1, 2. ¿Tlenon kichiua matitlajyouikan, niman tlenon notlajtoltiaj miyekej tlaltikpakchanejkej?

IPAN se país opanok se ueyi guerra, kampa melak miyekej omijkej siuamej niman kokonej. Akin omijkej, nochimej san sekan okintokakej niman iyeualiyan kampa okintokakej okintlalijkej cruces pitentsitsintin tlen kijtouayaj: “¿Tleka?”. Yejuin tlen miyekpa notlajtoltiaj akin tlajyouiyaj. Notlajtoltiaj yejuin ijkuak se guerra kinmiktilia inchanejkauan, ijkuak itlaj panoua tlen kimijtlakouilia inkaluan, se kokolistli noso itlaj tlen xkuajli tlen melak kintlajyouiltia. Ika yejon, kinekij kimatiskej tleka inpan nochiua yejuin.

² ¿Tleka toTajtsin techkauilia matitlajyouikan? Tla toTajtsin nochi ueli kichiua, tetlasojtla, tlamachilise niman yolmelaujki, ¿tleka melak onka tlauejli niman tlen xkuajli ipan tlaltikpaktli? ¿Kanaj kemantika yotimotlajtolti yejuin?

3, 4. a) ¿Tlen neskayotl techititia ika kuajli tla titetlajtoltiaj tleka toTajtsin techkauilia matitlajyouikan? b) ¿Tlenon kimachilia Jehová itech tlen xkuajli niman tlajyouilistli?

³ ¿Xkuajli tla titetlajtoltis tleka toTajtsin techkauilia matitlajyouikan? Sekimej kinemiliaj ika tla tetlajtoltiaj, kiteititiskej ika xtlaneltokaj noso xkitlakaitaj toTajtsin. San ika, ijkuak tikpouas Biblia, tejua tikitas ika onenkej itekipanojkauan toTajtsin  akin noijki ijkon otetlajtoltijkej. Se neskayotl, teotlajtoketl Habacuc okitlajtolti Jehová: “¿Tleka tinexchiualtia manikita tlen xkuajli? ¿Kanaj mixtololojuan kixikouaj kitaj kenon tlajyouilo? San nikita kenon notlachtekiliaj niman nomapeuaj niman notlajtolchijchiuiliaj niman nouisokij” (Habacuc 1:3, Biblia latinoamericana).

⁴ ¿Okualan Jehová ipampa tlen okitlajtolti teotlajtoketl Habacuc? Ka, xokualan. Okichiuj manoijkuilo ipan Biblia tlen okitlajtolti. Noijki, okipaleui kuajli makasikamati nochi yejon niman machikaui itlaneltokil. Jehová noijki kineki ijkon mitspaleuis. Xkilnamiki ika Biblia kijtoua: “Yejua kineki mechpaleuis” (1 Pedro 5:7). ToTajtsin melak kitlauelita tlen xkuajli niman tlajyouilistli, xijkon ken se tlaltikpakchane (Isaías 55:8, 9). Kuakon, ¿tleka onka miyek tlajyouilistli ipan tlaltikpaktli?

5. ¿Tlenon noteijlia ijkuak yakaj tetlajtoltia tleka titlajyouiyaj, san ika, tlenon temachtia Biblia?

⁵ Miyekej tlaltikpakchanejkej akin kipiyaj sejneka noso tlamantik intlaneltokil, yokintlajtoltijkej tlayekankej niman tlamachtijkej ipan tlaneltokiltin tleka melak titlajyouiyaj. Yejuamej kinnankiliaj ika ijkon kineki toTajtsin niman ika  yeuejkaui yokijtoka nochi tlen panoskia ipan yejuin tonaltin niman noijki tlen xkuajli nochiuaskia. Miyekej tlaltikpakchanejkej yokimijlikej ika itlanauatiluan toTajtsin xuelis kasikamatiskej noso ika toTajtsin kinuika tlaltikpakchanejkej, maski kokonej, niman ijkon iuan manemikan iluikak. San ika, ijkon ken tejua yotimomachti, Jehová xkeman kichiua mapano tlen xkuajli. Biblia kijtoua: “¡Maka manonemili ika toTajtsin akin melauak kichiua tlen xkuajli, niman akin nochi ueli kichiua, xtetlajyouiltia!” (Job 34:10).

