1-3. a) ¿Tleka nantin nochipa kuajli kitaj ika inkoneuan machipaujkej niman kuajli manesikan? b) ¿Tleka Jehová kineki ika itekipanojkauan machipaujkej, niman tlenon kichiua matiknekikan ijkon tinemiskej?

SE NANTLI kuajli kita ikoneuj ijkuak kisas. Kita tla yonalti, tla chipauak itlaken niman tla kuajli nesi. ¿Tleka? Pampa kasikamati ika tla chipauak, kipaleuis maka makualo ijkuak noskaltis, niman noijki kimatstika ika ijkon ken kimitaj tekoneuan ijkon tlanemiliaj itech tajtin.

² ToTajtsin noijki kineki ika itekipanojkauan matichipaujkej. Niman, ipan Biblia kijtoua ika “iuan akin chipauak” kichiuas tlen chipauak (Salmo 18:26). * Jehová techtlasojtla  niman kimatstika ika tla tichipaujkej melak techpaleuis. Niman noijki kichia ika ijkuak kimitaskej iteixpantijkauan kuajli matlanemilikan itech. Tejuamej xtiknekij ika xkuajli matlajtokan itech toTajtsin niman itokayo, tiknekij tikueyichiuaskej. Ika yejon, noneki matichipaujkej itech ken tinesij niman itech tlen tikchiuaj ipan tonemilis (Ezequiel 36:22; xpoua 1 Pedro 2:12).

³ Pampa tikmatij ika toTajtsin kintlasojtla akin chipaujkej, kichiua matichipaujkej. Ika ken tinemij tiknekij tikueyichiuaskej pampa tiktlasojtlaj. Noijki, pampa tiknekij tinemiskej nochipa itech itlasojtlalis. Matikitakan kuakon, tleka noneki matichipaujkej, tlenon kijtosneki yejuin niman kenon uelis tichipaujkanemiskej. Yejuin techpaleuis matikitakan kanon noneki topatlaskej.

4, 5. a) ¿Tleka noneki matichipaujkej? b) Itech tlen Jehová okichijchiuj, ¿kenon nesi ika kuelita tlen chipauak?

⁴ Jehová techmachtia ika ineskayo. Ipan Biblia kijtoua: “Xkixkopinakan toTajtsin” (Efesios 5:1, TNM). Nikan tikitaj kachtopa tleka noneki matichipaujkej: Jehová, toTajtsin akin tikueyichiuaj, yejua melak chipauak (xpoua Levítico 11:44, 45).

⁵ Ijkuak tikitaj tlen Jehová yokichijchiuj, tikitaj ika yejua chipauak ken nemi niman itech tlen kichiua (Romanos 1:20). Matitlanemilikan itech tlaltikpaktli kampa tichantij. Jehová okichijchiuj tlaltikpaktli nochipa manochipaua. Noijki okitlali tlen ika maueli manochipaua atl iuan ajakatl. Temojkatlachialti ika tlaltikpaktli san yejua ueli nochipaua. Kuajli nesi ika “akin okichijchiu [...] in tlaltikpaktli” kuelita tlen chipauak (Hechos 14:15). Tejuamej noijki noneki matikuelitakan yejuin.

6, 7. ¿Kenon okiteititi Jehová ipan Tlanauatijli tlen okimakak Moisés ika kineki machipaujkej itekipanojkauan?

⁶ ¿Onka itlaj okse tleka noneki matichipaujkej? Kema, pampa Jehová, akin melak Ueyixtika, nochipa kintlajtlanilia  itekipanojkauan machipaujkej. Xtlanemili itech tlanauatijli tlen okinmakakej israelitas, ompa nesiya ika chipaualistli san sekan onkatka itech kenon kiueyichiuaskej toTajtsin. Tlanauatijli kuajli kijtouaya ika ipan Tonajli ijkuak Notlapachouayaj Tlajtlakoltin, ueyi teopixketl nonekiya naltis okpa niman ijkon uelis kichiuaskia itekiyo (Levítico 16:4, 23, 24). Noijki, kijtouaya ika nochimej teopixkej nonekiya kinpajpakaskiaj imauan niman ikxiuan ijkuak kiuentlaliliskiaj Jehová (Éxodo 30:17-21; 2 Crónicas 4:6). Ipan Tlanauatijli noijki kiteneuaya kanaj setenta tlemach tlen kitsokuilouaya inakayo se israelita. Ijkuak yejon panouaya, israelita xok ueliskia kiueyichiuas toTajtsin niman kemantika hasta ueliskiaj kimiktiskej (Levítico 15:31). Nochi akin kitsokuilouaya inakayo kinauatiayaj makichiua miyek tlemach tlen ika manochipaua, ken manalti niman makipaka itlaken; tla xijkon kichiuaskia, kinnauatiayaj yejuin: “Kipiya ika nenkimiktiskej niman ijkon nenkikixtiskej ipan tlanechikojli” (Números 19:17-20).

