Kanaj tejua nochipa tikintlakamati motajuan, ¿xmelak?... San ika, kemantika kanaj okpa tiknemilia tikchiuas tlen mitsnauatiaj. ¿Tikmatstika tlenon okipaleui Jesús makitlakamati Jehová niman itajuan?... Tlen okichiuj uelis mitspaleuis ika nochipa xkintlakamati motajuan. Matikitakan tlenon uelis mitspaleuis.

Ijkuak xiuajlaya ipan tlaltikpaktli, Jesús onen iuan iTataj noso iTaj, Jehová, ipan iluikak. San ika, ijkuak onen ipan tlaltikpaktli, noijki okinpix itajuan. Itataj itoka katka José niman inanaj María. ¿Tikuelitaskia tikmatis kenon onochiujkej itajuan?...

Jehová okichiuj ika Jesús manemiki ijtik María niman ijkon ueliskia tlakatiskia niman nemiskia ipan tlaltikpaktli. ¡Yejuin se milagro! Jesús nemiskia ijtik María niman ijkuak kaxiltiskia chiknaui metstli, Jesús tlakatiskia. Ijkon María niman José onochiujkej itajuan ipan tlaltikpaktli.

Ijkuak Jesús kipiaya 12 xiuitl, okichiuj itlaj tlen okiteititi ika melak kitlasojtlaya iTataj iluikakchane, Jehová. Yejuin opanok ijkuak Jesús niman ichanejkauan oyajkej Jerusalén okiueyichiuatoj Jehová. Ijkuak iuajnokueptoyaj inchan, José niman María xkinextiayaj Jesús kanon nemi. ¿Tikmatstika kanon nemiya?...

José niman María nimantsin onokuepkej Jerusalén okitejtemotoj. Melak yonomojtikaj pampa xueliyaj kinextiayaj Jesús. San ika, ijkuak yopanoka yeyi tonajli, ¡okinextitoj ipan teopan! ¿Tikmatstika tleka Jesús nemiya ipan teopan?... Ompa nomachtijtoya itech iTataj, Jehová. Yejua melak kitlasojtlaya Jehová niman kinekiya kiyolpaktis. Maski ijkuak yonoskaltijka niman yotelpochtiaka, nochipa okitlakamat Jehová. Jesús noijki otetlakamat maski ipan onochiuj tlemach tlen xkuajli niman otlajyoui. ¿Noijki Jesús okintlakamat José iuan María?... Kema, Biblia kijtoua ika ijkon okichiuj.

¿Tlenon tiuelij itech Jesús?... Kema, noneki tikintlakamatis motajuan, maski kemantika ouijtika tikchiuas ijkuak itlaj mitsnauatiskej. ¿Tikchiuas ijkon ken Jesús?...