Jesucristo ikoneuj Jehová akin iuan nouika niman sajnoye kitlasojtla. Achto uajlaskia kentla tlakatl ipan in tlaltikpaktli, Jesús nemiya iluikak kentla se iluikaktekitketl tlen kipiyaya ueyilistli (Juan 17:5). Sakin ouajla ipan tlaltikpaktli okinmachtiko tlaltikpakchanejkej tlen melauak itech toTajtsin (Juan 18:37). Noijki, okitemakak inemilis niman ijkon okinmakixti itech tlajtlakojli niman mikilistli akin tetlakamatkej (Romanos 6:23). Jesús aman yejua Tekiuaj itech iTekiuajyo toTajtsin, iluikaktekiuajyotl tlen kikuepas ipan se xochitlalpan yejuin tlaltikpaktli (Apocalipsis 19:16).

Iluikaktekitkej noijki iuan nouikaj toTajtsin. Iluikaktekitkej xopeuj iminemilis kentla tlakamej ipan in tlaltikpaktli. Okinchichijkej iluikak, achto toTajtsin kichijchiuaskia tlaltikpaktli (Job 38:4-7). Nemij sajnoye miyekej iluikaktekitkej (Apocalipsis 5:11). Yejuin iluikaktekitkej akin iuan nouikaj toTajtsin kinekij manomachtikan tlaltikpakchanejkej, kuajli makixmatikan Jehová (Apocalipsis 14:6, 7).

ToTajtsin noijki kimpiya akin imiuan nouika ipan tlaltikpaktli; kintokayotia iteixpantijkauan. Se teixpantijketl kiteixpantia ipan se juzgado tlen kimatstika. Iteixpantijkauan Jehová kiminojnotsaj oksekimej itech Jehová niman tlen kineki kichiuas (Isaías 43:10). Ijkon ken iluikaktekitkej, iteixpantijkauan kinekij mitspaleuiskej kuajli xkixmati Jehová. Kinekij tejua noijki iuan xmouika toTajtsin.