PARTE 4
Ijkuak se notlajtlakoltia: “Xnexchipaua itech notlajtlakol”
“Oniknexti se yenkuik tekitl tlen okipaleui melak kuajli manemikan nochanejkauan. San ika, noijki okichiuj manikchiua itlaj tlen xkinamiki. Opeuj nikinpanoltia iluimej, ninokalaktia ipan política niman hasta noijki opeuj niauj ipan teopan. Nejua xok oninosentlali iuan tlanechikojli ken se iteixpantijkauj Jehová ipan cuarenta xiuitl. Ijkuak panouaya seki xiuitl, niknemiliaya ika Jehová xok keman ueliskia nechtlapopoluis. Nejua nikmachiliaya ika nion nejua xueliskia ninotlapopoluis. Maski nikmatstoya tlen melauak, oniktlapejpeni nias ipan xkuajli ojtli.” (Martha)
IJKUAK se notlajtlakoltia, xkuajli nomachilia. Tekiuaj David melak xkuajli nomachiliaya ipampa itlajtlakol, ika yejon okijkuilo: “Pampa tlen xkuajli yonikchiuj onka ipan notsontekon; kentla se tlamamajli melak nikyetikamati” (Salmo 38:4). Sekimej tokniuan melak notekipachouaj, pampa kinemiliaj ika Jehová xkeman uelis kintlapopoluis (2 Corintios 2:7). ¿Kinamiki ijkon titlanemilis? Niman tla yotikchiuj ueyi tlajtlakojli, ¿tikmati uejka tinemi itech Jehová niman xkeman uelis mitstlapopoluis? Ka, maka ijkon xmomachili.
“Matikyektlalikan tlen opanok”
Jehová xkeman kinmapeua akin noyolkuepaj itech intlajtlakol. Yejua kintejtemoua. Jesús okiteneuj se neskayotl itech tekoneuj akin yopoliujka. Ompa kineskayotia Jehová ken se tajtli tetlasojtlani ijkuak ikoneuj noxeloua itech inchanejkauan niman auilnemi. San ika, sakin tekoneuj kinemilia nokuepas ichan: “Ijkuak ok uejka uajlaya, on itaj okontak niman okiknelij. Onotlaloj okinamikito. Okinapaloj niman okitenkuaj [noso okipipitso]” (Lucas 15:11-20). ¿Tikneki timonisiuis itech Jehová san ika tikmachilia ika ok uejka tinemi itech? Ijkon ken yejon tajtli tlen Jesús okiteneuj, Jehová kineki mitsiknelis. Yejua melak kuajli mitsselis ijkuak oksejpa timokuepas itech.
San ika ¿tiknemilia ika motlajtlakoluan tlen yotikchiuj melak ueyi niman ika yejon Jehová xuelis mitstlapopoluis? Xtlanemili itech kenon Jehová kinnotsa akin ijkon nomachiliaj ipan Isaías 1:18: “Xuajlakan, aman, niman matikyektlalikan tlen opanok,” kijtoua Jehová. “Maski nemotlajtlakoluan tsotlani ika chichiltikej, istayaskej kentla nieve”. Kema, maski tlajtlakojli nesi xuelis popoliuis, ijkon ken itlaj tlen tsotlanki ika chichiltik ipan se tlakentli istak, Jehová uelis mitstlapopoluis.
Jehová xkineki nochipa xmotlajtlakolmakato. Kuakon, ¿kenon uelis tikpiyas kuajli motlamachilis niman mamitstlapopolui toTajtsin? Xtlanemili itech ome tlemach tlen okichiuj David. Kachtopa, okijto yejuin: “Ninoyolkuitis itech Jehová ipampa tlen xkuajli yonikchiuj” (Salmo 32:5). Xkilnamiki, Jehová yejua yomitsnots ika xchiuili teoyotl niman xyektlali iuan yejua tlen opanok. Xseli tlen mitsijlia. Xkijli tlajtlakojli tlen yotikchiuj niman xkijli kenon timomachilia. Pampa David kimatiya itech ken opanok, ijkin okichiuili teoyotl: “Xnexchipaua itech notlajtlakol. [...] Se akin yoyoltlapan niman yoyolxajxaman, noTajtsin, xtikmapeuas” (Salmo 51:2, 17).
