Tla miyekej tikintlajtoltiskiaj tlenon kinemiliaj itech alcohol, xsan noijki ken technankiliskiaj. Sekimej kuelita koniskej achijtsin alcohol imiuan akin nouikaj. Oksekimej xkinekij nion achijtsin koniskej. Niman, oksekimej melak konij hasta tlajtlauanij. ¿Tlenon kijtoua Biblia itech alcohol?

1. ¿Xkuajli tla tikonij alcohol?

Biblia xkijtoua tla xkuajli tikonis alcohol. ITlajtol toTajtsin techijlia ika Jehová yotechtlayokoli vino niman ijkon matiyolpakikan (Salmo 104:14, 15). Biblia noijki kinteneua miyekej itekipanojkauan Jehová akin koniyaj alcohol (1 Timoteo 5:23).

2. ¿Tlenon kimijlia Biblia akin kitlapejpeniaj koniskej alcohol?

Jehová xkineki matitlauanikan nion matikonikan miyek alcohol (Gálatas 5:21). Biblia techijlia: “Maka tinemis intsajlan akin temojti konij vino” (Proverbios 23:20, TNM). Tla kemantika tikonij alcohol imiuan oksekimej noso san tejuamej, xnoneki miyek tikoniskej. Xkipiya ika tikchiuaskej ken akin tlauanij niman hasta xok kimatij tlenon kichiuaj noso tlenon kijtouaj. Noijki xnoneki miyek tikoniskej pampa yejon uelis techijtlakos niman techkualotlas. Tla xueli san achijtsin tikonij alcohol, más kuajli yeskia maka matikonikan.

3. ¿Kenijki uelis tikteititiskej ika titetlakaitaj?

Toseselti noneki tiktlapejpeniskej tla tikoniskej alcohol noso ka. Ika yejon, xnoneki tiktejteneuaskej akin san achijtsin koni alcohol. Niman tla yakaj xkoni alcohol, xnoneki tikchiualtiskej makoni (Romanos 14:10). Niman tejuamej xtikonij alcohol tla tikitaj ika oksekimej uelis noyolkokoskej (xkita Romanos 14:21). Akin kichiua ken Cristo xkitejtemoua “tlen kuajli san para yejua”, yejua kitejtemoua “tlen kuajli para oksekimej” (xkita 1 Corintios 10:23, 24).

 OKSEKI XKASIKAMATI

4. Xnemili tla tikonis alcohol noso ka

¿Tlenon kinemiliaya Jesús itech alcohol? Matikitakan yejuin ipan kachtopa milagro tlen yejua okichiuj. Xkitakan Juan 2:1-11 niman xtlajtokan itech yejuin:

• ¿Katlejua milagro okichiuj Jesús? ¿Niman tlenon techmachtia yejuin?

• Jesús xokijto tla xkuajli ijkuak yakaj koni alcohol. Kuakon, ¿tlenon noneki tikilnamikiskej ijkuak tikitaskej ika yakaj koni alcohol?

Maski se akin kitekichiuilia Jehová uelis konis alcohol, xkijtosneki tla nochipa uelis konis. Xkitakan Proverbios 22:3 niman xtlajtokan itech yejuin: ¿kuajli yeskia tla…

• … se koni alcohol ijkuak kinejnemiltis se carro noso se máquina?

• … se siuatl koni alcohol maski koneuaj?

• … se koni alcohol maski tlapajtijkej yokijlijkej maka makoni?

• … se koni alcohol maski kimatstika ika xueli san achijtsin koni?

• … se koni alcohol maski kampa chanti xnotekauilia makonikan alcohol?

• … se koni alcohol ijkuak nemi iuan yakaj akin xok koni alcohol pampa yeuejkaui melak tlauaniya?

Tla tejua timonamiktis noso tikpanoltis se iluitl, ¿kuajli yeskia tla tiktemaka alcohol? Xkitakan VIDEO. Ompa uelis tikitas tlenon mitspaleuis xchiua tlen más kuajli.

Xkitakan Romanos 13:13 niman 1 Corintios 10:31, 32. Ijkuak nenkitaskej se texto, xtlajtokan itech yejuin:

• ¿Kenijki uelis mitspaleuis yejuin texto niman ijkon tiktlapejpenis tlen kiyolpaktis Jehová?

 5. Xkita kech tikonis

Tla tiktlapejpenia tikonis alcohol, xkilnamiki ika, maski Jehová xkita se tlajtlakojli ijkuak yakaj koni alcohol, yejua xkineki melak miyek matikonikan. ¿Tleka? Xkitakan Oseas 4:11, 18 (TNM), niman xtlajtokan itech yejuin:

• ¿Tlenon uelis ipan nochiuas akin melak miyek koni alcohol?

¿Tlenon uelis techpaleuis matikmatikan kech alcohol uelis tikoniskej? Tla tikmatij hasta kech ueli tikxikouaj. Xkitakan Proverbios 11:2 niman xtlajtokan itech yejuin:

• ¿Tleka melak kuajli tla tikita san kech alcohol uelis tikonis?

6. Xkajkaua ika tikoni miyek alcohol

 TLEN OTIUEL

Jehová yotechtlayokoli alcohol niman ijkon matiyolpakikan, san ika, yejua xkineki matitlauanikan nion matikonikan miyek alcohol.

¿Kenon titlanankiliskia?

• ¿Tlenon kijtoua Biblia itech alcohol?

• ¿Tlenon uelis topan nochiuas tla melak miyek tikonij alcohol?

• Sekimej konij achijtsin alcohol niman oksekimej nion achijtsin xkonij, ¿kenijki uelis tikteititiskej ika nochimej tikintlakaitaj?