Toyesyo melak ueyi kijtosneki. Tla xtikpiyaskiaj, xueliskia tinemiskiaj. Pampa toTajtsin otexchijchiuj, san yejua kinamiki matechijli tlenon noneki tikchiuaskej ika yestli. ¿Tlenon kijtoua Jehová itech yestli? ¿Uelis tijkuaskej noso totlaliliskej? ¿Niman tlenon uelis techpaleuis matiktlapejpenikan tlen kuajli?

1. ¿Tlenon kijtoua Jehová itech yestli?

Yeuejkaui, Jehová okimijli itekipanojkauan: “Iminnemilis nochi kech yolki nemi onkaj ipan inyesyo” (Levítico 17:14). Kuakon, para Jehová, on yestli kijtosneki nemilistli. Tla tonemilis melak ueyi kijtosneki pampa toTajtsin otechtlayokoli, kuakon, toyesyo noijki melak ueyi kijtosneki.

2. ¿Tlenon xkineki toTajtsin matikchiuakan ika yestli?

Sakin ika yopanoka Apachiuilistli, Jehová okinnauati itekipanojkauan maka makikuakan yestli (xkita Génesis 9:4 niman Levítico 17:10). Satepan, ipan kachtopa siglo, Jehová oksejpa ijkon otlanauati itechkopa grupo akin tlayekanaya ipan nochi tlanechikoltin. Apóstoles niman tlayekankej okimijlikej nochimej tokniuan: “Maka xkuakan yestli” (xkita Hechos 15:28, 29).

¿Tlenon techasikamachiltisneki Jehová ijkuak techijlia maka matijkuakan yestli? Xnemili yejuin, tla se tlapajtijketl mitsijliskia ika xnoneki tikonis alcohol, ¿xmelak ika xtikoniskia? San ika ¿tijkuaskia itlaj tlen kipiya alcohol noso tikmotlaliliskia ipan motlaluayouan? Tikmatstokej ika xijkon tikchiuaskia. Kuakon, ijkuak toTajtsin techijlia ika xnoneki tijkuaskej yestli, noijki techasikamachiltisneki ika xnoneki tikoniskej yestli nion tijkuaskej nakatl tlen yesyo. Noijki xnoneki tijkuaskej itlaj tlen yokitlalilijkej yestli.

¿Niman uelis topajtiskej ika yestli? Sekimej akin kualoj kinotlaliliaj yestli noso tlen ika tlachijchiujtli yestli ken: glóbulos rojos, glóbulos blancos, plaquetas niman plasma. San ika, Jehová xkineki ijkon matikchiuakan. Aman tej, ixtlamatkej noijki youelkej kixexelouaj ika miyek partes tlen ika tlachijchiujtli yestli, niman, tlapajtijkej noijki ika yejon tepajtiaj. Noso kemantika tlapajtijkej tepajtiaj san no ika iyesyo on kokoxki. ¿Tlenon kijtoua Biblia itech yejuin? Biblia xtlaj kijtoua itech yejuin. Yejua ika, toseselti noneki tikitaskej kenijki tiknekij matechpajtikan (Gálatas 6:5). a

 OKSEKI XKASIKAMATI

3. Xtlapejpeni tlen toTajtsin kuelita

Jehová techijlia tlenon kinemilia itech yestli. ¿Tlenon techpaleuis nochipa matikchiuakan tlen yejua kuelita? Xkitakan VIDEO niman sakin xkasikamatikan tleka melak noneki matikchiuakan tlen tlatsintlan noteneua:

• Xtlajtlanili toTajtsin mamitspaleui xmati tlenon tikchiuas (Santiago 1:5).

• Xkita tlenon temachtia Biblia itech tlen tikneki tikchiuas niman xkita kenijki uelis tiktlakamatis (Proverbios 13:16).

• Xtetlajtolti kenijki tepajtiaj tlapajtijkej kampa tejua tichanti.

• Tla yotikitak kenijki tepajtiaj tlapajtijkej, aman xkita tla noijki tiknekiskia ijkon mamitspajtikan.

• Xkita ika tlen yotiktlapejpeni tikchiuas maka makipajsolo motlamachilis (Hechos 24:16). b

• Ijkuak nonekis itlaj tiktlapejpenis niman xonka se tlanauatijli ipan Biblia, kuakon, noneki moselti tikijtos tlenon tikchiuas. Xkilnamiki ika nion moueuentsin, nion mosiuauj, nion tlayekankej, nion akin mitsmachtia Biblia xuelis mitsijliskej tlenon noneki tikchiuas (Romanos 14:12).

• Xkijkuilo ipan se amatl tlen yotikijto tikchiuas.

4. Akin tiiteixpantijkauan Jehová tiknekij kuajli matechpajtikan

Tejuamej tikintlakamatij itlanauatiluan toTajtsin kampa tlajtoua itech yestli, san ika, yejon xkijtosneki tla xtiknekij kuajli matechpajtikan. Xkitakan VIDEO.

Xkitakan Tito 3:2 niman xtlajtokan itech yejuin:

• ¿Tleka noneki tikintlakaitaskej tlapajtijkej niman kuajli tikinnotsaskej?

 5. Tlen ika tlachijchiujtli yestli niman tlen tlapajtijkej ompa kikixtiaj

Yestli tlachijchiujtli ika 1) glóbulos rojos, 2) glóbulos blancos, 3) plaquetas niman 4) plasma. San ika, tlen ika tlachijchiujtli yestli noijki noxexeloua ika miyek partes. c Niman, tlen ompa nokixtia, ika kichijchiuaj tlen ika tepajtiaj niman tlen ika kiteltiaj yestli.

¿Uelis topajtiskej ika yejon tlen nokixtia itech glóbulos rojos, glóbulos blancos, plaquetas niman plasma? Yejuin itlaj tlen san tejua noneki tiktlapejpenis. Noneki tiktlapejpenis tlen xkipajsolos motlamachilis niman ken yotikasikamat ipan Biblia ika más kuajli. Kanaj sekimej xkinekiskej makinpajtikan ika tlen nokixtia itech tlen ika tlachijchiujtli yestli. Niman oksekimej kanaj kinemiliskej ika xtlaj tlenon tla ika nopajtiskej.

Ijkuak tiktlapejpenis tlenon tikchiuas, xmotlajtolti:

• ¿Kenijki ueliskia nikijlis se tlapajtijketl tleka nikneki noso tleka xnikneki manechpajtikan ika tlen nokixtia itech tlen ika tlachijchiujtli yestli?

 TLEN OTIUEL

Jehová yotechijli tlenon kinemilia itech yestli niman kineki matiktlakamatikan.

¿Kenon titlanankiliskia?

• ¿Tleka kineki Jehová matikpatiojkaitakan yestli?

• ¿Tleka tikijtouaj ika ijkuak Jehová kijtoua maka matijkuakan yestli noijki kijtosneki ika xnoneki totlaliliskej?

• ¿Tlenon mitspaleuis kuajli xtlapejpeni tlen ika timopajtis?