TINOCHIMEJ tikixnamikij miyek ajmantli maski tiktekichiuiliaj toTajtsin. Salmista okijkuilo: “Ajmantli nechyolajmanaya” (Salmo 94:​19). Niman Jesús okijto ika, ipan sa itlamiyan tonaltin, tikpiyaskiaj ajmantli ipan tonemilis tlen kichiuaskia matikitakan ouijtika tiktekichiuiliskej Jehová (Lucas 21:​34). ¿Kenon timomachilia tejua? ¿Xkuajli timomachilia pampa ouijtika tiknextia tomin tlen ika timopanoltis? ¿Tikpiya tlauejli iuan mochanejkauan noso se kokolistli? ¿Kenon Jehová uelis mitspaleuis xkixnamiki nochi yejuin?

Tejuamej xuelis tikixnamikiskej san toselti nochi ajmantli. Pablo okijto yejuin: “Nouiyan topan uajlau” ajmantli. Niman noijki okijto ika “sanoyej tlajtlamach xkuajli topan uajlau” niman “techxiniaj ipan tlajli”. San ika, yejua okijto ika “xkeman san titokauaj”, “Dios xkeman techtlalkauiya” niman “xkeman techpopolouaj”. ¿Tlenon techpaleuiya matitlaxikokan? Kojtilistli tlen techmaka toTajtsin Jehová (2 Corintios 4:​7-9).

Xtlanemili kenon yeuejkaui otikseli yejon kojtilistli tlen omitsmakak toTajtsin. ¿Tikilnamiki se tlamachtijli tlen omitsyolchikauj niman omitspaleui xkita ika Jehová mitstlasojtla? ¿Chikauiya motlaneltokil itech tlen Jehová kijtoua kichiuas ijkuak tikinnojnotsaya oksekimej itech se Xochitlalpan? Ijkuak tiauej ipan tlanechikojli niman tikinnojnotsaj oksekimej itech tlen tikneltokaj, tikseliaj yolchikaualistli niman ijkon tikxikouaj nochi ajmantli tlen tikixnamikij ipan tonemilis. Niman kuajli tomachiliaj ijkuak tiktekichiuiliaj Jehová.

Tikmatstokej ika noneki tikchiuaskej itlaj tlen melak noneki. Se neskayotl, Jehová kineki matiktejtemokan kachtopa iTekiuajyo niman maka matoteltikan tiktekichiuiliskej (Mateo 6:​33; Lucas 13:​24). San ika ¿kanaj tikixnamiktika tlauejli, se kokolistli tlen kichiua maka kuajli xmomachili? ¿Noso motekiyo kichiua melak xsiaui niman ika yejon xok tiueli tiauj ipan tlanechikojli? Melak miyek tlemach noneki tikchiuas niman pampa xmiyek tiempo nion xtikpiya chikaualistli, yejon kichiua xmati ika yotisiauj. Kanaj hasta tiknemilia ika Jehová melak miyek mitstlajtlanilia.

Jehová kasikamati kenon tomachiliaj. Yejua xkeman kichia totech tlen xuelis tikmakaskej. Tla yotisiaujkej noso xkuajli tomachiliaj, Jehová kimati ika xnimantsin oksejpa kuajli tomachiliskej (Salmo 103:​13, 14).

Xtlanemili itech kenon Jehová okipaleui teotlajtoketl Elías. Ijkuak Elías melak najmanaya niman onomojti oyaj ipan tlaluaktli. ¿Kenon okitak Jehová tlen okichiuj Elías? ¿Okinauati Jehová nimantsin manokuepa itech itekiyo tlen yokimakaka? Ka. Jehová okpa okititlan se iluikaktekitketl makitlachialtiti yolik Elías niman makimakati tlen kikuas. Maski ijkon, opanok cuarenta tonaltin niman  Elías ok melak najmanaya niman nomojtiaya. ¿Tlenon okseki okichiuj Jehová tlen ika okipaleui? Kachtopa, Jehová okititi ika ueliskia kitlajpiyas. Ika ome, okiyolchikauj ika “tlajtojli yemanki niman yoliktsin”. Ika yeyi, okijli ika melak miyekej nemiyaj akin noijki kiueyichiuayaj Jehová, xsan iselti nemiya. Kuakon, Elías nimantsin oksejpa opeuj chikauak kitekichiuilia toTajtsin ken teotlajtoketl (1 Reyes 19:​1-​19). ¿Tlenon techmachtia yejuin? Ijkuak Elías melak onajman, Jehová okikneli niman okititi ika kitlasojtla. Jehová xnopatla, niman yejua noijki ijkon mitstlajpiyas ipan yejuin tonajli.

Ijkuak tiknemilia tlen uelis tikmakas Jehová, xkita tlen kema tiuelis niman tlen xtiuelis. Maka xkita tlen tikchiuaya yeuejkaui iuan tlen tikchiujtok amantsin. Xtlanemili itech se akin kuajli notlaloua: Ijkuak panoua uejkaujtipan ika xok notlaloua, xuelis nimantsin kichiuas ijkon ken kichiuaya yeuejkaui. Noneki oksejpa yolik peuas niman ijkon kipiyas oksejpa kojtilistli niman kixikos notlalos. Tejuamej kentla akin notlalouaj, noneki ika yolik tikyejyekoskej oksejpa niman ijkon tikonajsiskej tlen tiknekij (1 Corintios 9:​24-​27). ¿Tleka xtiknemilia itlaj tlen peuas uelis tikchiuas? Uelis tiknemilis oksejpa tias ipan tlanechikojli. Xtlajtlanili Jehová mamitspaleui niman ijkon uelis tikchiuas tlen yotiknemili. Ijkuak ika yolik oksejpa chikaujtias motlaneltokil, tikmatis niman tikitas “ika Jehová yolkuajli” (Salmo 34:8). Xkilnamiki ika maski san tlenon tikchiuas tlen ika tikititis Jehová ika tiktlasojtla, maski nesis san pitentsin, yejua melak kitlasojkaitas tlen tikchiua (Lucas 21:​1-4).

¿Kenon okipaleui Jehová tokniuj siuatl June oksejpa manokuepa itech? Yejua techijlia: “Nochipa nikchiuiliaya teoyotl Jehová niman niktlajtlaniliaya manechpaleui. Kuakon, nosiuamon onechijli ika oniaskia se ueyi tlanechikojli nisiuj kampa nichanti. Nejua oniknemili nias maski san se tonajli ipan ueyi tlanechikojli. ¡Melak kuajli oninomachili pampa oksejpa ninemiya imiuan akin kitekichiuiliaj Jehová! Nechpolouaya san manechonmatilanakan, niman yejon ueyi tlanechikojli ijkon okichiuj. Aman niktekichiuilia Jehová ika paktli oksejpa niman melak kuajli ninomachilia ika tlen nikchiua ipan nonemilis. Nikasikamati ika xkipiya ika ninoxelos niman noneki ninemis imiuan tokniuan. Niktlasojkamati ika ouel nimantsin oninokuep itech Jehová”.