Tla tijnekij nochipa tikpiyaskej akin imiuan touikaj, noneki iuan titlajtoskej. Tijkakij, niman yejua noijki techkaki. Noijki kuajli titlatlajtoaj itech. Noijki ijkon panoua tla tiknekij nochipa iuan touikaskej toTajtsin. Xkita tlenon kijtoa Biblia noneki tikchiuaskej:

Nochipa tikchiuiliskej teoyotl Jehová. “Ma ka keman xkajkauakan ika nenkichiuaj oración [teoyotl].” (Romanos 12:12.)

Tikixpoaskej Biblia, toTajtsin iTlajtol. “Nochi Yektlajkuilojli itech Dios uajlitikaj [noso ualeujtikaj], [...] techmachtia on tlen melauak, techchikajkanotsa, kiyektlalia on tlen xkuajli.” (2 Timoteo 3:16.)

Tikinmachtiskej oksekimej itech toTajtsin. “Xuiyan imanyan nochi on tlaltikpaktli, niman xkinmachtikan nochimej on tlakamej para yejuamej no nonomachtijkauan yeskej. [...] Niman xkinmachtikan para ma kitlakamatikan nochi tlen yonemechnauatij.” (Mateo 28:19, 20.)

 Tikiminisiuiskej akin iuan nouikaj toTajtsin. “Akin kistinemi iuan tlamachilisejkej nochiuas tlamachilise.” (Proverbios 13:20.)

Tiaskej itech kajli kampa nosentlaliaj iTeixpantijkauan Jehová. “Tikinyoleuaskej oksekimej para ma notlajsojtlakan se iuan okse niman para ma kichiuakan on tlen kuajli. [...] Yej ma titoyoleuakan se iuan okse.” (Hebreos 10:24, 25.)

Matitepaleuikan manochiujto itekiyo toTajtsin. “Se makitemaka [...] ken kixtia ipan iyojlo. Ma ka kitemakas ikan tlauejli, nion kinemilis san yakaj kichiualtia, pampa Dios kitlajsojtla on yejuan kitemaka [...] ikan paktli.” (2 Corintios 9:7.)