Tlen okijkuilo Juan 11:1-57
11 Se tlakatl akin itoka katka Lázaro kualouaya. Yejua ualeuaya Betania, inpueblo María niman ikniuj Marta.
2 Yejua katka María akin okitoyauj aceite tlen ajuiyak ipan toTeko niman okinuachili ikxiuan ika itson. Ikniuj Lázaro kualouaya.
3 Kuakon, ikniuan siuamej, ijkin otlanauatijkej makijlitij Jesús: “NoTeko, moamigo, akin melak tiktlasojtla, kualo”.
4 Pero ijkuak Jesús okikak yejuin, okijto: “Yejuin kokolistli xika mikis. Tepaleuis para makiueyiteneuakan toTajtsin niman noijki iKoneuj toTajtsin”.
5 Jesús kitlasojtlaya Marta, ikniuj niman Lázaro.
6 Pero, ijkuak okikak ika Lázaro kualouaya, yejua ok* onokauj ome tonajli kampa nemiya.
7 Sakin, ijkin okimijli akin kinmachtiaya: “Oksejpa matiuiyan Judea”.
8 Pero akin kinmachtiaya okijlijkej: “Rabí, xeuejkaui kinekiyaj mitstemojmotlaskej ne Judea, ¿niman tiknemilijtika oksejpa ompa tias?”.
9 Jesús okinnankili: “¿Xmelak ika ipan se tonajli tlauilpan 12 horas? Akin nejnemi ijkuak tlauilpan xtlaj ika nantikisa pampa kita tlauijli tlen onka ipan yejuin mundo.
10 Pero akin nejnemi ika tlayoua nantikisa pampa xtlauilpan”.
11 Sakin, ijkin okijto: “Toamigo Lázaro yokoch. Pero nejua nias nikontlachialtis”.
12 Akin kinmachtiaya ijkin okijlijkej: “NoTeko, tla kochtika, kuakon pajtis”.
13 Jesús kinekiya kimijlis ika Lázaro yomikka. Pero, yejuamej kinemiliayaj ika kimijlijtoya ika san kochtoya.
14 Kuakon, Jesús ijkin okinmelajkaijli: “Lázaro yomik,
15 niman nipaki ika nemejuamej xompa nennemiyaj para nentlaneltokaskej. Matiuiyan kampa yejua nemi”.
16 Yejua ika, Tomás, akin kijliayaj Gemelo, ijkin okimijli oksekimej akin Jesús kinmachtiaya: “Tiauej tejuamej noijki niman iuan matimikikan”.
17 Ijkuak Jesús oajsik, okimat ika Lázaro yekipiaya naui tonajli ipan tlalkontli.
18 Betania uejka katka de Jerusalén kanaj yeyi kilómetro.*
19 Miyekej judíos okitakoj Marta niman María para kinyolchikauaskej pampa imikniuj yomikka.
20 Ijkuak Marta okimat ika Jesús uajlaya, okinamikito. Pero, María onokauj kalijtik.
21 Marta kuakon okijli Jesús: “NoTeko, tla nikan tinemiskia, nokniuj xmikiskia.
22 Pero, aman nikmati ika nochi tlen tiktlajtlanilis toTajtsin, toTajtsin mitsmakas”.
23 Jesús okijli: “Mokniuj nokuiteuas”.
24 Marta okinankili: “Nejua nikmatstok ika yoliuis ijkuak nochimej yoliuiskej, ijkuak sa ika tlami tonajli”.
25 Jesús okijli: “Nejua niteyolitia niman niktemaka nemilistli. Akin notech tlaneltokas, maski mikis oksejpa nemis.
26 Niman nochimej akin yoltokej niman kiteititiaj ika notech tlaneltokaj, xkeman mikiskej. ¿Tikneltoka yejuin?”.
27 Marta okijli: “Kema noTeko. Nejua nikneltoka ika tejua tiCristo, iKoneuj toTajtsin, akin nonekiya uajlas ipan yejuin mundo”.
28 Ijkuak yokijto yejuin, okinotsato ikniuj María. Niman ijkin san ichtaka okijli: “ToMaestro nikan nemi niman mitsnotsa”.
29 Ijkuak María okikak yejuin, onokuitejtiuets niman okitato.
30 Jesús nion xekalakiya Betania, ok nemiya kampa Marta okinamikito.
31 Ijkuak judíos akin kiyolseuijtoyaj María okitakej ika san nimantsin onokuitejtiuets niman ouajkistiuets, iuan oyajkej pampa kinemiliayaj ika onchokaskia kampa itlalkon ikniuj.
32 Kuakon, María oajsik kampa Jesús nemiya niman ijkuak okitak, ixpan onotlakuantelkets niman okijli: “NoTeko, tla nikan tinemiskia, nokniuj xmikiskia”.
