IPAN amoxtli Apocalipsis, noso Revelación, seki tlajtojli xkipiya ika nasikamatis ijkon ken uajnestiuj (Apocalipsis [Revelación] 1:1). San xnemili, tlajtoua itech se siuatl tlakapajpatlaketl akin ijkuiliujtika ipan ixkuateuj “Ueyixtika Babilonia”. Noijki kijtoua ika notlalia ipan “tojlamej niman países” (Apocalipsis 17:1, 5, 15). Yejuin xuelis kichiuas se melauak siuatl, kuakon Ueyixtika  Babilonia san itlaj kixneskayotia. ¿Tlenon kijtosneki Ueyixtika Babilonia?

Yejuin siuatl akin yotikteneujkej, ipan Apocalipsis 17:18 noijki kitokayotia kentla se “ueyi ueyikan yejuan kimandaroua [kinnauatia] nochi kech rey nemi ipan in tlaltikpaktli”. Tlajtojli “ueyikan” techtlanemililtia ipan melak miyekej tlaltikpakchanejkej. Niman yejuin “ueyi ueyikan” kinnauatia “nochi kech rey nemi ipan in tlaltikpaktli”. Kuakon, Ueyixtika Babilonia se ueyi grupo akin nemij ipan nochi tlaltikpaktli. Kijtosneki se ueyixtika tlaneltokijli. Matikitakan ipan amoxtli Apocalipsis tleka ijkon tikijtouaj.

Tikmatstokej ika Ueyixtika Babilonia, xse tekiuajyotl, pampa iTlajtol toTajtsin kijtoua ika “nochi kech rey nemi ipan in tlaltikpaktli [uejueyimej tekiuajyomej ipan tlaltikpaktli] iuan yejua okojkochkej”. Ijkuak kijtoua ika imiuan kochi tekiuajkej akin tlanauatiaj ipan yejuin tlaltikpaktli, kijtosneki ika imiuan tekiti. Kuakon, tikasikamatij tleka kitokayotiaj “ueyi tlakapajpatlaketl” (Apocalipsis 17:1, 2; Santiago 4:4).

Biblia kijtoua ika ijkuak kipopoloskej yejuin siuatl, noyolkokoskej “tlasemankej” ipan in tlaltikpaktli. Ijkon, tikasikamatij ika xtlajtoua itech akin tlanemakaj. Ipan Biblia kijtoua ika tekiuajkej niman akin tlasemanaj “san uejka” kualitstoskej (Apocalipsis 18:3, 9, 10, 15-17). Kuakon, kuajli tikasikamatij ika Ueyixtika Babilonia kijtosneki tlaneltokiltin.

Onka okse tlen techtlanemililtia ika kema kijtosneki tlaneltokiltin: noijtoua ika kinkajkayaua tlaltikpakchanejkej ika inaualyo (Apocalipsis 18:23). Nochi tlatlamantik noso sesejneka naualyotl ualeua itech espíritus xkuakualtin. Ika yejon, xtitlamojkaitaj ijkuak Biblia kitokayotia Ueyixtika Babilonia kentla “chanyotl para on xkuajkualtin espíritus” (Apocalipsis 18:2; Deuteronomio 18:10-12). Noijki tikitaj ika kixnamiki tlaneltokijli tlen melauak, pampa kintlaueltoka “tiotlajtojkej niman on yejuan iyaxkauan Dios” (Apocalipsis 18:24). Melak kitlauelita tlaneltokijli tlen melauak hasta kintlaueltoka, kintlajyouiltia niman kinmiktia akin tenojnotsaj itech Jesús (Apocalipsis 17:6). Kuajli tikitaj ika Ueyixtika Babilonia kijtosneki nochimej tlaneltokiltin xmelajkej akin kixnamikij toTajtsin Jehová.