⁷ Maski tejuamej xok toyekanaj itech Tlanauatijli tlen okimakakej Moisés, techpaleuiya matikasikamatikan kenon tlanemilia toTajtsin. Kuajli nesi ipan yejuin Tlanauatijli ika Jehová kineki makiueyichiuakan ika chipaualistli. Niman Jehová xnopatla (Malaquías 3:6). Ijkon ken yeuejkaui, yejua san kineki matikueyichiuakan ika “tlaneltoktli [tlen] xkipia ijtlakaualistli” (Santiago 1:27). Noneki ipan yejuin tonajli matikmatikan tlenon yemelak kijtosneki yejuin.

8. ¿Itech tlenon kineki Jehová matinemikan tichipaujkej?

⁸ Biblia xsan kijtoua matichipaujkej ipan tonakayo. Tla tiknekij tinemiskej tichipaujkej ixpan toTajtsin noneki tochipauaskej itech nochi tonemilis. Jehová kichia matichipaujkej ipan: totlaneltokil, tonemilis, totlanemilil niman tonakayo. Matikitakan tlenon kijtosneki yejuin naui tlen yotikteneujkej.

9, 10. ¿Tlenon kijtosneki machipauak totlaneltokil, niman tlenon xtikchiuaj akin yemelak tikchiuaj ken Cristo?

 ⁹ Machipauak totlaneltokil. Kijtosneki maka matiknelokan tlaneltokijli tlen melauak ika tlen xmelauak. Matikilnamikikan ijkuak israelitas nemiyaj Babilonia. Ijkuak oksejpa nokuepaskiaj Jerusalén, kipiaya ika kitlakamatiskiaj yejuin tlanauatijli itech toTajtsin: “[¡]Xkisakan itech, maka xkitskikan tlen tsokuiltik! [...] Xnemikan chipaujkej” (Isaías 52:11). Yejuamej uajnokuepaskiaj niman ijkon kiyektlaliskiaj ken noueyichiuaya Jehová. Kuakon, ken kiueyichiuaskiaj nonekiya melak machipauak niman maka kineloskiaj ika tlen temachtiayaj niman tlen kichiuayaj ipan tlaneltokijli tlen onkatka Babilonia, pampa yejuin kiyolkokoskia toTajtsin.

¹⁰ Ipan yejuin tonajli, akin yemelak tikchiuaj ken Cristo melak noneki totlajpiyaskej maka matonelokan ika tlaneltokijli tlen xmelauak (xpoua 1 Corintios 10:21). Yejuin nochiuiyan onka, niman tla xtotlajpiyaj, uelis techijtlakos. Tlaneltokijli xmelauak temachtia ika ijkuak timikij tikpiyaj se alma tlen oksekan yauj. Niman temachtia okseki tlen xmelauak. Pampa kineltokaj yejuin tlamachtiltin, tlaltikpakchanejkej kintlamaniliaj akin yomijkej niman kintlatlikuiltiliaj tajtsitsintin (Eclesiastés 9:5, 6, 10). Akin yemelak tikchiuaj ken Cristo xtiknekij tikchiuaskej nion se tlemach tlen kichiua tlaneltokijli xmelauak. * Ika yejon, xtikinkauiliskej ika oksekimej makichiuakan maka chipauak matikueyichiuakan toTajtsin niman maka matiktlakamatikan tlen kijtoua Biblia (Hechos 5:29).

11. ¿Tlenon kijtosneki machipauak tonemilis, niman tleka melak noneki ijkon matinemikan?

