Jesús yejua akin tlayekana ipan nochi tlanechikoltin (Efesios 5:23). Niman ipan yejuin tonaltin, yejua kuajyekantika ikalpan toTajtsin itechkopa “tekitketl” yolmelauak niman tlamachilise (xkita Mateo 24:45). Jesús yejua akin okitlali yejuin “tekitketl”, yejua ika, yejuin “tekitketl” kinamiki makijto tlenon noneki nochiuas ipan tlanechikoltin. Maski ijkon, yejua nochipa kitlakamati Cristo niman kinpaleuijtika oksekimej tlapejpeniltin. ¿Akinon yejon “tekitketl”? ¿Kenijki techtlajpiya?

1. ¿Akinon yejon “tekitketl” yolmelauak niman tlamachilise?

Desde yeuejkaui, Jehová yokinuajtlapejpenijtia sekimej tlakamej niman ijkon makiyekanakan ikalpan (Malaquías 2:7; Hebreos 1:1). San matikonteneuakan yejuin, apóstoles niman tokniuan tlayekankej de Jerusalén yejuamej akin opeuj kiyekanaj tlanechikojli sakin ika omik Jesús (Hechos 15:2). Ipan yejuin tonaltin noijki nemij sekimej tokniuan tlayekankej akin kiyekanaj tlanechikojli. Yejuamej se grupo tlen noixmati ken Grupo akin Kinyekana iTeixpantijkauan Jehová. Yejuamej kiyekantokej ken titenojnotsaj niman techmakatokej tlen ika tikchikauaskej totlaneltokil. Yejuin grupo yejua “tekitketl” yolmelauak niman tlamachilise akin Jesús okitlali para makiyekana ikalpan toTajtsin (Mateo 24:45a). Yejuin tokniuan, akin nemij ipan Grupo akin Tlayekana, Jehová yokintlapejpeni ika iespíritu santo niman kichiaj yaskej iluikak ijkuak mikiskej niman ijkon tekiuajtiskej iuan Cristo.

2. ¿Kenijki texchikauilia totlaneltokil “tekitketl” yolmelauak niman tlamachilise?

Jesús okijto ika “tekitketl” yolmelauak niman tlamachilise yejua akin kinmakaskia nochimej akin kitekichiuiliaj Jehová “on tlen kikuaskej ijkuak noneki” (Mateo 24:45b). Kema, yejuin “tekitketl” techmakatika on tlen tijkuaskej, yejuin kijtosneki ika nochipa techmachtijtika ika iTlajtol toTajtsin niman ijkon kuajli matinemikan. Ijkon ken tlakuajli tlen tijkuaj kichiua matichikaujtokan niman maka matikualokan, tlakuajli tlen techmaka “tekitketl” yolmelauak niman tlamachilise techpaleuiya nochipa matiktlakamatikan Jehová niman matikchiuakan tekitl tlen yotechmakak Jesús (1 Timoteo 4:6). Yejua texchikauilia totlaneltokil ika totlanechikoluan, toueyitlanechikoluan, toamatlajkuiloluan niman videos tlen nokixtiaj itech Biblia. Nochi yejuin techpaleuiya matikasikamatikan tlenon kineki Jehová niman noijki techpaleuiya más kuajli iuan matouikakan.

 OKSEKI XKASIKAMATI

3. Ikalpan Jehová noneki kuajli noyekanas

Jesús kinyekana tokniuan akin nemij ipan Grupo akin Tlayekana niman ijkon makiyekanakan tekitl tlen kichiuaj iteixpantijkauan Jehová. Ipan kachtopa siglo, noijki ijkon nochiuaya. Xkitakan VIDEO.

Xkitakan 1 Corintios 14:33, 40 niman xtlajtokan itech yejuin:

• Ijkon ken kijtouaj yejuin textos, ¿kineki Jehová ika itekipanojkauan kuajli manoyekanakan? ¿Tleka ijkon tiknemilia?

4. “Tekitketl” yolmelauak niman tlamachilise kiyekana ken titenojnotsaj

Tokniuan akin nemiyaj ipan kachtopa siglo kasikamatiyaj ika melak nonekiya tenojnotsaskej. Xkitakan Hechos 8:14, 25 niman xtlajtokan itech yejuin:

• Ipan kachtopa siglo, ¿akinomej kiyekanayaj tenojnotsalistli?

• ¿Tlenon okichiujkej Pedro niman Juan ijkuak oksekimej apóstoles okimijlikej tlenon nonekiya kichiuaskej?

Grupo akin Tlayekana kita kenijki noneki titenojnotsaskej niman kasikamati ika yejuin tekitl yejon tlen más noneki manochiua. Xkitakan VIDEO.

 Jesús okijto ika melak noneki matitenojnotsakan. Xkitakan Marcos 13:10 (TNM), niman xtlajtokan itech yejuin:

• ¿Tleka Grupo akin Tlayekana melak kineki matitenojnotsakan?

• ¿Tleka noneki ika “tekitketl” yolmelauak niman tlamachilise makiyekana ken titenojnotsaj?

5. “Tekitketl” yolmelauak niman tlamachilise techyekana

Grupo akin Tlayekana yejua akin kinyekana nochimej itekipanojkauan toTajtsin. San ika, ¿tlenon kichiua niman ijkon kimatis kenijki techyekanas? Xkita tlenon kichiuayaj tokniuan akin nemiyaj ipan grupo akin tlayekanaya ipan kachtopa siglo. Xkitakan Hechos 15:1, 2 niman xtlajtokan itech yejuin:

• ¿Tleka onokualanijkaj sekimej tokniuan akin onenkej ipan kachtopa siglo?

• ¿Tlenon okichiujkej Pablo, Bernabé niman oksekimej tokniuan niman ijkon kiyektlaliskej tlen panotoya?

Xkitakan Hechos 15:12-18 niman 23-29, niman xtlajtokan itech yejuin:

• ¿Tlenon okichiuj grupo akin tlayekanaya ipan kachtopa siglo niman ijkon kimatis tlenon kinekiya toTajtsin manochiua? (Xkitakan Hechos 15:12, 15, 28).

Xkitakan Hechos 15:30, 31 niman 16:4, 5, niman xtlajtokan itech yejuin:

• ¿Tlenon okichiujkej tokniuan ipan kachtopa siglo ijkuak grupo akin tlayekanaya okimijli tlenon nonekiya kichiuaskej?

• ¿Kenijki tikmatij ika Jehová okinteochiuj pampa otetlakamatkej?

Xkitakan 2 Timoteo 3:16 niman Santiago 1:5, niman xtlajtokan itech yejuin:

• Ipan yejuin tonaltin, ¿tlenon kichiua Grupo akin Tlayekana ijkuak noneki itlaj kitlapejpenis?

 TLEN OTIUEL

Grupo akin Tlayekana yejua “tekitketl” yolmelauak niman tlamachilise akin Jesucristo okitlapejpeni. Niman yejuin “tekitketl” yejua akin kinyekana nochimej itekipanojkauan toTajtsin niman noijki kinchikauilia intlaneltokil.

¿Kenon titlanankiliskia?

• “Tekitketl” yolmelauak niman tlamachilise okitlalijkej para matechyekana, ¿akinon okitlali?

• ¿Tlenon kichiua Grupo akin Tlayekana niman ijkon techtlajpiyas?

• ¿Tikneltoka ika Grupo akin Tlayekana yejua “tekitketl” yolmelauak niman tlamachilise?