Tokniuj akin timitstlasojtlaj:

Ijkon ken tejua tikmati, ipan Biblia tlajtoua itech miyekej tlaltikpakchanejkej. Tlakamej niman siuamej yolmelaujkej akin okixnamijkej tlauejli ijkon ken tejuamej tikixnamikij (Santiago 5:​17). Sekimej okipixkej ajmantli niman tlauejli. Oksekimej okinyolkoko tlen okichiujkej inchanejkauan noso sekimej itekipanojkauan toTajtsin. Miyekej noijki xkuajli onomachilijkej ipampa intlajtlakoluan.

¿Okitlalkauijkej Jehová niman xok keman onokuepkej itech? Ka. Miyekej onomachilijkej ken salmista akin okijto ipan teoyotl: “Yonipoliuj ken se borreguito akin poliui. Xtejtemo motekipanojkauj, pampa xnikimilkaua motlanauatiluan” (Salmo 119:​176). ¿Kanaj tejua noijki ijkon timomachilia?

Jehová xkeman kimilkaua itekipanojkauan akin yonoxelojkej itech oksekimej ikniuan. Yejua kintejtemoua, niman kichiua ijkuak kintekitiltia tokniuan ipan tlanechikojli. Xtlanemili itech yejuin: ken Jehová okipaleui itekipanojkauj Job ijkuak okixnamik miyek tlajyouilistli, okipolo tlemach tlen patioj kipiaya, omijkej ichanejkauan niman yejua okajsik se kokolistli. Noijki okijyoui tlen teyolkoko okijlikej akin nonekiya makipaleuikan. Maski Job xkeman okitlalkaui Jehová, oajsik tonajli ijkuak okinemili tlen xkuajli (Job 1:​22; 2:​10). ¿Kenon Jehová okipaleui Job oksejpa kuajli matlanemili?

Jehová okipaleui Job ika se itekipanojkauj itoka Elihú. Ijkuak Job tlajtouaya itech tlajyouilistli tlen kixnamiktoya, Elihú kachtopa okikak, niman sakin otlajto. ¿Tlenon kijtoskia? ¿Kitejteneuaskia noso kijliskia ika yejua kipiya tlajtlakojli noso hasta kipinaujtiskia niman ijkon kiyektlaliskia? ¿Noueyimatiskia ken kinotsaskia Job? Ka, xijkon okichiuj. Ika iespíritu santo toTajtsin, Elihú okijto: “Nejua noijki ijkon ken tejua ixpan toTajtsin; nejua noijki onexchijchiujkej ika sokitl”. Sakin okijli ika maka manomojti niman kuajli manomachili ika tlen kijliskia (Job 33:​6, 7). Elihú kuajli okinots Job, ika tlasojtlalistli okitlajtolpaleui, okiyolchikauj niman ijkon okimakak tlen kipolouaya.

Tiknekij xmati ika tejuamej noijki ijkon otikyektlalijkej tlen kijtoua yejuin amatlajkuilojli. Kachtopa, otikinkakej miyekej tokniuan akin okitlalkauijkej tlanechikojli niman otitlanemilijkej tlenon inpan onochiuj (Proverbios 18:​13). Sakin otikitakej tlenon kijtoua iTlajtol toTajtsin niman ika teoyotl otomachtijkej kenon Jehová yeuejkaui okinpaleui itekipanojkauan akin noijki ijkon okixnamijkej tlen ouijtika. Kuakon, otiksentlalijkej tlen kijtoua Biblia onochiuj yeuejkaui iuan tlen panoua ipan yejuin tonaltin niman ijkon otikijkuilojkej yejuin amatlajkuilojli. Timitstlajtlaniliaj melak kuajli xpoua. Tiknekij xmatsto ika tejuamej melak timitstlasojtlaj.

Grupo akin Kinyekana iTeixpantijkauan Jehová