6. ¿Tleka miyekej tlaltikpakchanejkej kitlajtlakoltiaj toTajtsin itech nochi tlajyouilistli tlen onka ipan tlaltikpaktli?

⁶ ¿Tikmati tleka tlaltikpakchanejkej kitlajtlakoltiaj toTajtsin itech nochi tlajyouilistli? Miyekpa, pampa kinemiliaj ika toTajtsin akin nochi ueli, yejua tlayekana ipan yejuin tlaltikpaktli. Xkimatij tlen melauak temachtia Biblia, tlen tejua yotimomachti ipan capítulo 3 itech yejuin amoxtli. Satanás yejua akin melauak tlayekana ipan yejuin tlaltikpaktli.

7, 8. a) ¿Kenon kiteititiaj tlaltikpakchanejkej ika noijki kichiuaj ijkon ken akin kinyekana? b) ¿Tleka tlajtlakojli iuan tlen “san kemanon niman ijkuak xtlaj nochia” yokichiuj maonia tlajyouilistli?

⁷ Biblia kijtoua: “On diablo kinnauatia nochimej on oksekimej tlakamej ipan in tlaltikpaktli” (1 Juan 5:19). ¿Xmelauak ika yejuin tlajtoltin kuajli techasikamachiltia tlen panotika? Tlaltikpakchanejkej kiteititiaj kenon Satanás ‘kikajkayaujtika nochi tlakatl chanej ipan in tlaltikpaktli’ (Apocalipsis [Revelación] 12:9). Satanás kichiujtika maonia tlakajkayaualistli, tlauejli, niman xteiknelia. Ika yejon, ipan tlaltikpaktli tlen yejua kiyekantika, tlaltikpakchanejkej xnoikneliaj, nokajkayauaj niman notlauelitaj. Yejuin tlen kachtopa kichiua ika melak maonia tlajyouilistli.

⁸ Ika ome, titlajyouiyaj pampa tikpiyaj tlajtlakojli, ken otikitakej ipan capítulo 3, yejuin opeuj ijkuak se tlakatl oteixnamik ipan xochitlalpan Edén. Ika yejon, maski tlaltikpakchane kineki tlayekanas niman kiyejyekoua kichiuas, san yokichiuj maonia guerras niman tlajyouilistli (Eclesiastés 4:1; 8:9). Ika yeyi tlen kichiua matitlajyouikan, Biblia kitokayotia:  “San kemanon niman ijkuak xtlaj nochia” (xpoua Eclesiastés 9:11). Pampa yejuin tlaltikpaktli xkiyekana Jehová, xkitlajpiya. Ika yejon, uelis itlaj inpan nochiuas tlaltikpakchanejkej tla nemij kampa niman ijkuak panoua tlen xkuajli.

9. ¿Tleka kuajli tikmatstoskej ika Jehová kimati tleka kikauilia maonia tlajyouilistli?

⁹ Techyolseuiya tikmatiskej ika toTajtsin xkichiua maonia tlajyouilistli. Yejua xkipiya tlajtlakojli pampa onka guerras, tlemach tlen xkuajli nochiua niman tlemach tlen tlaijtlakoua, tlen kichiua matitlajyouikan. San ika, ok noneki matiknankilikan okse tlajtoltilistli: ¿Tleka toTajtsin kikauilia maonia tlajyouilistli? Tla yejua nochi ueli, kuakon uelis kichiuas matlami nochi tlajyouilistli ika ikojtilis. Aman, ¿tleka xkichiua? Ken yotikasikamatkej, Jehová techtlasojtla, ika yejon, kuajli tikmatstokej ika yejua kimatstika tleka ok xkichiua (1 Juan 4:8).

10. ¿Tlenon okichiuj Satanás manoneltoka itech toTajtsin niman kenon okichiuj?