Ika ome, David okiseli tlapaleuilistli itech akin toTajtsin yokitlalijka, teotlajtoketl Natán (2 Samuel 12:13). Ipan yejuin tonajli, Jehová yokintlali tlayekankej ipan tlanechikojli akin kuajli yonomachtijkej ken kinpaleuiskej akin yotlajtlakojkej oksejpa kuajli manouikakan iuan Jehová. Ijkuak imiuan titlajtos, yejuamej kitekitiltiskej Biblia niman mouan kichiuaskej teoyotl niman ijkon kuajli timomachilis. Mitspaleuis xok timotlajtlakoltis, niman ijkon oksejpa chikauis motlaneltokil (Santiago 5:14-16).
Jehová kineki kuajli xmomachili niman xpiya chipauak motlamachilis
“Paki akin kitlapopoluiliaj itlajtlakol”
Kanaj tikitas ouijtika tikijlis Jehová motlajtlakoluan niman titlajtos imiuan tlayekankej. David noijki ijkon okitak, Biblia kijtoua ika opanok seki tonaltin okiyan itlajtlakol tlen yokichiujka (Salmo 32:3). San ika, sakin okitak kenon melak tepaleui tikteijlis tlajtlakojli tlen yotikchiuj niman timoyektlalis.
David melak okipaleui pampa oksejpa opeuj nemi ika paktli. Yejua okijkuilo: “Paki akin kitlapopoluiliaj itlajtlakol, akin kitlapachouiliaj itlajtlakol” (Salmo 32:1). Noijki okichiuj yejuin teoyotl: “Jehová, xkintlapo notenxipaluan, niman ijkon nokamak uelis mitsueyichiuas” (Salmo 51:15). David melak kuajli onomachili niman okitlasojkamat pampa toTajtsin okitlapopolui. Ika yejon, ika iyojlo okinek kiueyichiuas toTajtsin teixpan.
Jehová kineki ika tejua oksejpa xpiya chipauak motlamachilis. Noijki, yejua kineki xkinnojnotsa oksekimej itech yejua niman itech tlen kineki kichiuas. Xchiua ika nochi moyojlo niman ika paktli, niman maka xmotlajtlakolti (Salmo 65:1-4). Xkilnamiki ika toTajtsin mitsnotsa: “Xmoyolkuepakan niman xpatlakan nemonemilis para nemotlajtlakol popoliuis. Niman toTeko Dios mechajtitlanilis on tonaltin ijkuak mechyoltlalis” (Hechos 3:19).
Martha kijtoua tlen ipan onochiuj: “Nokoneuj nochipa nechinuajtitlaniliaya Amatl Tekakistilijketl niman ¡Despertad! Ika yolik oksejpa opeuj kuajli ninouika iuan Jehová. Melak ouijtika nikitaya niktlajtlanis Jehová manechtlapopolui itech tlen yonikchiujka niman oksejpa ninokuepas. Sakin, oniknots toTajtsin ika se teoyotl niman oniktlajtlanili manechtlapopolui. Xuelis noneltokas ika opanok cuarenta xiuitl ika oksejpa oninokuep itech Jehová. Tlen nopan onochiuj teititia ika, maski panoua miyek xiuitl, se uelis oksejpa kitekichiuilis toTajtsin niman oksejpa nemis itech itlasojtlalis”.
Puede que también le interese
VIDEOS
Uajnokuepa tekoneuj akin yopoliujka
Teajman ika sekimej telpokamej kinemiliaj kikauaskej tlen intajuan okinmachtijkej itech toTajtsin. Xkita tlenon uelis kixnamikiskej telpokamej ipan yejuin tonajli.