33 Ijkuak Jesús okitak ika María niman judíos akin ompa iuan nemiyaj melak chokatoyaj, melak onoyolkoko niman onajman.
34 Okintlajtolti: “¿Kanon onenkitlalijkej?”. Yejuamej okinankilijkej: “Xuajla* noTeko, niman tikitas”.
35 Jesús ochokak.
36 Ijkuak judíos ijkon okitakej, yejuin okijtojkej: “¡Xkitakan kenijki melak kitlasojtlaya!”.
37 Pero, sekimej de yejuamej kijtouayaj: “Tla yejuin tlakatl ouel okipajti yakaj akin xtlachiaya, ¿tleka xitlaj ouel okichiuj para Lázaro maka mamiki?”.
38 Ijkuak Jesús oksejpa yonoyolkoko, oyaj kampa tlalkontli. Yejuin tlalkontli katka se teostotl niman tsauktoya ika se tetl.
39 Jesús okijto: “Xkejkuanikan tetl”. Pero Marta, ikniuj on mikatsintli, okijli: “NoTeko, kanaj yomoloniak pampa yopanok naui tonajli”.
40 Jesús okitlajtolti: “¿Xonimitsijli ika tla titlaneltokaskia ueliskia tikitas iueyilis toTajtsin?”.
41 Kuakon, okejkuanijkej tetl. Jesús oajkotlachix niman okijto: “NoTaj, nimitstlasojkamachilia pampa otinechkak.
42 Nejua nikmatstika ika nochipa tinechkaki, pero, yejuin nikijtoua para akin nikan nemij makineltokakan ika tejua otinechajtitlan”.
43 Niman ijkuak yokijto yejuin, ijkin chikauak okijto: “¡Lázaro, xuajkisa!”.
44 Akin yomikka ouajkis. Yejua tejkuixtoya* ika tlakentin ipan ikxiuan, imauan niman noijki ixayak. Jesús okimijli: “Xkinkixtilikan yejon tlakentin niman xkauilikan mauiya”.
45 Yejua ika, ijkuak okitakej tlen Jesús okichiuj, miyekej judíos akin okitlajpalotoj María, otlaneltokakej itech Jesús.
46 Pero, sekimej oyajkej okimijlitoj fariseos tlen Jesús okichijka.
47 Kuakon, akin kinyekanaj teopixkej niman fariseos onosentlalijkej kampa Sanedrín niman okijtojkej: “¿Tlenon tikchiuaskej? Pampa yejuin tlakatl kinchiua miyek milagros.
48 Tla xtlaj tikchiuaj, nochimej itech tlaneltokaskej niman romanos uajlaskej niman techkuiliskej yejuin templo niman kinoyaxkatiskej* topueblo”.
49 Pero ompa nemiya se tlakatl akin itoka Caifás, yejua okitlalijkaj ken ueyi teopixki ipan yejon año. Niman okimijli: “Nemejuamej xtlaj nenkasikamatij.
50 ¿Xnenkitaj ika más kuajli tla san se tlakatl miki ipampa topueblo, niman maka nochi topueblo mapopoliui?”.
51 Pero, yejuin tlen okijto xsan yejua okuajnejnemili. ToTajtsin okichiuj makijto ika Jesús mikiskia ipampa nochi pueblo pampa ipan yejon año Caifás nemiya ken ueyi teopixki.
52 Niman xsan ipampa pueblo, noijki mikiskia para kinsentlalis iKoneuan toTajtsin akin xejxelijtoyaj.
53 Desde ijkuakon, opeuj kitaj kenijki kimiktiskej.
54 Yejua ika, Jesús xok kistinemiya kampa nemiyaj judíos niman oyaj nisiuj tlaluaktli. Ipan se ciudad tlen itoka Efraín, niman ompa onokauj imiuan akin kinmachtiaya.
55 Yeajsitoya tonajli ijkuak judíos kipanoltiskiaj Pascua. Niman miyekej akin chantiyaj ipan pueblitos oyajkej Jerusalén achto peuas yejuin iluitl para nochipauaskej ijkon ken kijtouaya Tlanauatijli.
56 Niman opeuj kitejtemouaj Jesús. Ipan templo ijkin noijliayaj: “¿Tlenon nenkinemiliaj? ¿Kanaj xuajlas ipan yejuin iluitl?”.
57 Pero akin kinyekanaj teopixkej niman fariseos yotlanauatijkaj ika tla yakaj kimatiya kanon nemiya Jesús makimijlitij para ueliskia kajsiskej.
Notas
^ Noso “sanken”.
^ Ika griego kijtoua “kanaj 15 estadios”.
^ Noso “Xuiki”.
^ Noso “tekimilijtoya”.
^ Noso “kinotlatkitiskej”.
