Tlemach tlen xkuajli panotika ipan tlaltikpaktli techititia ika Xochitlalpan iyejkotika. Biblia okijto yeuejkaui ika tikitaskiaj tonaltin ojuitokej ijkuak iyejkotos Xochitlalpan. Aman tinemij ipan on tonaltin. Yejuin san seki tlemach tlen Biblia okijto panoskia:

Uejueyimej guerras. “On tekiuajkej nouijsokiskej inuan oksekimej tekiuajkej niman on países nomiktiskej inuan oksekimej países.” (Mateo 24:7.) Yejuin tlajtoltin yonochiuj. Itech xiuitl 1914 opanok se guerra niman sakin okse, niman okseki miyekej guerras xuejueyimej kampa onouisojkej miyekej países noso analmej. Ompa sajnoye miyekej tlaltikpakchanejkej omijkej.

Kokolismej tlen yonosemoyaujkej. Onias “miyek kualolistli” (Lucas 21:11). ¿Yonochiuj yejuin tlajtoltin? Kema. Cáncer, kokolismej tlen kiteltia toyojlo, mijkatlatlaxistli, dengue, sida niman oksekimej kokolismej yokimimikti sajnoye miyekej tlaltikpakchanejkej.

Xtla tlakuajli. Ipan nochi tlaltikpaktli nemij tlaltikpakchanejkej tlen xkipiyaj tlen kikuaskej. Nochi xiutin sajnoye miyekej tlaltikpakchanejkej mikij ika apistli. Yejuin noijki techititia ika Xochitlalpan iyejkotika. Biblia kijtoa: “Onyas apistli” (Marcos 13:8).

 Tlalolinalismej. “Niman [...] tlalolinis miyekan.” (Mateo 24:7.) Yejuin noijki yonochiuj ipan in tonajli. Ipan xiuitl 1914 ika tlayekapa kanaj se millón yomijkej ipan tlalolinalismej.

Tlaltikpakchanejkej xkuakualtin. Tlaltikpakchanejkej “kejeleuiskej tomin” niman “xkintlajsojtlaskej oksekimej”. San “kinejnektiaskej on impakilis ipan in tlaltikpaktli” niman ‘xkitetemoskej tlinon ika kipaktiskej Dios.ʼ Kokonej “xkintlakamatiskej intajuan” (2 Timoteo 3:1-5). ¿Xtikita ika aman nemij tlaltikpakchanejkej ijkon? Xkitlakaitaj toTajtsin niman xkinkauiliaj oksekimej makixmatikan.

Tlemach tlen xkuajli nochiua. Noijki “miyekiyas on tlen xkuajli” (Mateo 24:12). Kanaj tejua noijki tikita ika sa kinama in xiutin nochiua tlemach tlen xkuajli. Nochiuiyan, tlaltikpakchanejkej nomojtiaj makintlachtekilikan, makinkajkayauakan noso itlaj xkuajli makinchiuilikan.

Nochi yejuin techititia ika itekiuajyo toTajtsin iyejkotika. Biblia kijtoa: “Ijkuak nenkitaskej ye nochijtikaj on tlamauisoltin [...] xmatikan ika ye nisiu para Dios kinmandaros [noso kinauatis] nochi tlakatl” (Lucas 21:31). San ika ¿tlenon on itekiuajyo toTajtsin? Yejon iiluikaktekiuajyo toTajtsin tlen kikuepas in tlaltikpaktli ipan se xochitlalpan. Itekiuajyo toTajtsin kinkixtis nochimej tekiuajkej akin nemij ipan tlaltikpaktli (Apocalipsis 11:15).