¹¹ Machipauak tonemilis. Yejuin kijtosneki maka tikchiuaskej nion se itech auilnemilistli, yejuin techpaleuis matinemikan itech itlasojtlalis toTajtsin (xpoua Efesios 5:5, TNM). Ken tikitaskej ipan okse capítulo, noneki ika akin kichiuaj ken Cristo makitlalkauikan “auilnemilistli”. Tla  akin kichiuaj yejuin tlajtlakojli xnoyolkuepaj, xkiseliskej itekiuajyo toTajtsin (1 Corintios 6:9, 10, 18). Jehová kimita kentla melak tsokuiltikej niman tla xkichipauaj innemilis, kiseliskej “ika okpa mikilistli” (Apocalipsis [Revelación] 21:8).

12, 13. ¿Tlenon ueli panoua ika tlen tiknemiliaj, niman tlenon techpaleuis machipauak totlanemilil?

¹² Machipauak totlanemilil. Pampa tikchiuaj tlen tiknemiliaj, tla tijkauiliaj manoneluayoti ipan totlanemilil niman ipan toyojlo tlen tsokuiltik, yejuin kichiuas ika tlayekapan matikchiuakan se tlajtlakojli (Mateo 5:28; 15:18-20). San ika, tla tiktemiltiaj totsontekon ika tlen kuajli niman tlen chipauak, tiknekiskej tiyolmelaujkanemiskej (xpoua Filipenses 4:8). ¿Tlenon techpaleuis matikpiyakan chipauak totlanemilil? Kachtopa, maka matoyolpaktikan ika tlen uelis techijtlakos. * Ika ome, nochipa matomachtikan iTlajtol toTajtsin niman ijkon tiktemiltiskej totlanemilil ika tlen kuajli (Salmo 19:8, 9).

¹³ Ken yotikitakej, tla tiknekij tinemiskej nochipa itech itlasojtlalis toTajtsin, noneki machipauak totlaneltokil, tonemilis niman totlanemilil. Yejuin yeyi uajnestiuj ipan okseki capítulos ipan yejuin amoxtli. San ika, aman matitlajtokan itech: machipauak totlalnakayo.

14. Xkijto tleka xsan tejuamej tikijtoskej kenon kipiya ika tinemiskej tichipaujkej.

¹⁴ Noneki matichipaujkej ipan tonakayo niman kampa tichantij. Nemij akin kinemiliaj ika itech yejuin xakaj kipiya ika nokalaktis. San ika, akin kitekichiuiliaj Jehová xijkon tlanemiliaj. Ken otikijtokej ijkuak otipeujkej, Jehová xsan techijlia matichipaujkej ipan tonakayo pampa yejon techpaleuiya, noijki pampa ijkon ken techitaj ijkon tlanemiliaj itech toTajtsin. Matikilnamikikan itech konetl tlen otitlajtokej  ipan kachtopa párrafo: tla nochipa kistinemi tsokuiltik niman xkuajli nesis, ¿xmelak ika xkuajli titlanemiliskia itech itajuan? Noijki ijkon, tla itlaj onka tlen xkuajli ipan tonemilis noso xkuajli tinesij, ¿xmelak ika xkuajli tlajtoskej itech toTajtsin niman itech tlen titenojnotsaj? Noneki nochipa matikilnamikikan yejuin tlajtoltin: “Xitlaj tikchiuaj itlaj yejuan xkiseliaj [‘noso kintlajkalis’, TNM] on tlakamej, para ma ka yakaj kijtouilis tlen xkuajli on totekiu. Yej nochi kech tikchiuaj yejua ika, tikteititiaj ika tiitekitkauan Dios” (2 Corintios 6:3, 4). Kuakon, ¿kenon tinemiskej tichipaujkej?

15, 16. ¿Tlenon kuajli tikchiuaskej niman ijkon tikpiyaskej tonakayo chipauak, niman kenon noneki yes totlaken?

¹⁵ Machipauak tonakayo niman kuajli matinesikan. Maski san ipan katlejua país matichantikan, kanaj tinochimej tikpiyaj atl niman xapo tlen ika taltiskej niman tikinmaltiskej tokoneuan. Yejuin noijki kijtosneki tomapajpakaskej  ijkuak titlakuaskej noso ijkuak titlakualchiuaskej, niman tla yotiajkej baño noso ijkuak yotiktlapatilijkej se konetl. Ijkon xtijkauiliaj manosemoyaua virus niman microbios tlen kichiua matikualokan, ken timoijtikokos, noso hasta mitsajsis okse kokolistli tla xtimomapajpaka. San ika, tla timomapajpaka timotlajpiyas maka ijkon mopan mapano nion maka mamitsmikti se kokolistli. Tla kampa tichantij xtlaj baño, nonekis matiktlalpachokan ijkon ken yeuejkaui kichiuayaj israelitas (Deuteronomio 23:12, 13).