¹⁰ Tla tiknekij tikmatiskej tleka toTajtsin kikauilia maonia tlajyouilistli, noneki matikitakan ijkuak opeuj nochi tlauejli. Ijkuak Satanás okichiuj ika Adán iuan Eva maka makitlakamatikan Jehová, opeuj tlen melak noneki manonankili. Satanás xokichiuj maka manoneltoka tla Jehová kipiya kojtilistli, pampa kimati ika Jehová nochi ueli kichiua. Tlen kema okichiuj, maka manoneltoka, tla kimelaua yejua matlayekana. Ijkuak okichiuj manoneltoka ika toTajtsin se tekajkayaujketl niman akin kinyekana xkinkauilia mayolpakikan, Satanás kiteneuilijtoya ika yejua xkuajli tlayekanketl (xpoua Génesis 3:2-5). Noijki, kichiujtoya makasikamatikan ika tlaltikpakchanejkej kuajli nemiskiaj tla xkinyekanaskia toTajtsin. Ijkon, kijtotoya ika Jehová xkimelauaya yejua matlayekana.

11. ¿Tleka Jehová xokinpopolo akin okixnamijkej ipan xochitlalpan Edén?

¹¹ Ijkuak Adán iuan Eva xokitlakamatkej toTajtsin, kentla kijtoskiaj: “Xtiknekij toTajtsin matechyekana. San tejuamej uelis tiktlapejpeniskej tlen kuajli niman tlen xkuajli”. ¿Kenon  tlanankiliskia Jehová? ¿Kenon kimititiskia nochimej akin tlamachilisejkej okinchijchiuj, ika akin okixnamijkej xmelauak tlen kiteneuiliayaj niman ika ken yejua kichiua melak kuajli? Nemi akin kinemilia, ika melak kuajli yeskia tla kinpopoloskia akin okixnamijkej niman kichijchiuaskia se yenkuik tlakatl niman siuatl; san ika, yejua yokijtoka tlen kineki, manokuepa tlaltikpaktli se xochitlalpan niman matemi ika inkoneuan Adán iuan Eva (Génesis 1:28). Niman Jehová nochipa kichiua nochi tlen kijtoua (Isaías 55:10, 11). Noijki, tla kinpopoloskia akin okixnamijkej ipan xochitlalpan Edén, xueliskia nomatis tla yejua kimelaua matlayekana.

12, 13. ¿Tlenon techpaleuiya matitlanemilikan tleka Jehová yokikauili Satanás makinyekana tlaltikpakchanejkej niman tlaltikpakchanejkej san yejuamej manoyekanakan?

¹² Matitlanemilikan itech yejuin. Se tlamachtijketl kimijlitika akin kinmachtia kenon kuajli kichiuaskej tlen kitstokej ipan matemáticas. Kuakon, se nomachtijketl tlamachilise san ika teixnamijketl, kijtoua ika ken tlamachtijketl kimijlia makichiuakan, xijkon, niman kichiua makinemilikan ika xkuajli ken tlamachtia. Yejuin nomachtijketl kijtoua ika yejua kimati kenon melak kuajli kichiuas. Sekimej akin iuan nomachtia kineltokaj  tlen kijtoua niman noijki teixnamikij. Aman, ¿tlenon noneki kichiuas tlamachtijketl? Uelis kinkixtis nomachtijkej akin okixnamijkej ipan kaltlamachtijli, san ika, ¿tlenon kinemiliskiaj sekimej? Kanaj uelis kinemiliskiaj ika yejuin nomachtijketl niman akin iuan onosentlalijkej, melauak tlen kijtouaj. Ueliskia xok kitlakaitaskej akin kinmachtia niman kinemiliskej nomojtia pampa noteititis ika xkimati. San ika, aman xnemili, yejon tlamachtijketl kikauilia inomachtijkauj akin okixnamik, makiteititi imixpan akin iuan nomachtia kenon kichiuaskia yejua.

¹³ Jehová noijki ijkon yokichiuj. Xkilnamiki ika akin okixnamijkej ipan xochitlalpan Edén, xsan yejuamej nonekiya kimatiskej tlen melauak. Melak miyekej iluikaktekitkej okitakej tlen onochiuj (Job 38:7; Apocalipsis 5:11). Ken Jehová tlanankiliskia itech tlen okiteneuilijkej, kinpaleuiskia yejon iluikaktekitkej niman, sakin, noijki nochimej akin tlamachilisejkej okinchijchiuj. Kuakon, ¿tlenon yokichiuj Jehová? Yokikauili Satanás makiteititi kenon kinyekanaskia tlaltikpakchanejkej. Noijki yokinkauili tlaltikpakchanejkej san yejuamej manoyekanakan ika itlayekanalis Satanás.

