melajki toyekanaskej. Kanaj uelis nesis ika ipan yejuin tonajli san kuajli onkisaj akin tlakajkayauaj, niman sekimej itekipanojkauan toTajtsin kemantika xkipiyaj tlen ika nopanoltiskej pampa melajkej “itech nochi” (Salmo 73:1-8). San ika, kuajli matikmatstokan ika nochi tlen tikchiuaj melak kuajli onkisas. ¿Kenon? Matikitakan san seki itech tlen techpaleuiya tla melajki toyekanaj.
TLEN KISELIAJ AKIN MELAJKI NOYEKANAJ
18. ¿Tleka melak kuajli matechixmatikan ika timelajkej?
18 Xmiyek onka tlen melak manotlasojkaita ken techixmatiskej ika xtitlakajkayauaj niman timelajkej (xkita recuadro “ ¿Yemelak nimelajki?”). Niman yejuin tinochimej uelis tikchiuaskej. Xsan ueliskej kichiuaskej akin melak kuajli kichiuaj se tekitl, akin kipiyaj tomin, ipampa ken nesij noso tla uejueyixtokej. Ken melak kuajli techixmatij xnochimej kitlasojkaitaj (Miqueas 7:2). Ijkon, maski nemij akin techpijpinaujtiaj pampa timelajkej, oksekimej techtlakaitaskej niman totech tlaneltokaskej. Kanaj hasta kuajli tonkisaskej itech totekiyo. ¿Kenon? Miyekpa, iteixpantijkauan Jehová xkinkuiliaj intekiyo ijkuak oksekimej kema kinkuiliaj pampa xmelajkej, noso kintlapejpeniaj makichiuakan okse tekitl kampa san kinmakaj akin melajkej.
19. ¿Tlenon panoua ika totlamachilis niman ken touikaj iuan Jehová ijkuak melajki toyekanaj?
19 Maski tlen yotikijtokej xnochipa tikseliskej, onka okseki tlen melak ueyi kijtosneki tlen kema tikseliskej. Se, tikseliskej ken okijto Pablo, “totlamachilis melajki”, noso chipauak (Hebreos 13:18, TNM). Ika ome, tipakiskej pampa tikmatstoskej ika nochipa tinemij itech itlasojtlalis toTajtsin iluikakchane, akin melak kitlasojkaita ijkuak itekipanojkauan melajkej (xpoua Salmo 15:1, 2; Proverbios 22:1). Tikmatstokej ika xok onka okse tlateochiualistli ken yejuin. Aman matikitakan tlenon kinemilia Jehová itech tekitl.
^ párr. 9 Tla yakaj yonomat tlakajkayaua niman xok pinaui niman hasta kinejnemilia kenon ika yejon teijtlakos, tlayekankej ipan tlanechikojli noneki kiyektlaliskej.
^ párr. 14 Ipan apéndice “Kenon tikyektlaliskej tlaueltin tlen onka imiuan akin titekitij”, noijtoua kenon nochiuas ijkuak onka tlauejli kampa tokniuan konkauiyaj se tekitl.
^ párr. 15 Kitekitiltiayaj ome pesas, se ika tlakouayaj niman se ika tlanemakayaj. Ijkon nochipa kitlaniyaj tomintsin. Noijki kikuiyaj se balanza tlen san se lado ueyak katka noso yetik.