¹⁶ Noijki noneki matikpakakan totlaken. Xnoneki melak mapatioj noso tlen kemach notlalijtika, san noneki machipauak niman kuajli manesi (xpoua 1 Timoteo 2:9, 10). Nochipa niman nochiuiyan, tiknekij tikteititiskej ika chipauak tonakayo niman ken tinesij, pampa ijkon tikualnextiaj “on tlamachtilistli ika Dios toTemakixtijkau” (Tito 2:10).

17. ¿Tleka noneki machipauak niman kuajli manesi tochan niman okseki tlemach tlen tikpiyaj?

¹⁷ Tochan niman tlen tikpiyaj. Hasta kampa tiueliskej, kipiya ika kuajli niman chipauak tikpiyaskej tochan maski tla kipiyaj miyek tlemach niman kualtsin, noso ka. Noijki ijkon tikchiuaskej ika carro tla tikpiyaj, matikitakan kenon onka tlaijtik, niman melak noneki matikchiuakan yejuin tla tiktekitiltiaj ijkuak tiauej ipan totlanechikoluan noso ijkuak tontenojnotsaj. Nochi tlen tikpiyaj noneki kuajli manesi niman machipauak. Ijkon, kuajli tlajtoskej ijkuak techitaskej. Tejuamej tikinmachtiaj oksekimej ika, pampa Jehová kuelita tlen chipauak, kinpopolos akin “kixoxotoniaj on tlaltikpaktli” niman ika iTekiuajyo kichiuas manokuepa se xochitlalpan (Apocalipsis 11:18; Lucas 23:43, TNM). Ika yejon, ken onka tochan niman tlen tikpiyaj noneki manesi ika yotomatkej nochipa tikpiyaj chipauak pampa ijkon yes ipan yenkuik tlaltikpaktli.

18. ¿Kenon tikteititiaj ika tiktlakaitaj Kajli kampa Tosentlaliaj?

¹⁸ Kajli kampa Tosentlaliaj. Melak tiktlakaitaj kampa tosentlaliaj, pampa ompa tikueyichiuaj toTajtsin akin melak  tiktlasojtlaj. Tiknekij nochipa melak machipauak niman akin ompa yauej techontlajpalouaj kuajli makitakan. Tla tiknekij ijkon maonia, noneki titlachipauaskej niman tikyektlaliskej ijkuak techijliskej. Ijkuak titlapaleuiyaj, yemelak tikteititiaj ika tiktlasojkaitaj kampa tikueyichiuaj toTajtsin. Kema, tikitaj melak kualtsin tekitl titlachipauaskej niman tikyektlaliskej Kajli kampa Tosentlaliaj (2 Crónicas 34:10). Niman noijki ijkon tikitaj kampa tosentlaliaj ipan uejueyimej tlanechikoltin.

19. ¿Tlenon noneki tikmapeuaskej niman ijkon xtikijtlakoskej tonakayo, niman tlenon techijlia Biblia itech yejuin?

¹⁹ Tinemiskej tichipaujkej ipan tonakayo kijtosneki ika xtikchiuaskej nion xtiktekitiltiskej tlen uelis techijtlakos. Ika yejon xtipokij noso xtitlachichinaj, xtitlauanij nion xtiktolouaj pajtli tlen tlapajtikej xtechnauatiaj. Biblia xkiteneua nochi vicios tlen onka, san ika, kema kipiya tlajtolyekanalistin tlen techasikamachiltia tleka Jehová kita yejuin kentla melak tsokuiltik. Matikitakan makuijli tlajtolyekanalistin tlen noneki tikintlakamatiskej pampa tiktlasojtlaj toTajtsin niman tlen kichiuas kuajli matinemikan ixpan.

20, 21. ¿Tlenon kineki Jehová matikmapeuakan, niman tleka techijlia ijkon matikchiuakan?

²⁰ “Aman, tej, notlajsojkaikniuan, pampa Dios otechmakak nochi in promesas, ma tikxelokan itech totlalnakayo niman [toespíritu] nochi on tlen techijtlakoua. Niman ma kuajli titoyolchipauakan pampa tikmakajsij [toTajtsin].” (2 Corintios 7:1.) Ken tikitaj, Jehová kineki matikmapeuakan nochi tlen kitsokuiloua “totlalnakayo” noso tlen kijtlakoua “toespíritu” kijtosneki, tlen totlanemilil kineki kichiuas. Ika yejon, xtikonij nion xtiktolouaj itlaj tlen uelis nokuepas se vicio noso kijtlakos tonakayo niman totsontekon.

