¿KENON tiknemilia yes yejon Tonajli ijkuak Teyolkuitilos? Sekimej kinemiliaj ika melak miyekej almas nemiskej ixpan itrono toTajtsin kampa kinyolkuitiskej. Noijki kinemiliaj ika sekimej komintitlaniskej manemitij ipan iluikak, niman oksekimej kinkauiliskej manemikan kampa nochipa tlajyouijtoskej. San ika, Biblia kijtoua ika yejon Tonajli ijkuak Teyolkuitilos sejneka yes noso tlamantik: pampa xtikmakasiskej yejon tonajli, tikchiaskej mapano miyek tlen kuajli niman tlayektlaliskej ipan tlaltikpaktli.

Ipan Apocalipsis (noso Revelación) 20:11, 12, Juan kijtoua kenon yes Tonajli ijkuak Teyolkuitilos: “Kemaj onikitak se istak ueyixtikaj trono, niman no onikitak on yejuan ipan yeuatikatka. Niman on tlaltikpaktli niman on cielo totoka oyejtejkej ixpan on yejuan yeuatikaj ipan on ueyixtikaj trono niman xokinextijkej kanon niyanaskej. Niman kemaj onikintak ixpan Dios majmantikatkaj on mimikej yejuan uejueyixtokej niman yejuan xuejueyixtokej. Kemaj okintlapojkej on tlajkuilolamamej niman no okitlapojkej oksen tlajkuilolamatl yejuan kijtoua akinon kipia yenkuik nemilistli para nochipa. On mimikej okinyolkuitij niman okintlaxtlauilij ken kitokaroua  ika on tlen okichijkej nochi kech tlajkuilolnestikaj”. ¿Akinon yejon Juez akin nemi ipan trono?

ToTajtsin Jehová yejua akin Ueyixtika Juez. San ika, yotekauili mateyolkuiti okse. Ipan Hechos 17:31, Pablo okijto ika toTajtsin “yokitlalij on tonajli ijkuak nochi tlakatl kiyolkuitis ikan iyolmelaualis itechkopa Cristo”. Niman yejon Juez yejua Jesucristo akin okiyolitijkej (Juan 5:22). Aman, ¿kemanon peuas yejon Tonajli ijkuak Teyolkuitilos niman kech uejkauis?

 Ipan amoxtli Apocalipsis kijtoua ika Tonajli ijkuak Teyolkuitilos peuas tla yotlan guerra ipan Armagedón, ijkuak kipopoloskej nochi tlen kiyekana Satanás (Apocalipsis 16:14, 16; 19:19–20:3). * Tla yopanok Armagedón kitsakuaskej Satanás niman espíritus xkuakualtin kampa tlatekoyonki tlen xkipiya kech ika uejkatlan niman ompa nemiskej mil xiuitl. Ipan yejon tonaltin, 144,000 akin yaskej iluikak kinyolkuitiskej tlaltikpakchanejkej niman ‘se mil xipan iuan Cristo tekiuajtiskej’ (Apocalipsis 14:1-3; 20:1-4; Romanos 8:17). Ken tikitaj, Tonajli ijkuak Teyolkuitilos xkijtosneki tla nimantsin panos ken san se tonajli tlen kipiya veinticuatro horas, ka. Yejuin uejkauis mil xiuitl.

Ipan yejon mil xiuitl, Jesucristo “kinyolkuitis niman kintlajtlakolmakas on yejuan nemij niman on yejuan mimikej” (2 Timoteo 4:1). Tlajtojli “yejuan nemij” kijtosneki “sanoyej miyek tlakatl”, akin makisaskej itech guerra ipan Armagedón (Apocalipsis 7:9-17). Juan, itlatitlankauj Cristo, noijki okimitak “ixpan Dios majmantikatkaj on mimikej” ijkuak kinyolkuitiayaj. Ijkon ken Jesús okijto, “on mimikej kakiskej notlajtol niman kisaskej ipan intlalkon” ijkuak kinyolitiskej (Juan 5:28, 29; Hechos 24:15). Aman, akin teyolkuitiskej, ¿tlenon kitaskej itech tlaltikpakchanejkej?

Juan okitak ipan se tlatlachalistli ijkuak “okintlapojkej on tlajkuilolamamej” niman “on mimikej okinyolkuitij[kej] niman okintlaxtlauilij ken kitokaroua  ika on tlen okichijkej nochi kech tlajkuilolnestikaj” (Apocalipsis 20:12). ¿Onka ipan yejuin tlajkuilolamamej tlen yeuejkaui okichiujkej tlaltikpakchanejkej? Ka. Xkinyolkuitiskej itech tlen okichiujkej ijkuak xmikiyaj. ¿Tleka ijkon tikijtouaj? Pampa Biblia kijtoua ika “ijkuak se miki, nomanauiya de [itech] ipoder on tlajtlakojli” (Romanos 6:7). Uelis tikijtoskej ika akin kinyolitiskej kentla yenkuik oksejpa uajnemiskej. Kuakon, yejuin tlajkuilolamamej kipiyas yenkuik itlanauatiluan toTajtsin. Tla kinekiskej nemiskej nochipa, akin yokinyolitijkej niman akin omakiskej itech Armagedón, noneki kitlakamatiskej itlanauatiluan toTajtsin. Ipan yejon tlanauatiltin  noijki ijkuiliujtoskej itlanauatiluan Jehová tlen kitemakas ipan mil xiuitl. Ijkon, nochimej kinyolkuitiskej itech tlen kichiuaskej ipan Tonajli ijkuak Teyolkuitilos.

Ipan Tonajli ijkuak Teyolkuitilos, melak miyekej tlaltikpakchanejkej uelis nomachtiskej itech tlenon toTajtsin kineki matikchiuakan niman sakin kitlakamatiskej. Kuakon nonekis kinmachtiskej nochimej akin yoliuiskej. Kema, “tlaltikpakchanejkej ueliskej tlen melaktik” (Isaías 26:9). San ika, xnochimej tlaltikpakchanejkej kinekiskej kichiuaskej tlen toTajtsin kineki. Isaías 26:10 kijtoua: “Maski kikneliskej akin xkuajli iyojlo, xkinekis uelis tlen melaktik. Maski ipan tlaltikpaktli melaktik, kichiuas tlen xmelajki, niman xkeman kitas iueyilis Jehová”. Yejuin tlaltikpakchanejkej xkuakualtin kinpopoloskej ipan Tonajli ijkuak Teyolkuitilos niman xok keman yoliuiskej (Isaías 65:20).

Ijkuak tlamis Tonajli ijkuak Teyolkuitilos, tlaltikpakchanejkej akin xomijkej aman melak kuajli nemiskej pampa xok kipiyaskej tlajtlakojli. Kuakon, ipan Tonajli ijkuak Teyolkuitilos, tlaltikpakchanejkej xok tlajtlakolejkej yeskej ijkon ken kachtopa (1 Corintios 15:24-28). Sakin, oksejpa kimakauaskej Satanás niman sa sejpa kintlatlatas tlaltikpakchanejkej. Kikauiliskej oksejpa makiyejyeko kinkajkayauas tlaltikpakchanejkej (Apocalipsis 20:3, 7-10). Akin xnokauiliskej makinkajkayaua, kitaskej kenon yemelak nochiua yejuin tlajtoltin: “Akin yolmelaujkej nemiskej ipan tlaltikpaktli, niman nochipa ipan chantiskej” (Salmo 37:29). Kuajli tikmatstokej ika tlaltikpakchanejkej akin yolmelaujkanemij, kitaskej Tonajli ijkuak Teyolkuitilos, kentla se tlateochiualistli.