BIBLIA xtechijlia kemanon otlakat Jesús. San ika, kema kijtoua seki tlemach tlen ika techasikamachiltia ika xotlakat ipan diciembre.

¿Kenon katka Belén ipan diciembre, kalpan kampa otlakatiko Jesús? Ipan calendario judío kipiya se metstli itoka kislev, peua itlajkotian noviembre ontlami itlajkotian diciembre, ijkuak melak seua niman kiyaui. Sakin ompa kitoka metstli tebet, tlen peua itlajkotian diciembre ontlami itlajkotian enero, ipan yejon metstli melak seua niman noijki uetsi seuktli kampa melak tlakpak. Biblia kijtoua kenon katka itech yejon metstli. Matikitakan.

Esdras, se akin okijkuilo Biblia, kijtoua ika ipan metstli kislev melak seua katka niman kiyauiya. Kijtoua ika “itech chiknaui metstli [kislev], ipan tonajli veinte” melak tojlan onosentlalijkej ipan Jerusalén akin “kuekuetlakatoyaj [...] pampa chikauak kiyauiya”. Noijki, kijtoua ika akin ompa onosentlalijkej okijtokej yejuin itech kenon katka ipan yejon metstli: “Ipan yejuin tonaltin melak kiyaui. Xuelis se nokauas kiyauak” (Esdras 10:9, 13; Jeremías 36:22). Kuakon, tikasikamatij ika ijkuak yejkoskia  metstli diciembre, tlajpixkej akin chantiyaj iyeualiujyan Belén kimintsakuayaj inyolkauan niman ijkon maka makistinemikan kiyauak.

San ika, Biblia kijtoua ika ipan yeuajli ijkuak otlakat Jesús, nemiyaj tlajpixkej akin kintlajpiayaj inyolkauan ipan tepetl. Niman Lucas, se akin okijkuilo Biblia, kijtoua ika ipan Belén “nemiyaj sekimej tlajpixkej yejuan nochi tlayoua nokauayaj ne ipan on tepetl kampa kintlajpiayaj inborreguitos” (Lucas 2:8-12). Ken tikitaj, xsan kijtoua ika kistinemiyaj ipan tepetl ika tonajli, noijki ompa nemiyaj ika tlayoua. Kinpiayaj kiyauak inyolkauan ika yeuajli. Tla ipan diciembre melak seua katka niman kiyauiya Belén, ¿uelis tiknemiliskej ika tlajpixkej nokauayaj niman kochiyaj ipan tepetl? Ka. Kuakon, tlen nochiujtoya ijkuak otlakat Jesús techasikamachiltia ika xotlakat ipan diciembre. *

ToTajtsin iTlajtol kuajli techijlia kemanon omik Jesús, san ika, xmiyek techijlia itech kemanon otlakat. Yejuin techtlalnamiktia itlajtoluan tekiuaj Salomón: “Se kuajli tokayotl melak kuajli xijkon ken se kuajli chiauak, niman tonajli ijkuak se miki melak kuajli xken ijkuak se tlakati” (Eclesiastés 7:1). Kuakon, tikasikamatij tleka Biblia miyek techijlia itech kenon otenojnots Cristo niman ijkuak omik, niman tleka xmiyek techijlia itech kemanon otlakat.