²¹ Ipan Biblia techijlia tleka noneki tochipauaskej itech “nochi tlen techijtlakoua”. Matikitakan ika 2 Corintios 7:1  peua kijtoua: “Pampa Dios otechmakak nochi in promesas”. ¿Tlenon yejuin tlen yokijto kichiuas? Jehová yokijtoka: “Nejua nemechselis. Nejua Ninochiuas nemoTaj” (2 Corintios 6:17, 18). San xnemili: Jehová kijtoua techtlajpiyas ika tlasojtlalistli ijkon ken se tajtli kichiua iuan ikoneuan. San ika, techijlia: matijkixtikan “itech totlalnakayo niman [toespíritu] nochi on tlen techijtlakoua”. Xtiknekiskiaj ika san pampa se vicio tlen toTajtsin Jehová xkuelita, makichiua maka iuan matouikakan.

22-25. ¿Tlenon tlajtolyekanalistin tlen uajlauej ipan Biblia techpaleuiskej maka matikpiyakan se vicio?

²² “Xtlajsojtla on moTeko Dios ikan nochi moyojlo, ikan nochi moalma niman ikan nochi motlamachilis.” (Mateo 22:37.) Jesús okijto ika yejuin tlanauatijli melak ueyi kijtosneki itech oksekimej (Mateo 22:38). Kema, Jehová kinamiki matiktlasojtlakan ika nochi tonemilis, ika nochi tlen tiknemiliaj niman ika nochi tlen tikmachiliaj. Niman ika yejon noneki tikmapeuaskej nochi tlen uelis kichiuas xuejkauis tinemiskej noso tlen kijtlakos totlanemilil.

²³ “ [Jehová] otechmakak tinochimej tijyo niman tonemilis, no ijki nochi tlajtlamach.” (Hechos 17:24, 25.) Pampa tonemilis se tetlayokolijli tlen otechmakak toTajtsin, akin tikchiuaj ken Cristo melak tiktlasojkaitaj. Ika yejon, xtikchiuaj nion se tlemach tlen makijtlako tonakayo. Tla xijkon tikchiuaskiaj tikteititiskiaj ika xtiktlasojkaitaj tonemilis (Salmo 36:9).

²⁴ “Xkintlajsojtla oksekimej no ijki ken tejua timotlajsojtla.” (Mateo 22:39.) Akin kipiyaj se vicio xsan yejuamej noijtlakouaj, noijki kimijtlakouaj oksekimej. Yejuin ijkon panoua ijkuak se poki noso tlachichina kampa nemij akin xijkon kichiuaj. Akin ijkon kichiua xkitlakamati itlanauatil toTajtsin kampa kijtoua matikintlasojtlakan oksekimej. Niman kiteititia ika xkitlasojtla toTajtsin (1 Juan 4:20, 21).

²⁵ “Xkinmelnamikti on tlaneltokakej ika ma kitlakaitakan [...] on yejuan kipiaj tekiuayotl.” (Tito 3:1.) Ipan miyek países  tekiuajkej xtekauiliaj manotekitilti drogas, ika yejon, akin tikchiuaj ken Cristo xtikchiuaj yejuin (Romanos 13:1).

26. a) ¿Tlenon noneki tikchiuaskej tla tiknekij tinemiskej itech itlasojtlalis toTajtsin? b) ¿Tleka melak kuajli tla tinemij tichipaujkej ixpan toTajtsin?

²⁶ Tla tiknekij tinemiskej itech itlasojtlalis toTajtsin, xsan noneki matichipaujkej ipan seki tlemach, noijki ipan nochi tonemilis. Ouijtika tijkauas se vicio niman xok ompa tonuetsis; san ika, kema tiuelis. * Melak kualtsin tikpiyas monemilis tla chipauak tinemi. Niman tla Jehová techtlajtlanilia, kichiua pampa kineki kuajli matinemikan (xpoua Isaías 48:17). Noijki, yejuin techpaleuiya kuajli matomachilikan pampa tikmatij ika tikchiuaj kuajli matlajtokan itech toTajtsin, akin melak tiktlasojtlaj ijkon ken yejua.