TLAMACHTIJLI 34
¿Kenijki uelis tikititiskej Jehová ika tiktlasojtlaj?
¿Tikmachilia ika más kuajli timouika iuan toTajtsin aman ika timomachtia Biblia? ¿Tikuelitaskia más tiktlasojtlas? Melak kuajli tla tikneki ijkon tikchiuas. Tla Jehová kita ika más tiktlasojtla, yejua noijki más mitstlasojtlas niman mitstlajpiyas. ¿Kenijki uelis tikititis ika tiktlasojtla?
1. ¿Kenijki uelis tikititiskej Jehová ika tiktlasojtlaj?
Ijkuak tiktlakamatij Jehová, tikititiaj ika tiktlasojtlaj (xkita 1 Juan 5:3). Yejua xakaj kichiualtia makitlakamati. Kineki ika tejuamej matiktlapejpenikan tla tiktlakamatiskej noso ka. ¿Tleka? Pampa kineki matiktlakamatikan ika nochi toyojlo (Romanos 6:17). Kema, Jehová kineki matiktlakamatikan pampa tiktlasojtlaj, xpampa yakaj texchiualtia. Secciones 3 niman 4 tlen uajlauej ipan yejuin libro mitspaleuiskej xkititi Jehová ika tiktlasojtla. Ipan yejuin secciones, tikitas kenijki uelis tikchiuas tlen Jehová kuelita niman kenijki xtikchiuas tlen yejua kitlauelita.
2. ¿Tleka kemantika xmás ueli tikititiaj Jehová ika tiktlasojtlaj?
Biblia kijtoua: “Sen yolmelajki tlakatl uelis tlajyouis ikan miyek pajsolouilistli” (Salmo 34:19). Tinochimej titlajyouiyaj pampa topopolouaj, pampa xtikpiyaj tomin, pampa texchiuiliaj tlen xkinamiki niman pampa tikixnamikij okseki tlemach tlen xkuajli. Ijkuak tikixnamikij nochi yejuin, kanaj xmás ueli tikchiuaj tlen Jehová kineki matikchiuakan. Kemantika kanaj hasta tiknemiliaj ika melak tekiyoj tiktlakamatis Jehová niman ika más kuajli tla xok tiktlakamatij. San ika, ijkuak timokojtilia tikchiuas tlen Jehová mitstlajtlanilia, tikititia ika san yejua más tiktlasojtla. Noijki tikititia ika xkeman tikneki tiktlalkauis. Tla yejua kita ika tejua xkeman tiktlalkauiya, yejua noijki xkeman mitstlalkauis, nochipa mouan nemis (xkita Salmo 4:3).
OKSEKI XKASIKAMATI
Matikitakan tleka Jehová kineki nochipa matiktlakamatikan niman tlenon uelis tikchiuaskej niman ijkon xkeman tiktlalkauiskej.
3. Satanás yomitstlajtolchijchiuili
Biblia kijtoua ika Satanás okitlajtolchijchiuili Job. San ika, xsan Job okitlajtolchijchiuili, noijki okintlajtolchijchiuili nochimej akin kinekij kitekichiuiliskej Jehová. Xkitakan Job 1:1 niman 1:6-2:10, niman xtlajtokan itech yejuin:
-
¿Tlenon okijto Satanás itech Job? (Xkitakan Job 1:9-11).
-
Satanás tinochimej yotechtlajtolchijchiuili, ¿tlenon yotechijtouili? (Xkitakan Job 2:4).
Xkitakan Job 23:11, 12 niman xtlajtokan itech yejuin:
-
¿Kenijki okiteititi Job ika melauak kitlasojtlaya Jehová?
Job melauak kitlasojtlaya Jehová, ika yejon, xkeman okitlalkaui.
Tla xtiktlalkauiyaj Jehová, tikteititiskej ika tiktlasojtlaj.
4. Xyolpakti Jehová
Xkitakan Proverbios 27:11 niman xtlajtokan itech yejuin:
-
¿Kenijki nomachilia Jehová ijkuak kita ika tiktlakamati niman ijkuak tiktlapejpenia tlen kuajli? ¿Tleka ijkon nomachilia?
5. Tejua uelis nochipa tiktlakamatis Jehová
Ijkuak tiktlasojtlaj Jehová, melak tiknekij tikimijliskej oksekimej tlen itech yotiuelkej, niman nion achijtsin xtiknekij tiktlalkauiskej. Kema, maski kemantika tikixnamikij tlen xkuajli, xtijkajkauaj ika titenojnotsaj. Xkitakan VIDEO niman xtlajtokan itech yejuin:
-
¿Timomojtia tikinnojnotsas oksekimej itech Jehová?
-
Ijkon ken otikitakej ipan video, ¿tlenon okipaleui Grayson maka sa manomojti?
Tla tiktlasojtlaj tlen Jehová kitlasojtla niman tiktlauelitaj tlen yejua kitlauelita, nochipa tiknekiskej tiktlakamatiskej niman xkeman tiktlalkauiskej. Xkitakan Salmo 97:10 niman xtlajtokan itech yejuin:
-
Itech nochi tlen yotikasikamat ipan Biblia, ¿tikilnamiki tlenon kineki Jehová matikchiuakan? ¿Niman tlenon xkineki matikchiuakan?
-
¿Tlenon uelis tikchiuas niman ijkon tiktlasojtlas tlen Jehová kitlasojtla niman tiktlauelitas tlen yejua kitlauelita?
6. Melak kuajli tla tiktlakamatij Jehová
Tla tiktlakamatij Jehová, nochipa kuajli tonkisaskej. Xkitakan Isaías 48:17, 18 niman xtlajtokan itech yejuin:
-
¿Uelis tikneltokaskej ika Jehová nochipa techijlis tlen techpaleuis? ¿Tleka ijkon tiknemilia?
-
¿Kenijki yomitspaleui pampa timomachtia Biblia niman yotikixmat Jehová?
SEKIMEJ KIJTOUAJ: “ToTajtsin xnoyolkokoua ijkuak nikchiua tlen xkuajli”.
-
¿Katlejua texto tikteititiskia niman ijkon titeasikamachiltis ika uelis tikyolpaktiskej noso tikyolkokoskej Jehová?
TLEN OTIUEL
Uelis tikititis Jehová ika tiktlasojtla tla tiktlakamati niman tla xkeman tiktlalkauiya maski ijkuak tikixnamikis tlen xkuajli.
¿Kenon titlanankiliskia?
-
¿Tlenon otiuel itech Job?
-
¿Tlenon uelis tikchiuas niman ijkon tikteititis ika tiktlasojtla Jehová?
-
¿Tlenon mitspaleuis maka keman xtlalkaui Jehová?
OKSEKI XKITA
Xkita tlenon uelis mitspaleuis maka keman xkaua Jehová niman tlanechikojli.
Xkita kenijki Satanás yokintlajtolchijchiuili itekipanojkauan toTajtsin.
“Job xkikaua toTajtsin” (Biblia ¿tlenon techijlia?, sección 6)
Kokonej uelis kiteititiskej ika kitlasojtlaj Jehová. Xkita kenijki uelis kichiuaskej.
¿Tlenon uelis kichiuaskej telpokamej niman ichpokamej niman ijkon nochipa kitlakamatiskej Jehová?
Puede que también le interese
TLEN MIYEKPA NOTLAJTOLTILO
¿Kenon nochiua ijkuak se kimachtiaj itech Biblia?
Ijkuak mitsmachtiskej iteixpantijkauan Jehová uelis tijkuis maski san katlejua Biblia. Uelis ompa nemiskej mochanejkauan noso moamigos.
