Ouijtika tikimpiyas akin iuan timouikas niman xojuitika tikimpolos. Tikpiyaskej miyek tlateochiualismej tla iuan touikaj toTajtsin niman tla xkeman tijkauaj. Jesús okimijli akin itech tlaneltokayaj: “Tlen melauak yejua mechmanauis” (Juan 8:32). ¿Tlenon okijtosnek?

Uelis kuajli tinemis aman, niman xtla mistsakuilis. Uelis tijkakuaskej tlaneltokiltin xmelajkej niman tlakajkayaualismej tlen Satanás yokisemoyauj. Uelis xok tikpiyaskej tlajyouilistli ken kipiyaj sajnoye miyekej tlaltikpakchanejkej akin xkixmatij Jehová (Romanos 8:22). Akin iuan nouikaj toTajtsin noijki xok ‘kimakasij mikilistliʼ (Hebreos 2:14, 15).

Uelis kuajli tinemis ipan yenkuik tlaltikpaktli tlen toTajtsin kitlalis, niman xtla mitsajmanas. ¡Ijkuak yejkos on tonaltin sajnoye kuajli tinemiskej! Ijkuak in tlaltikpaktli nochiuas se Xochitlalpan, xok onias guerras, xok onias kokolistli, xok nochiuas tlemach tlen xkuajli. Xok onias apistli niman tikpiyaskej nochi tlen techpoloua. Xok yakaj ueuentsintias, xok mikilos, xok tomoujtiskej, xok titlajyouiskej, niman xok yakaj kichiuas tlen xkuajli. ToTajtsin iTlajtol kijtoa: “Nochi kuajli tetlayokolijli tikseliaj [...], ualeua ne tlakpak. Nochi on tetlayokolijli ualeua itech toTajtsin” (Santiago 1:17).

 Akin iuan nouikaj toTajtsin nochipa nemiskej. Nemilistli tlen xkeman tlamis kentla se tetlayokolijli melak kualtsin, tlen toTajtsin kiminmakas akin kitejtemouaj iuan nouikaskej (Romanos 6:23). ¡San xnemili tlenon nochi uelis tikchiuas tla tinemis nochipa!

Uelis tikchiuaskej miyek tlamach tlen tiknekiskej. Kanaj tejua tiknekis timomachtis titlatsotsonas, titlatlapajlotis, noso tiknekis tiuelis okse tekitl tlen aman xtiueli. Noso tiknekis kuajli tikimixmatis yolkamej noso xochimej. Noso tikuelitas tipaxialos uejka niman tikixmatis okseki kalpamej niman akin ompa chantij. ¡Pampa tikpiyaskej nemilistli tlen xkeman tlamis, uelis tikchiuaskej nochi yejuin!

Uelis tikimixmatiskej niman tikimpiyaskej miyekej akin iuan touikaskej. Pampa tikpiyaskej nemilistli nochipa, uelis tikimixmatiskej miyekej akin iuan nouikaj toTajtsin. Tikmatiskej tlenon uelij kichiuaj niman ikualneskayouan, niman noijki uelis imiuan touikaskej. Tikimintlasojtlaskej, niman yejuamej noijki techtlasojtlaskej (1 Corintios 13:8). Pampa tikpiyaskej nemilistli tlen xkeman tlamis, uelis imiuan touikaskej nochimej tlaltikpakchanejkej. Ken panotiaskej xiutin sajnoye kuajli iuan touikaskej Jehová. ¡Matouikakan iuan toTajtsin nochipa!