14. ¿Kenon tepaleuiya ika Jehová okinemili kinkauilis tlaltikpakchanejkej san yejuamej manoyekanakan?

¹⁴ Tlamachtijketl akin itech titlajtouayaj, kimati ika inomachtijkauj akin okixnamik niman sekimej akin iuan onosentlalijkej, xmelauak tlen kineltokaj. San ika, noijki kimati ika tla kinkauilia makiyejyekokan kiteititiskej kenon kichiuaskej matemáticas ken yejuamej kijtouaj, kinpaleuis nochimej inomachtijkauan. Kema, ijkuak noteititis ika akin okixnamijkej xtlaj kimatij, oksekimej nomachtijkej kineltokaskej ika san tlamachtijketl kuajli ueltika tlamachtis itech matemáticas. Noijki, kasikamatiskej tleka aman kinkixtis inomachtijkauan akin okixnamijkej. Noijki ijkon, Jehová kimati ika nochimej iluikaktekitkej niman tlaltikpakchanejkej kinpaleuis ijkuak kitaskej ika xmelauak tlen kinemiliaj Satanás niman xkuakualtin espíritus, niman ika tlaltikpakchanejkej xuelij san yejuamej noyekanaj. Kasikamatiskej ika melauak  yejuin tlajtoltin tlen teotlajtoketl Jeremías okijto: “Nejua kuajli nikmatstika, Jehová, ika tlaltikpakchane xueli noyekana. Se tlaltikpakchane nion xkimati kanon cholos ijkuak nejnemi” (Jeremías 10:23).

15, 16. a) ¿Tleka Jehová yokikauili mauejkaui tlajyouilistli? b) ¿Tleka toTajtsin xkiteltia tlen xkuajli niman okseki tlemach tlen tetlajyouiltia?

¹⁵ San ika ¿tleka Jehová melak youejkauj yokikauili maonia tlajyouilistli? ¿Niman tleka xkiteltia manochiua tlemach tlen xkuajli? Matitlanemilikan itech ome tlemach tlen xkichiuaskia tlamachtijketl akin otitlajtokej itech. Se, xkiteltiskia inomachtijkauj akin okixnamik, makiteititi kenon kichiuaskia tlen yejua okijto, niman noijki, xkipaleuiskia. Noijki ijkon, onka ome tlemach tlen Jehová okinemili xkichiuas. Kachtopa, xokitelti Diablo niman akin iuan onosentlalijkej makiyejyekokan kiteititiskej tla melauak tlen kineltokaj. Ika yejon, ononek kikauilis mapanokan miyek xiuitl. Ipan melak miyek xiuitl tlen youajpanokej, tlaltikpakchanejkej yokinpixkej miyekej tekiuajkej niman yokinextijkej miyek tlemach ika ciencia niman itech okseki tlemach. Maski ijkon, xnoteltiaj guerras, panoua tlen xkuajli niman xtlaj tomin. Ika yejuin yonoteititi ika intekiuajyo tlaltikpakchanejkej xtlaj ueli kiyektlaliaj.

¹⁶ Ika ome, Jehová xkipaleuiya Satanás makiyekana yejuin tlaltikpaktli. Tla toTajtsin kichiuaskia maka manochiua tlen xkuajli niman okseki tlemach tlen tetlajyouiltia, ¿xmelauak ika kinpaleuiskia itech tlen kinekij kichiuaskej akin okixnamijkej? ¿Xmelauak ika tiknemiliskiaj ika kema uelis san tejuamej kuajli toyekanaskej? Tla Jehová ijkon kichiuaskia, kipaleuiskia Satanás ika tlen otekajkayauj. Biblia kijtoua: “Dios xkeman kijtoua on tlen xmelauak” noso xtekajkayaua (Hebreos 6:18).

17, 18. ¿Tlenon kichiuas Jehová ika nochi tlajyouilistli tlen tlaltikpakchanejkej akin tlayekanaj yokichiujkej maonia niman tlen yokichiuj Satanás?

¹⁷ Aman, ¿tlenon kichiuas ika nochi tlen yoijtlakauj pampa okixnamijkej toTajtsin? Matikilnamikikan ika Jehová nochi  ueli. Kuakon, yejua uelis kiyektlalis nochi tlen yoijtlakauj niman kema kichiuas. Ijkon ken yotomachtijkej, yejuin tlaltikpaktli noyektlalis niman nokuepas se xochitlalpan. Totlaneltokil tlen tikpiyaj itech imikilis Jesús, kichiuas mapopoliui tlajtlakojli. Akin yomijkej, yoliuiskej niman ijkon oksejpa nemiskej, toTajtsin ika Jesús “kixoxotonis on tlen yejua on diablo kichiua” (1 Juan 3:8). Jehová kichiuas nochi yejon ijkuak yejua kijtos. Uelis tipakiskej ika aman ok xkichiua pampa ijkon uelis tomachtiskej tlen melauak niman tikchiuaskej itekiyo (xpoua 2 Pedro 3:9, 10). Kuakon, toTajtsin kintemojtika tlaltikpakchanejkej akin kinekij melauak kiueyichiuaskej, niman pampa yejuin tlaltikpaktli tentika ika tlauejli, kinpaleuiya makixikokan tlajyouilistli (Juan 4:23; 1 Corintios 10:13).

¹⁸ Sekimej kinemiliaj ika tla toTajtsin kichijchiuaskia Adán iuan Eva maka mauelikan teixnamikiskej, nochi yejuin tlajyouilistli xpanoskia. Tla tiknekij tikmatiskej tleka xijkon okinchijchiuj, matikilnamikikan kenon melak kualtsin otexchijchiuj Jehová.

19. ¿Kenon melak kualtsin otexchijchiuj Jehová, niman kenon noneki matiktlasojkamatikan?

¹⁹ Ken otomachtijkej ipan capítulo 5, toTajtsin okinchijchiuj tlaltikpakchanejkej mauelikan kitlapejpeniskej tlenon kichiuaskej. ¿Xmelak ika kualtsin ken otexchijchiuj toTajtsin? ToTajtsin noijki okinchijchiuj miyekej yolkamej, san ika, yolkamej xuelij kitlapejpeniaj tlen kuajli niman tlen xkuajli (Proverbios 30:24). Niman aman kinchijchiuaj máquinas, tlen san kintlakamatij tlaltikpakchanejkej. ¿Uelis tipakiskiaj tla toTajtsin ijkon texchijchiuaskia? Ka, xtipakiskiaj. Ika yejon, techpaktia  tiuelij tiktlapejpeniskej tlenon tikchiuaskej, se neskayotl, tlenon tikchiuaskej ipan tonemilis, kenon tinemiskej niman akinomej iuan touikaskej. Techpaktia ijkon ken otexchijchiuj toTajtsin niman yejua ijkon okinek.

20, 21. ¿Kenon uelis kuajli tiktlapejpeniskej tlen tikchiuaskej niman tleka noneki matiknekikan yejon?

²⁰ Jehová xtexchiualtia matiktekichiuilikan (2 Corintios 9:7). ¿Kuelitaskia se tajtli noso se nantli, makijli ikoneuj “nimitstlasojtla” pampa san okichiualtijkej ijkon makijli, noso pampa kisa ipan iyojlo? Kuakon, yejuin tlen noneki xmotlajtolti: “¿Kenon nejua niktlapejpenis tlen nikchiuas?”. Satanás, Adán iuan Eva xkuajli tlen okitlapejpenijkej, pampa okimapeujkej toTajtsin Jehová. ¿Niman tejua tlenon tikchiuas? ¿Tlenon tiktlapejpenis?

²¹ Tejua uelis tikchiuas tlen kuajli ijkon ken toTajtsin omitschijchiuj, kuajli tiktlapejpenis tlenon tikchiuas. Uelis timosentlalis imiuan melak miyekej tlaltikpakchanejkej akin nemij itech Jehová. Yejuamej melak kiyolpaktiaj toTajtsin pampa kiteititiaj ika Satanás se tlakajkayaujketl niman melak xkuajli tlayekana (Proverbios 27:11). Tejua uelis noijki tikchiuas, tla tiktlapejpenia kenon kuajli tinemis ipan monemilis. Ipan okse capítulo tikasikamatiskej kenon.